بسم الله الرحمن الرحيم ،،، وسلام الله عليكم جميعاً ،،، وكل عام والوطن بخير
دخلت اليوم المنتدى ولقيت النفسيات ماهي اللي نبي !! حتى بعض الشباب اللي كانت نفسياتهم هادية صاروا معصبين يا دافع البلا ، والله قاعد اقرأ لبعض الاخوان وعيوني مدمعة من الضحك والله معاكم حق لكن شر البلية ما يضحك ،، ومو باقي إلا كاترينا اللي الوحيد للحين مقاوم وكاتم غيظه واحس أنه يكتب وهو عاظ لسانه كنه حسين عبدالغني إذا بغا يكسر لاعب ! ولو أحد ينشب لكاترينا شوي ممكن يطقها بكوة من القهر
نطلع من موضوع وندخل بموضوع
يا شباب بالنسبة للي قاعد يصير في سوق الأسهم واللي اخرتها مهزلة شركة المعجل فهناك توجيهات عليا بالمتابعة لشركات السوق وكذلك عدم إعفاء هيئة سوق المال من مسؤوليتها تجاه ذلك وإن شاء الله تكون النتائج ممتازة ومن صالح المستثمرين في سوق الأسهم في القريب العاجل .
نطلع من موضوع وندخل بموضوع
وصلتني رسالة من أحد الاخوان يطلب فيها توضيح بخصوص سهم القصيم الزراعية ويكون التوضيح على العام لأن فيه اخوان غير مسجلين في منتدى أعمال الخليج ويملكون في السهم ويبون يعرفون وش اللي صار بالسهم
ذكرت في موضوعي قبل الأخير أن مرسي قام بإنقلاب أبيض على سعادة المشير ،، والأيام الماضية أخرج مرسي أغلب محافظه من القصيم الزراعية وبكميات كبيرة جداً ووجها لشركات ثانية راح نتطرق لها إن شاء الله في موضوع ثاني ، وما زاد الطين بلة مثل ما يقولون هو ما تم إثارته عن الشركة ومشاكلها مما دعى بعض أصحاب المحافظ في السهم يطلبون إخراج محافظهم حتى ولو بخسارة
ولكن ما يهمنا في هذا الموضوع أن سعر السهم اغلق اليوم عند سعر كسر العظم بالنسبة لسعادة المشير وأي نزول قادم راح يكون خراب بيوت لسعادة المشير ومن معه ، لكم أن تتخيلوا ان هناك محافظ بكميات كبيرة لها قرابة السنة في السهم عند سعر اغلاق اليوم والسهم ذهب لبحر الثلاثينات ولم يقوم بالبيع وبعد سنة يعود السهم لسعر شرائهم !!! يعني تيتي تيتي مثل ما رحتي مثل ما جيتي !!! وسنة راحت على الفاضي !! والأدهى والآمر ان هناك محافظ كبيرة تم أدخالها بالسهم بجميع الأسعار فوق 22 ريال إلى 28 ومازالت متكرعنة بالسهم زي اللوز
نجي للمهم وهو أن السهم أمام أمرين إما أن يضحي سعادة المشير بالسهم ومن فيه وهنا ممكن نشوف السهم تحت 10 ريال لا سمح الله ، وموضوع التضحية صعب جداً لأن أصحاب المحافظ لهم وضعهم وممكن يكرعنون المشير من قراعيبه لو سواها .
والأمر الثاني وهو أن المشير لم يبقى له أمل بعد الله سبحانه وتعالى في البقاء في السوق إلا من خلال هذا السهم وهو بمثابة التحدي وأثبات الذات ، وهو الأقرب واتوقعه . طبعاً الموضوع توضيح فقط لأحداث السهم
نطلع من موضوع وندخل بموضوع
طبعاً لا يخفى عليكم بأن هناك محافظ استثمارية كبيرة خرجت من أسهم ثقيلة بسبب الأوضاع السياسية ولعبة أمريكا وإيران وهي التي أثرت على السوق الأيام الماضية ، ولكن الشبيحة مازالوا بأسهمهم وعلى العكس فقد قاموا بفتح مراكز جديدة في بعض الشركات وسوف نأتي لهم لاحقاً إن شاء الله إذا ما تحركوا يوم الأثنين وخلوا الناس تستانس وإلا سدحناهم بالتفاصيل
نطلع من موضوع وندخل بموضوع
استغرب من البعض اللي ناشبين لولد الشيوخ ولاحقينه من سهم لسهم !! راح لنماء وعينك ماتشوف إلا النور أنواع المحافظ وراه ! راح لأمانة ونفس الشي ! راح لعناية وهاتك يا مسابق وراه ! وراح للخليجية معليش يا حبيبي حنا معاك ! راح لولاء والشباب هاتك يا ركضي عشان يلحقون !!!! يعني وين تبون الرجال ينحاشله ، اتركوه يتنفس ويحرك كم شركة عشان تتحرك معاه الشركات مثل ما صار بعد بروج ، عموماً الرجال يجمع بسهم بهدوء وواضح أنه مو مكشوف بهالسهم لأن لليوم ما دخل معاه ملقوف ، ووالله وتالله وبالله ما راح أذكر السهم لا على العام ولا على الخاص لأن السهم غير تأميني ولله الحمد وارتفاعه راح يخدم قطاع كامل .
نقطة ختام : يقولون الباص فيه فزة الموت عساه يغير نفسية بعض الشباب
وفقكم الله
المفضلات