قالوا تفضل واشتغل بالتداول

[نديم الحيارى]

قالوا تفضل واشتغل بالتـــــــداول ..... تتجر بسرعة دون أدنى حسافـه
قلت المشورة طيبة يالأفاضـــــل ..... وشلون أسوي واكتسب للحرافــه
قالوا على الشاشة وخلك مقابـل ..... وحاذر تصرف بالعجل واللقافــــــه
وخذت الإجازة وابتديت بتفـــــاءل ..... وابحرت في عزم بليا مخافـــــــــه
والموج ياخذني يمين وشمايــل ..... واحسبه يمزح قلت يكفي سخافه
وفي وسط لجة والعواصف هوايـل ..... أبي شراعي ، صار مثل اللفافــــه
صعب أفكه من سنون الغوايــــــل ..... خرفان أو كهرب وزرع وخلافــــــــه
واصبحت أنا تايه ببحر القوايـــــل ..... ضيعت دربي والخساير خلافــــــه
أدور بوش في محلي واخايــــــل ..... رزق بلا حروة ولا به كلافـــــــــــه
يا الله يارزاق راعي الفضايــــــــل ..... تعوض الخسران تظفي لحافـــــــه

[المؤشر]

قصيدة جميلة خاصة :

خرفان أو كهرب وزرع وخلافــــــــه


ليتك تقول لصاحبك :

ابي اعرف متى تسكن رياحك

وابي اعرف غرورك هو متى يطلق سراحك

وابي اعرف متى تعصف، ومتى تعطف، متى تنزف جراحك

وابي اعرف اذا باقي في بحرك موج اكسر فيه مجدافي

وابي اعرف اذا باقي في همك هم ما شالته اكتافي

وابي اعرف اذا باقي في هالدنيا حزن ما مرني واستوطن اطرافي

بقايا زيف اشواقي .. سما أمطار أحداقي

شبيه الريح وشباقي


* * *


سنيني يم، وقلبي المركب المتعب وانت الريح

مجاديفي عذاب وهم، وزاد الوجد والتبريح

وصبري صبر بحارة بغوا باليم محارة

غشاهم موج كان من الغضب اغضب

وكانوا للهلاك اقرب، لولا كثروا التسبيح

[نديم الحيارى]

هالحين حنا وين والحب وين ، عطنا شي عن مؤشر تداول ، قلنا شي يوسع صدورنا
وإلا هالوقت عامل لي قيس ابن الملوح!!

[المؤشر]

اذا قدرت تجاوب ها البيتين :

وابي اعرف متى تعصف، ومتى تعطف، متى تنزف جراحك

وابي اعرف اذا باقي في بحرك موج اكسر فيه مجدافي


من يجاوب على البيتين ، يكسب ربح طيب

[نديم الحيارى]

أيها السوق اللعين ، متى أعرف قصفك ، قبل حدوثه ، ومتى أعرف إرتفاعك وعطفك علينا نسترد لو بعض الخساير، وأبي أعرف متى استمرار نزيفك ، سيؤدي إلى تدخل جهة ما لوقف نزيفه ، وأهم من هذا هل فيه مجال لي لأسترد بعض أنفاسي أم أستمر لاهثا خلف سراب المكسب ، بلا فائدة.

[هتان]

قصيده في غايت الروعه تمثل الواقع وتدل على صراحتك

[نديم الحيارى]

أعرف إنها مش حالك ، لكن طلعت غصب من حر ما أوجس ، بعد الإقفال مباشرة ، يأخي من الصعب إن تشوف حلالك ، إللي ما جاك إلا بكل كلفة ، مربوط في شركات كانت أسهمها في فترة قريبة ترتفع ، وهالحين تشوفها ، ومعها حلالك في القاع ، إن بعت تبي تخسر خسائر كبيرة ، ليته فقط ما ربحته في الأسهم ، لكن يبي يجر معه رأس المال الأصلي، وإن خليتها ، مثل مكتوف اليدين ، تشوف فرص ، ما تقدر تتحرك لأنك مربط ، لكن علينا بالصبر والدعاء إلى الله إن يكشف هالغمة، وإذا الله مريد لنا خسائر، فلا بد من التسليم بقضاء الله وقدره ، فالمؤمن مبتلى ، وعليه بتقوية إيمانه لكي يكون أكثر قوة على التحمل. شكرا أخي الكريم .