بسم الله الرحمن الرحيم ،، وسلام الله عليكم جميعاً
أولاً اخواني واخواتي بطبعي ما احب افتح موضوع جديد قبل استكمال الردود على الموضوع الاخير ومن ثم إغلاقه . لكن بحكم ماحصل للسوق الاسبوع الماضي ولعدم وجود الوقت الكافي اللي يخلينيى اقدر اقوم بالرد على الموضوع السابق اضطريت افتح موضوع جديد ، والعذر والسموحة يالربع وان شاء الله متى مالقيت الوقت راح ارد على الموضوعين
نطلع من موضوع وندخل بموضوع
راح ان شاء الله الخص لكم أسباب النزول اللي صار بنقاط
السبب الأول : كنت والا مالبورو ذكرت في موضوع القصيم الزراعية أن محافظ خرجت من السوق لاسباب سياسية . وبعضهم بسبب الاقتصاد العالمي والاخيرين ما عندهم سالفة وخصوصاً اللي يبعون بالأسهم الدفاعية لكن صارت موضة ! وبعضهم خرج من السوق بسبب شائعة ان أرباح البنوك دون المتوقع ! وقد تكون هذي الشائعة صحيحة ولكن لا أملك المعلومة حيالها .
وقبل ما اطلع من هذي الجزئية بالتحديد . في النزول السابق عندما كان المؤشر قرابة 7800 كان كثير من الاخوان يعتبون على اخوكم انه حذر بعض الأعضاء على الخاص وطلب منهم الخروج من السوق ولم يكتب على العام ورغم والله الذي لا إله إلا هو ان الاعضاء ما يعرفوني ولا اعرفهم الا من خلال المنتدى ومافيها محابة لأحد وان كان بعضهم اعرفهم ويعرفوني زين خارج المنتدى واعرف انهم اصحاب المعرفات اللي بالمنتدى والمشكلة وهم يراسلوني خذ يا مدح فيني وإذا اجتمعنا خذ يا حش فيني طبعاً حش بصاحب المعرف ! نرجع لنقطة العتب . مع نزول المؤشر من 7800 ذكرت بموضوع توضيحي عن السوق ان فيه محافظ استثمارية كبيرة خرجت من السوق وذكرت بأن الشبيحة كلهم داخل السوق وتكرعنوا وهذا صحيح ومن خلال المداخلات والردود كان ردي على البعض من الأفضل توفير سيولة إلى 60٪ وكلامي موجود بالموضوع المذكور وتقدرون تتطلعون عليه ، هذا يعني ان التحذير كان للجميع ، لكن من الصعب أنك تقول السوق خروج أو دخول إلا إذا كنت صاحب السلطة على الصناديق الحكومية والشبه حكومية في السوق .
اللي خلاني اذكر هذي الجزئية وارجع للوراء اني ذكرت بموضوع القصيم ان فيه محافظ قاعد تطلع من السوق وفيه واحد عنز قاعد يحاول يضرب سابك للأسفل ! وما وصلني بعد الموضوع الا رسالتين من مجموعة كثيرة من الرسائل اصحابها ذكروا ان هذا يعني ان السوق راح يكون فيه نزول أكثر وفهموا هذي الجزئية ، وكنت وصيت على سهم في الموضوع اللي قبل السابق ولله الحمد مع كل النزول اللي حصل السهم اعطى جيداً وراح يعطي ان شاء الله
الشاهد من الموضوع واللي معطيني وجه ويقرون مواضيعي لازم يتابعون الردود على الاخوان لأن احياناً يكون فيها تفصيل للموضوع نفسه . نستمر في اسباب نزول السوق
السبب الثاني وهو وجود شبيح حكومي سابق كان محسوب على أحد رجالات الدولة حاول التملق لأبو متعب حفظه الله لكن طويل العمر عارف ان هذا الشبيح ما يسوى ملا بطنه وانه مرتزق كبير لذلك مثل ما يقولون بالشامي أبو متعب حفظه الله حلق لهذا النكرة ومسكه الدائري الجنوبي والنكرة حط حرته بسابك شيل وضرب في السهم لانه يعرف ان السوق المؤشر وسابك المؤشر ، طبعاً ضربه بمناسبة اليوم الوطني والمرة الأولى في بداية سبتمبر بسبب وصوله خبر خلك ببيتكم أبركلك ، وكان واضح من ردود بعض الاخوان على موضوع القصيم معرفتهم بهذي الجزئية وهم الاخوان بركان وابو رش رش
السبب الثالث دخول شبيحة مع شبيحة بدون تنسيق بشركاتهم وبكميات كبيرة ومع أول هزة للسوق اشتغلوا ضرب بالشركات للخروج بأسرع وقت وتسببوا بنزول تلك الشركات بشكل مبالغ فيه ، مثل المعرفة والقصيم الزراعية برغم وجود سبب ثاني بنزولهم وهو ان ناس سحبت من ناس وراحت لناس
الاخوان اللي يقولون بسبب الاسواق العالمية والوضع الاقتصادي فهذا الكلام غير دقيق لان الاسواق العالمية سجلت هايات سنوية وسوقنا قاعد يفاحط 200 نقطة طلوع ومثلها نزول هذا يثبت ان سوقنا شغال بكوكب ثاني ، واليوم لو أي شبيح ضرب سهمه نسبة تحت جابلك السوق على منكس قرونه ، واكبر مشكلتين عندنا ان اغلب المضاربين يشترون على مبدأ العلبة والطباقة ! تتذكرونها ؟ وهو انه يشتري على الدعم ويبيع على المقاومة سواء للمؤشر أو للسهم وهذا بحد ذاته مشكلة ويجعل المؤشر والسهم يقعد يحوم عند المقاومات فترة طويلة . والمشكلة الثانية ان فيه ناس عينها على المؤشر من يوم يصير المؤشر أحمر باع ماركت بدون النظر لوضع شركته . طبعاً المشكلتين هذي سببها عدم الثقة بالسوق
لكن تأكدوا ان فيه شركات تحت التجميع من فترة والنزول الاخير كان افضل فرصة لهم لشراء المزيد من الاسهم يعني من المهم الفترة القادمة متابعة شركتك أكثر من المؤشر والابتعاد عن الشركات المتهالكة مالياً خصوصاً مع قرب إعلان النتائج والابتعاد عن الشركات المتضخمة واخص منها اللي ارتفت بفترة وجيزة والأهم الشراء على دفعات وتوفير جزء من السيولة لا يقل عن 30٪ بعد الانتهاء من الشراء حتى يتم اعلان النتائج كاملة
ونصيحة للاخوان اللي يشترون بالقطاع الماخوذ ودام الله بلاك فيه حاول انك بعد ارتفاع سهمك أكثر من 20٪ بيع كمية رأسمالك بالسهم وابقى بالربح ودور فرصة ثانية أفضل
نطلع من موضوع وندخل بموضوع
طبعاً أحياناً تستغربون ان فيه شركات عدد أسهمها قليل ورابحة واسعارها رخيصة طبعاً مقارنة بشركات التأمين ! يعود السبب غالباً ان بعض اصحاب المحافظ الكبيرة تجيه توصية على السهم ويشيل بالسهم كميات كبيرة جداً بالنسبة لعدد أسهم الشركة مثل ما صار معاي وصيت واحد من الاخوان على شركة صغيرة وبعد كم اسبوع كلمني يقول يا اخي شركتك مثل وجهك طبعاً من زود الاحترام ! تطلع ريالين وتنزل ريالين وما تحركت .
طبعاً اخوكم على نياته قال ماهي مشكلة انتظر بالسهم ، قال يا اخي مجمد بالسهم سيولة كبيرة ! قلت ليش أنت كم سهم ماخذ ؟ قال اخذت 280 الف سهم !!!! قلت قول قسم بالله ، قال قسم بالله ! قلت احلف مرة ثانية ! قال قسم بالله وش فيك انهبلت ! قلت ألحين أنت شبيح السهم وإلا داخل على توصية ؟ لعنبو بليسك يمكن الشبيح بنفسه ما عنده بمحفظة وحدة هالكمية ، أنت ما تدري أن اغلب الشبيحة يتعاملون مع بعض قرود تداول أقول بعض قرود تداول ومن يشيل واحد سهم معاهم يرسلون مسج للشبيح فلان اشترى كذا وفلان باع كذا يعني من عقلك ان الشبيح راح يرفع السهم وانت شايل هالكمية ؟ الله يصلحك خفف كميتك واعتق السهم لوجه الله وارحم اللي فيه لان الشبيح ماراح يحرك السهم وفيه محفظة غريبة عندها هالكمية ، واسئلوا راعي نماء ليش جمد السهم وتركه للسوق
واخيراً كالعادة اسف على الإطالة ، والسوق فيه شركات كثيرة فيها خير ان شاء الله لكن احسن الاختيار
اخواني على الخاص متى ما وجدت الوقت ان شاء الله راح ارد على الجميع وما راح أهمل رسالة
وفقكم الله
المفضلات