بسم الله الرحمن الرحيم ،، وسلام الله عليكم جميعاً
موضوعي هذا مجموعة رسايل وأقصد كل حرف راح ينكتب فيها ان شاء الله وتراكم منتم ملزومين بقرائة الرسايل وتضييع وقتكم ومن ثم الانبراش وأكيد راح تطلع أسماء جديدة أنبراشية تحت هذا الموضوع
الرسالة الأولى لشبيحة التأمين ،، الحقيقة لم أكن يوم أتخيل أني سوف أكتب عن شركات التأمين أو الرد على الاستفسارات عن شركات القطاع الماخوذ تحت مواضيعي ، لكن والله العظيم استفزني كثير ما يحدث في هذا القطاع واستفزني أكثر التكتل الجديد في القطاع وسحب السيولة من باقي قطاعات السوق والأكثر استفزاز هو ارتفاع المؤشر اكثر من 400 نقطة وبعض الشركات في القطاعات الأخرى أقل من سعرها قبل الهبوط وبعضها بالكاد تكون قريبة من سعرها برغم اني اليوم خارج السوق نهائي في انتظار جهوزية سهمنا الجديد ان شاء الله ، ومن خلال قرائتي لكثير من المواضيع في المنتديات وغالبهم متعلقين بالسوق سواء في أسهم تأمين أو غيرها ، وبالنسبة للأسهم الأخرى في الأساس تراوح مكانها اما التأمين فتدبيلات وتعليق المغرر بهم في قمم والمستفيد الأكبر الشبيح والمحافظ المهمة له فقط والباقي اما لبسوا طواقي واما كان ضحايا أرتفاعات شركات القطاع
لذلك وبعد تشكيل التكتل الجديد في القطاع واستلام محافظ كبيرة جداً بمئات الملايين ومن ثم توجيه تلك المحافظ لشركات التأمين مما يعني استمرار السلبية على باقي القطاع والهيئة لا حس ولا خبر فقد قررت كتابة موضوع كامل عن التأمين وسوف أقوم بمتابعة ونقل أخبار شبيحته أول بأول وسوف أذكر معدلات محافظهم الكبيرة والمهمة وخصوصاً أصحاب التكتل الكبير من اسيج ( اللي غبرتوا علينا فيه يعنني طلعنا من السهم يا قديم اعرف متى اخلي الناس تركب معاكم ومتى تكب عليكم وخلي شغل التغبير ينفعك ) الى بوبا الى ميد قلف الى بقايا اتحاد الخليج والصقر الى السهم الجديد في القطاع الخاضع للتجميع الى حالياً الى طريقة تصريف الصادرات ومروراً بشبيحة الخليجية وشبيحة وفا والعالمية وايس وغيرهم من شبيحة القطاع لأنهم بصراحة مصخوها زيادة عن اللازم واصبح موضوع القطاع يجلب الغثيان وسوف أكون ان شاء الله متابع لهم لحظي على حسابي في التويتر برغم اني هجرته من زمان ولكن سوف اعود له واقبل جميع طلبات الإضافة وهي أعداد كبيرة جداً ولله الحمد ،، واشوف كيف تقدرون تتنفسون بالقطاع من صغيركم لكبيركم ،،، وان شاء الله قبل منتصف الأسبوع القادم سوف تكون معلومات القطاع وشبيحته بين ايدكم جميعاً في أعمال الخليج فقط وبدقة لايتخيلها الشبيحة أنفسهم
مع الأسف منتديات كثيرة لو توقف القطاع حطوا عليها للتقبل لأن كل مواضيعها موجهة ومسخرة لقطاع التأمين وتصريف شركاته في القمم ! وبعض تلك المنتديات لو تكتب توصية على سهم غير قطاع التأمين نقز عليك المشرف وقال وين التشارت ولو سويت التشارت قالك ليه توصيتك ماهي مدعومة بمعلومة ولو رسمت التشارت وذكرت المعلومة قال ليش لابس ثوب سادة مو كبك !!! يعني مقفل موضوعك مقفله ، لكن يصير خير واشوف كيف تقدرون تصرفون من الأسبوع القادم ان شاء الله
واستغفرك ربي وأنت العالم غرضي من هذا
الرسالة الثانية لولد العم عبدالعزيز .. الحقيقة يا ولد العم مثل ما يقولون العتب على قدر المحبة وأني أستغرب المنزلقات الأخيرة اللي انزلقت فيها برغم ماشاء الله ولاقوة إلا بالله ذكائك وفطنتك اللي حباك الله فيها واللي عرفناك فيها ولا تخفى على أحد ولكن أن تستمال ممن هو أقل منك شأن بكل أمور الدنيا اما أمور الاخرة فعلمها عند ربي فهذي كبيرة يجب أن تراجع نفسك وتقف عندهاوقوفاً طويل وتسأل نفسك لماذا وصلت إلى هذا الحال ؟ شاهدت لك كتابات في منتديات أخرى وكنت أحزن من بعض الردود القاسية عليك من بعض أطفال تلك المنتديات ولكن لا أملك الحق أن أقول لك لا تكتب هناك وفي المقابل حين أجد التقدير والاحترام الذي تجده في أعمال الخليج من جميع الأعضاء أستغرب وأقول كيف لمثلك أن يستبدل الذي هو أدنى بالذي هو خير . وحذاري يا أبن العم ممن يريدون جرك للشللية هنا أو هناك فمتى ما جروك لذلك تأكد أن كتاباتك لن تكون لنفع الاخرين الذي نرجي منها وجه الله ، وستكون لإرضاء الذات والشلة فقط .
الرسالة الخامسة لعالم تويتر ،،، أتذكر زمان يوم كنا نروح لأرض الفسطاط مصر الحبيبة أسأل الله أن يولي عليهم خيارهم ويذهب عنهم الغمة ،، كان فيه شارع بالقاهرة أسمه شارع الهرم وهذا الشارع تجتمع فيه جميع الكابريهات أو ما تعرف بالمراقص الليلية وكان عند كل باب مرقص واحد لابس بدلة لماع وطاق كرفتة واصلة لين نص صدره وكل واحد قاعد يحرج على نمر المرقص ( النمرة عندهم يعني البرنامج اليومي للمرقص ) المهم تلاقيه هو وبدلته الترتر يصايح عند باب المرقص ،،، عندنا نجوى فؤاد والثاني عندنا سهير زكي والثالث عندنا كتوت الأمير ( الله يذكرك بالخير يا ابراهيم القصيمي تتذكر يا هيمة .. أنا كنت بحب المشمش ودالؤتي بموت بالمنجا ،، آآه يا منجا. ههههه ) وطول الطريق وهذا حال الشارع
طبعاً هذا الشارع يذكرني بأصحاب الحسابات على تويتر كل واحد مسمي نفسه بأسم رنان وقاعدين يحرجون بحساباتهم ،، عندي سهم تدبيلة والثاني عندي سهم فيه 50٪ والثالث عندي سهم 20٪ طبعاً وجه الشبه بين أصحاب الكبريهات أصحاب حسابات التويتر أن كلهم يبون يصطادون خرفان ويحرجون على المغريات اللي عندهم
قبل فترة قمت وسجلت خمس حسابات في شارع الهرم قصدي التويتر وقلت خلني أشوف وش عندهم وأقعد ألاعبهم المهم أول واحد أضفته رجال طاق صورته في حسابه والصورة الرجال ماسك طرف شماغه وساد وجهه ومو مطلع الإ عيونه يذكرني بالحريم إذا طلعو من عرس عقب الطقطقة كل وحدة سادة وجهها بغطوتها وتطل بوجيه السواويق اللي عند باب العرس تدور سواقها بينهم ! يعني ما أدري وش الحكمة من الصورة دامك مغطي وجهك ، المهم أضفت المليح وما حقرته وكل حساب أضفت فيه تقريباً 200 أسم وبعضهم مشتركة بين حساباتي وصرت أتابعهم وأشوف وش توجهاتهم وطبعاً ما يحتاج بعض الحسابات من غير ذكاء تعرف على طول مع أي شبيح يشتغل ، والمحصلة النهائية اللي طلعت منها أن النسبة الكبيرة منهم أم يحاولون جلب محافظ وأما يحاولون التصرييف عبر التوصيات على حساباتهم والذكي فيهم أو اللي يستذكي اللي يستخدم التحليل الفني للتصريف عند نقاط الدعم ووقف الخسارة يقولك شيل بسعر 52 وخلي سعر50 وقف خسارة طيب يالمليح اذا كنا 10 مشترين بسعر 52 وجينا عند وقف الخسارة وما فيها طلبات إلا 2000 سهم وحنا كمياتنا 15000 الف سهم وشلون نقدر نوقف خسارة ! يقول مو شغلي دبروا انفسكم كسرنا وقف الخسارة ودوروا احد يشتري منكم ، خير ان شاء الله اقعد صرف علينا والقلة من اصحاب الحسابات الله يجزاهم خير يدورون الأجر وخدمة اخوانهم المتابعين له .
وواحد حكايته طويلة بعدين نحكيها قاعد أسحب فيه على أساس أني غني وغبي وخواف وعندي محفظتي مع أخواني فوق 100 مليون والرجال أحس أن سعبولته بتطلع من شاشة الجوال ويقول أخ أخ يا شيخ ليتني عارفك يوم أمانة بسعر 42 كان دخلتك معانا !!!! شايفني شربكه غلام خان يالهيس الأربد ! لا يقرأ الموضوع ويصيدني ثم يشوتني من حسابه هذا لحاله فلم طويل إذا جت فرصة في موضوع ثاني نحكيها
الرسالة السادسة لمنتدى أعمال الخليج ،، بصراحة أعمال الخليج يذكرني بالزعيم مهما أعتزل أو راح منه نجوم ما زال يحقق البطولات ! اعتزل سلطان مناحي وناجي عبدالمطلوب وسلطان بن نصيب والزعيم يحقق بطولات اعتزل النعيمة ومنصور بشير وعادل عبدالرحيم وحسين البيشي ومازال الزعيم زعيم ! اعتزل الظاهرة الثنيان والأسطورة سامي ولايزال الزعيم يمارس هوايته بجمع البطولات ،، يعني مين ما راح ومين ما جاء يبقى الزعيم زعيم
وهذا أعمال الخليج يروح مين ما يروح ويجي مين ما يجي يبقى أعمال الخليج في الصدارة مع كامل الاحترام والتقدير لباقي المنتديات ،، وأقسم بالله قسم مسؤول عنه عند الله اني قبل فترة تقريباً مررت على صالة أحد البنوك المشهورة في الوساطة ووجدت أحد الشاشات الكبيرة في الصالة مفتوح فيها صفحة الأسهم لمنتدى أعمال الخليج ،، ووالله اني ازددت فخر أني أكتب في أعمال الخليج
وللمعلومية اتحدى أحد من الشبيحة أو كبار المضاربين يبدأ يومه بالتداول قبل ما يقرأ أعمال الخليج ، لأنهم يعلمون بثقل المنتدى وتأثير كتابه على الأقل في كثير من شركات السوق سواء بالتحليل الفني أو بالأخبار الحصرية أو بالمعلومة . والله لا أقولها مجاملة وحتى الأعضاء الذين أختفوا وكانت لهم صولات وجولات مازالوا يتابعون كل ما يكتب وكثير منهم يتواصلون معي على الخاص وبدون ذكر أسماء ، وعدم عودتهم للكتابة هي حرية شخصية لهم متى ما وجدوا الوقت المناسب أكيد راح يرجعون
يحزنك ان تشاهد بعض الاسماء التي كانت تكتب في أعمال الخليج وهي تنتقل من منتدى لأخر عسى ولعلى ان تجد من يتابعها وبالكاد تجد عدد الردود لايتجاوز 10 ردو وعدد المشاهدات لاتتجاوز الخمسمائة مشاهدة بينما حين كان يكتب في أعمال الخليج كانت الردود بالعشرات والمشاهدة بالألاف وبختصار أنه أعمال الخليج ياسادة يا كرام ،، حقيقة يجب ان يعلمها الجميع أعمال الخليج يضيف لك أكثر مما تضيف إليه فأن بقينا أو ذهبنا فسيبقى أعمال الخليج في الصدارة بسبب سياسة إدارته التي لاتجامل أحد على حساب سمعة المنتدى وأعضائه
قبل فترة تشكل قروب صغيرون في سهم من أسهم السوق الثقيلة نوعاً ما ، وكانت الفكرة بأن يقوموا بالتجميع في هذا السهم ومن ثم يعتمدون على التطبيل بمنتداهم وكذلك المنتديات الأخرى وبالفعل قمت بالمتابعة العشوائية فرصدت أكثر من 30 موضوع بما فيها المواضيع المكتوبة في منتداهم بقيادة المحللين الفنيين في المنتدى أياه ، وانتهت النتيجة لأربع أيام تداول أن السهم أرتفع 15 هللة ومن ثم زحلط عليهم السهم وخرجوا منه بخسارة
في المقابل أتذكر أحد الأعضاء في أعمال الخليج لا يحضرني أسمه وصى على السهم نفسه فأغلق السهم في اليوم الأول على النسبة القصوى بدون عروض وما انتهى الأسبوع إلا والسهم قد حقق أكثر من 30٪ من سعر توصية عضو أعمال الخليج ! إذاً الفرق واضح وهو أن التوصية والمتابعة كانت خارج أعمال الخليج
الرسالة السابعة ،، ظهر هنا مؤخراً جدل كبير بين بعض الأخوان حول التحليل الفني وهذا عادي يحصل في كل مكان وكل زمان وفي النهاية هي وجهات نظر تختلف من شخص لأخر منهم من يأخذ بالتحليل الفني ومنهم من له أدوات ثانية يكسب بها ، لكن الغريب ان تجد البعض يقول لك اذا لم تقتنع بالتحليل الفني فأني لن أكتب مرة ثانية !!!! سلامات يا أبو الشباب ! يا كلكم تؤمنون باللي قاعد أكتبه يا ماني كاتب ! أنت إذا مقتنع باللي قاعد تقوله ومؤمن فيه كعلم وش عليك من اللي مو مقتنع فيه إذا واحد أو عشرة أو ألف مو مقتنعين فيه أكيد فيه ناس ثانية مقتنعة فيه وأكتب عشانهم وللمعلومية أنا ماني مقتنع فيه عشان نكون واضحين مع بعض
كل هذا مو مهم ، الغريب يوم يجيك واحد ماشي طبلونه ويدخل بالموضوع ويقول اطلب من المحللين الفنيين عدم الكتابة بالمنتدى !! وأنت شكو يالحبيب ؟ اللي يسمعك يقول أن تاسي كان يشتغل صبي أو قهوجي عندك !
لا من واسعة الوجه يوم أكتب عن سهم أنابيب رافع موضوع له ماله لزمة غير دعاية لمدونة استاذه على قولته ويحذر من السهم بطريقة كنا نستخدمها أيام ما كنا ندرس بالمتوسطة والأخ ذاكر فيه اختفاء نسبة التملك لبابكر ، يعني ما عنده أبسط مقومات الشجاعة أنه يحذر تحت موضوعي ! لكن عندي الشجاعة أقولك دام عندك أستاذ فهذا يعني أنك لازلت تلميذ ومن الصعب عليك أنك تحط رأسك برأس الأساتذة يا تلميذ وخليك قارئ جيد عشان تقدر تتعلم ، وليتك بعد نجاح التوصية وريتنا طلتك البهية
يا شباب ما أظن أحد جاه انبراشات واستهزاء كثر ما جاني وبكل الأساليب وعلى العام وعلى الخاص وبالمجالس ! وصدقوني ما يزيدني إلا إصرار أني كل يوم راز خشتي في المنتدى واللي تعجبه مواضيعي يدخل واللي ما تعجبه المواضيع مالية المنتدى والأعضاء كلهم خير وبركة ، أنتم أرجعو لموضوع فيبكو وشوفوا الردود اللي فيه ! من فترة قاعد مع ناس وواحد يقول للثاني تصدق أني ما دخلت السوق من سنة ضربة فيبكو !! وجع وجع !! صارت ضربة فيبكو تاريخ ! يعني لا تستبعدون بالتقويم الجديد تلاقون سنة السبلة وسنة جراب وسنة فيبكو لاحظوا أغلب ردود المنبرشين لازم يذكرون فيبكو ! لكن غيرها أنسى يا أبو الشباب
وما أخفيكم حاط بتنبيهات قوقل بعض الأسماء اللي ممكن تعنيني مثل : شربكه وشربكة وفكفكه وفكفكة وشكشكة وفهلوة ومجموعة أسماء كثيرة على هالوزنية ، طبعاً السبب أني أشوف الحش اللي يجيني على تويتر وبالمنتديات الثانية ، أعملوا بحث بهذي الأسماء وشوفوا بأنفسكم أنواع الحش طبعاً أخوكم أقسم بالله يقعد يقرأ ويضحك وكنهم يمدحوني ما يحشوني ، ولو الواحد بيعطي بال لكل ما ينقال عنه كان اعتزل الكتابة من زمان لذلك اللي مؤمن ومقتنع فيما يكتب لا يلتفت عن ما يقال عنه ويجعل أجره على الله فما عندةالناس ضائع وما عند الله باقي
الرسالة الثامنة ،، للحلوين اللي يراسلوني على الخاص ،، شباب اللي يحاول يستذكي الرجاء ثم الرجاء يريح نفسه من اللف والدوران وتأكد اني بفضل الله اعرف كل واحد وش يبي من رسالته ومر على رأسي أشكال وألوان من البشر ، والطرق اللي البعض يستذكي فيها اليوم ترانا خلصنا منها من يوم كنا تلاميذ بالمدرسة ، لذلك وفر على نفسك كتابة رسالة تبي توصل من وراها لشي ، والغريب والعجيب أن واحد من اللي راد تحت موضوع أنابيب ويستهزي من خزعبلاتي سبق وأرسل لي على الخاص يقول أن فيه جماعة يبون يتواصلون معاك !! ورديت عليه وقلت اللي يبي يتواصل معي حياه الله عن طريق المنتدى واذا مو مسجل فعن طريقك ، دامك تعتبر اللي اكتبه خرابيط وشلون قبلت على نفسك أنك تصير مرسول الحب ، شفت أنك ما زلت تلميذ وصغير ! روح علم ربعك أنكم مكفوشين وردي هذا عشان توصلك وتوصل غيرك الرسالة . هذا الشخص مثل للي يستذكون على الخاص والعام ، تأكدوا من فضل الله أني أعرف كل واحد من كتاباته وان كان تواجدي بالمنتدى قليل لكن ولله الحمد اقدر أميز كل واحد والغرض من كتاباته هل هو شبيح أو مع شبيح أو انسان عادي يكتب عشان يفيد أو يستفيد طبع اتكلم بصفة عامة عن جميع المنتديات بدون تخصيص حتى لو كان يكتب بأكثر من معرف .
نطلع من موضوع وندخل بموضوع
من يومين دخلت اقرأ الردود تحت موضوع أنابيب إلا وأشوف العطوف بالتوقيف ! والله ان عيوني أدمعت من الضحك زاد من دخلت موضوع المتابعة وحاس أني داخل البحرين بالويكند مو موضوع متابعة ! ما قلت لك يالعطوف لا تماشي الرجال تراه راعي تتن ويسمع بشتختة ! وهذي اخرتها دخلك التوقيف عموماً إذا طلبوا منك كفالة تراني جاهز يا أبو شوق هههههه
وقبل ما اختم يشهد الله أني ما كتبت اللي كتبته إلا من تلقاء نفسي والموضوع في بالي من فترة لكن اليوم كنت فاضي قلت خليني أزرق فيهم في بداية إجازة نهاية الأسبوع عشان لا يزعل علينا انفو وخشمو ويغفر لنا أن الموضوع بالاجازة
واسف على الإطالة ! داري بتقولون من متى قد كتبت موضوع قصير وحتى وأنت توصي على سهم تكره أهلنا بالسهم بسبب القرقر ، عادي يا شباب ولجل الورد ينسقي العليق والمعذرة من الأخطاء في الكتابة
ويا مضارب محترف مثل ما يقولون لأجل عين تكرم مدينة ولأجلك ما تطرقنا للمنتدى اللي أختفى من الرادار والله الهادي والمصلح
وفقكم الله
المفضلات