اخواني
لقد كنت اضارب وا ستثمر عشوائيا ، حالي حال غيري. لكني كنت اربح بسبب ان النازداك كان متعافي وزين وكنت اروح للأسهم اللي اسمها يرن مثل MSFT و DELL بحكم معرفتي بالحاسب وتقنياته.
وأذكر اني مرة شفت APPLL هابطة الى 25$ من 45$ (ان ما خانتن الذاكرة) ، طبعا انا مادري وش السبب. بس ضنيتها فرصة واشتريت وهبطة الى 19$ واستغربت ياجمعة هذي DELL وشلون؟ معقولة احد ما يبيها!!!!!
ولا كنت اعرف شارت ولا غيره وان شفته اشوف الخط ولا دري وش معناه.
والى هالحين اذكر مغامراتي مع ARTG اللي اعزة بالحيل. لأنه وحدة ربحت معه كثير لأن طريقته معروفة ينزل عند الإغلاق 3$ ويرتفع 4$ عند الإفتتاح ويمكن خلاله ينزل 1$ ويرتفع 1$ بدوامة. فبديت اركز عليه ولا التفت لأي سهم.
حتى اصابه ماصابه من الخور وجابني من 48$ الى 28$ ثم 23$ حتى 19$ بعدين تخليت عنه على مضض.
حسيت بعدها ان الدنيا مسودة بوجهي انقطعت عن السوق فترة لكن كل مازور السوق افتح على ARTG لأني احس اني اطلبه فلوس لازم اخذها منه. والى هالحين ماختها
توقفت عن الشغل. وبديت افكر والش الحل. الطريقة اللي استخدمها ماراح تنجح لأني مرتبط بسهم ان صحا صحيت وان مرض مرضت.
كنت اقراء في المنتدى لا كني ما افهم ومشتت
تابعت بعض الأخوان بالأسهم اللي يصون بها ومرة تصيب ومرة تخيب مثل:
RTRN (لا تزعل اخوي الحربي)
راسلت بعض المواقع اللي تهتم بالأسهم وردو علي يمدحون ارواحهم. لكن فيه موقع حليل كلكم تعرفونه هوا
www.pennystock.com . هذا الموقع يهتم بالبني ستوك. دخلت الموقع وقريت اللي فيه وقالوا نبي بس 99$ اشتراك وخل بحسابك 130$ بس وشف راح ندبلهن لك. قلت لهم وش طرقكم؟ قالوا طرقنا الكل يسويها لكننا حنا متفرغين لأسهم البني ونعرفها ازين من غيرنا. لأن غيرنا موهب فاضي يدرسها. قلت بنفسي يعني لوطرقكم تنجح كان صرتوا مليونيرات
قلتلهم عطوني سهم اجربه وفعلا عطوني سهم klly وهي شركة للقهوة وكانت بـ 0.019$ سكت وتركتهم. هالحين وبعد اكثر من 3 شهور الشركة بـ 0.10$ يعني اندبلت عشر مرات تقريبا. لكنها ببورصة OTC
طبعا فكرت انه ما يمكن ان اعتمد على موقع والا شخص اذا ماكنت نفسب ادري وش يصير.
رحت لموقع
www.AMZON.COM وشريت بعض الكتب وقريتها – نفعتني لغتي الانجليزية.
وشريت منهم بعض الكتب عن المضاربة واللي اكثرها كلام حشو ومكرر ونصب لتعبية الصفحات. لكن فيه كتاب واحد هوا اللي فتحلي الباب وانصح الجميع بقراءته وهوا:
Beginners’ Guide to Day Trading Online
By Toni Turner
وبعد قراءتي حسيت اني بديت اعرف اقراء الشارتات والمؤشرات ونجحت فيها واستطعت اني اطور اسلوب حلوا ينفع مثل:
ادور السهم اللي اقفل بولش وذلك عن طريق datek screener. بعد ما يفتح السوق اراقبه. اذا فتح قاب اب انتظره لحين يسكر القاب ثم يسوي بونس ثم اشتريه. او انه يكسر سعر ال 30 دقيقة هاي.
استخدم مع هذه التالي:
الموفنق افرج لـ 10 و 20 و 50 و 200 موزعة على فترت 1 و5 و 15 دقيقة (شرحتها في موضوع الشموع اليابانية)
الماكد MACD والفاليوم.
وبسب هالطريقة قدرت ان اكتشف اسهم في بداية البولش مثل:
Mpwr و pcom والتي ذكرتها في المنتدى
كما طبقت طريقتي على صواريخ اخوي السبيعي فوجدت انه يمكنني اكتشاف السهم في بداية البولش
كما اني اعترف انها قد تفشل في بعض الأحيان لأنه يوجد سبب رئيس يجب ان يكون السوق العام بولش او كما قال المثل الانجليزي ((( اذا كانت الأم غاضبة فالجميع غير سعيد )))
ومن خلال فحص الطريقة اكتشفت بعض العيوب والتي اتلافاها مع مرور الوقت. فمثلا قدمت سهم strm ولكنها لم تنجح معه وكان السبب هو ان متوسط الفوليوم للسهم لا يساعد على رفع السهم ولا يصلح للمضاربة ((والذي ارشدني لهذا هوا اخوي السبيعي جزاه الله خير))
قد تتسال وش هالطريقة العجيبة؟ أقولك ماهي سر ولا هي من المريخ. كل شيء (بالنسبة لي) يعتمد على الموفنق افرج للسعر مع مقارنته بالمؤشرات الثانية مثل الماكد والفوليوم.
لكني اكتشفت ان اقوى مؤشر للموفنق افرج يعيطيك الخبر الأكيد هوا حق 10 و 20 EMA في فترة 15 دقيقة. طبعا لها هفوات واخطاء لكني جالس اطور وضعيتي معها واطبقها.
لكن مشكلتها بالنسبة لي اني ما لقيت سكرينر يمكن يعطيني للموفنق افرج ل 10 و 20 كلهم يركزون على 50 و 200 وهذا ما يصلح معي حاولت ان اسوي مقارنة بين 10 و 20 مع ال 50 و 200 لكن حتى الآن مالقيت الوقت اني اركز واتفرغ لهادراسة.
الحين انا ناوي اتخلى عنها بسبب وجدت ان المضاربة ماهي زينة لي لأسباب
لعدم التفرغ ولأن اعصابي شوي ماهب مضبوطة مع الأشياء السريعة اعصابي تفلت واتخاذ القرار صعب. فقررت التحول لسوينق تريدر.
من مشاكل السوينق تريدر انك لازم تعرف التحليل الأساسي وانا ماحبه (لكن مكرها اخاك لا بطل)
فاشتريت كتاب من امزون اسمه
Electronic Swing Trading for Maximum Profit
By Misha T. Sarkovich
الكتاب مازلت اقراه. فيه كلام مكرر لكنه عنده حركات حلوه والحين انا في الفصل الأخير عن التحليل الأساسي ، الله يعيني. واذا خلصت انا ناوي اني احاول اربط بين التحليل الفني والتحليل الأساسي
هذا ملخص لتجربتي المتواضعة والتي ارجو ان تكون قدمت شيء لهذا الموضوع مع العذر لأني اقحمت تاريخ حياتي فيه لكني تعلمت هذا من الأمريكان اللي قريت لهم (ياصف وشلون ياكل البيتزا وهوا يشري)
المفضلات