اذا قدر الله عليك ياصاحبي وزادت فليساتك في البنـك
وانـت انسـان من الدوام للبيـت ومن البيـت للدوام .. وتسافـرلك كم سفـره تنبسط وترجـع
ولا تحـب مطالب مع النـاس ولا منـاقز بين ادارات حكوميه ولاتحب توصي فلان اللي يعرف فلان يضبطلك ..
وشفـت حياتك هاديـه والوضـع مستتـب .. وصـرت حساب بلاتينـي في البنك .. والبنك مبسوط عليك .. فلوسك كاش عنده
وفجأه اكتشفـت ان التضخـم قـاعد يزيـد واللي بنا عماره واللي فتـح محـل واللي ترزق الله .. وانت بس فرحـان ببطاقة الفيزا انها مجانيـه وتدخلك صالات مطار ببلاش !
بعد هالمقدمـه ياصاحبي اكيد طقت في بالك انك تستثمر فلوسك في الاسهم .. لكنك مقروص من 2006 .. كنت خذيت قرض وقعدت تسدده10 سنين والفلوس مابقا منها الا 15 الف !
هنـا نقولك ياعزيزي 2006 كانت حاله استثنائيه مثلها مثل المناخ في الكويت .. وانتهت
انا هنا اقولك تعال نستثمر الاسثمار الامن اللي قال عنـه وارن بافيت ( اشتر في الشركات القويه اللي تمـر بوضـع سيئ )
انا هنا اقولك استثمـر في الشركـات اللي عـودت مستثمرينهـا توزع اربـاح وعلى قولة العثيم ( الاسهم القويه تتكاثر بالمنح وتوزيعات )
اذا انـت ناوي تشتـري سهـم استثماري .. انسا البيـع وفكر بالعائـد السنـوي .. و 5 % حلوه لك كعوائـد مع زيادة في قيمة الاصل مع سنيـن ..
اذا جيت المكان الصحيـح
غير ثقافتك .. اشـتر وتابـع الشاشه من بعيـد لبعيد .. لكن لو ينزل سهم 50% من مشتراك منت خايف .. لانك تستنى اعلان نتايج الربعيه للشركه ..
ليش 5% مناسبه لك؟ لانك ماتبي تراكض وتجيب عمال وتقابل محلات .. ولانك ماتبي تاجر وتبني وتطارد مستاجرين مادفعو !
لكن لاتنسى وارن بافيت وغيره ماتجرو الا من الاسهم .. فالله واعلم يمكن 5% تصير 10% او 20% خير وبركه
هذي الاسهم انا شفتها وعجبتني للمستثمر واذا احد عنده اسهم مهم تكون وزعت ارباح منتظمه اخر سنتين ثلاثه ومكرر ربحيه مغري
( الاستثمـار )
بنك اسم على مسمى وواضح انه صار اذا تبغا الاستثمار اشتر في الاستثمار ( والله اخاف يصير لا استثمار مع بنك الاستثمار)
سعر السهم للدخول ( 16 - 16.5 )
اخر توزيع ارباح 4% + 4.5% يعني سنويا 8.5% على سعر يعطيك عائـد سنـوي 5.2%
في السوق السعـودي عائـد جدا ممتاز ..
اخر سنتيـن الارباح مستقـره
اشـتـر ونم عليـه ..
( ينسـاب )
شركة قويـه اسهمها قليلـه وفي عز الفشل والخسارة في الارباح واخبار سلبيه رفضت النزول عن 39.8 وعلى قولتهم ينسـاب ماتنسـاب
سعر السهم للدخول ( من 42 وكل مانزل ياحظك شيل معاه )
موزع اخر سنه 10% + 12.5% يعني سنويا 22.5% يعني عائد سنوي تقريبا 5%
في السوق السعودي يعتبر عائد جدا ممتاز
اخر سنتين الشركه تمر بوضع سيئ وتوزع ارباحه من احتياطاتها .. وعلى قولة وارن بافيت استثمر في شركات قويه تمر بوضع سيء
عز مجدها كان 2018/2019 وزعت 40% -35% في سنه .. اذا نظرتك ايجابيه .. اذا سلبيه فأنت عايش فيها حاليا مع ينساب
اشـتر وتابـع اسعار بتروكيميكال في سوق العالميه ..
لنـا تكملــة ان شـاء الله مع بعض الاسهم الاسثماريه فقط ! لكن استبعدت بعض اسهم لان ماادري حسيت مافيها استمراريه في الارباح
وثاني شي اي هزه لبعضها ماعندها اي احتياطات تقول تقدر تشيلك .. وبعضها لقيت عائدها 4% من سعر السوق يعني يبيلها تنزل شوي عشان اتحمسلها
|
 |
 |
|||
 |
 |
||||
رد مع اقتباس
المفضلات