المشاركة الأصلية كتبت بواسطة شربكه
بسم الله الرحمن الرحيم , وسلام الله عليكم جميعاً
كل عام والمسلمين والعرب في كل مكان بخير , وكل عام وشبيحة سوقنا اللي يكسبونا بعد الله بخير
اشكر جميع من سئل عني سواء بريدياً أو هاتفياً أو بعت تلغراف
مع الاسف كنت الفترة الماضية بعيد عن السوق وماكان فيه أي جديد وكان السوق ضعيف وغير مغري إلا من كم شركة ما تسوى الواحد يتابع السوق علشانها رغم ان صارت ارتفاعات بالمؤشر زينة وماهي زينة لأن اللي استفاد منها القطاع الماخوذ وباقي القطاعات فاتحة فمها وتتفرج عليهم وتتحسر على نفسها ! قال تحليل مالي قال ! دارهم ما دمت في دارهم
موضوعي هذا أول شي وأهم شي أني اسلم على الجميع بعد انقطاع بسبب بعض المشاغل ومثل ما ذكرت ان السوق بالنسبة لي ما كان مشجع ولليوم , وثاني شي تطمين لبعض المتعلقين في بعض الشركات اللي يملكون فيها يعني مو لفتح مراكز جديدة
يمكن الحدث الأهم في الفترة الماضية هو الإنقلاب اللي سواه مرسي على القائد الأعلى للمجلس العسكري سعادة المشير وقلبه من مشير إلى وكيل رقيب ! فبعد ما ساعد المشير الأخ مرسي في الثورة على السوق وشاف مرسي أن وضعه تحسن وكون قوة مع بعض الاخوان من الشبيحة حسبها بينه وبين نفسه وقال انا اشتغل واخرتها الصيت للمشير ! لا ياحبيبي لازم اصير بالصورة واثبت أني أنا الاساس وفعلاً سوى عليه إنقلاب وسوى تحالفات جديدة ومثل ما يقولون الرزق يحب الخفية . ما علينا الله يستر على الجميع وخلونا نشوف وش عند بعض الشركات
بتروكيم لعنبو بليسه دورت عليه بجميع القوائم عند المتخصصين من المسلمين في إجازة الشركات وحتى بقوائم بعض القساوسه وما لقيت أحد محلل السهم أبوه من سهم طلع أبن ستة وستين حرام ما أدري وش مسوي ؟ ومع ذلك فيه شبيح من العيار الثقيل ناوي فيه نية لكنه انشغل من كم يوم بسهم المملكة استغفر الله هذا الشبيح لاعب لعبته مع الحرام شكله هو وأبليس متصادقين ومتقاطين باستراحة وحدة ومظبطله أموره ! ما علينا من الناس ومثل ما اتفقنا من البداية الكلام للمتعلقين وخاصة بهذا السهم نقول لهم أتبعوا قول الله تعالى ( وإن تُبتم فلكم رؤوس أموالكم ) فإذا وصل لسعرك والمتوقع بين 27 إلى 30 ابحث عن الطيب من الرزق
اللجين الأخ اللي فيها مكتوب بدفتر العائلة العلامة الفارقة (نجس) فهو من النوع اللي يترك السهم يجاري السوق بالارتفاع وإذا وصل سعر عشرين يجيك الضرب والدبج من كل مكان وصارله بالسهم سنين طويلة شغال على نفس الوضع وما أظن يغير أسلوبه حالياً
نماء طبعاً الأخ اللي بالسهم مافي واحد بالسعودية ودول الخليج ما درى أنه بالسهم ! وما فيه شبيح إلا وماخذ كمية كبيرة ومتقفيه بالسهم ! يعني ما قدامه إلا يضحي بالسهم ويقبل بالخسارة ويدور غيره وبسرية أكثر أو أنه يضف كامل أسهم الشركة ويطامر فيها غير كذا السهم راح يكون حبة فوق وحبة تحت وتضييع وقت
المتقدمة الشبيحة اللي فيها معدلاتهم 24 تقريباً وهدفهم ماهو بعيد عن اغلاق الأربعاء وعلى قولهم بين 30 و 32 راح يتخارجون من السهم
كيان صناديق البنوك والمحافظ الخاصة شغالة ليل ونهار تجميع بالسهم والدعوة ماهي شغل شبيحة شغل ناس ما تدخل بالسنة إلا مرة وحدة وضاغطينه عشان ما يتنفس
بترو رابغ خلوها تولي سوت اللي عليها هي كل كم شهر تطلع 9% وترجع لفترة سبات وشف عاد متى يتحرك مرة ثانية . خلونا نستفزهم
اسمنت حائل الشبيحة عبو محافظهم بين 17 و 18 وشغالين تسحيب بالسهم ولا من شاف ولا من درا لكن وين النية الله اعلم لأن ما وصلني هدف تقريبي للسهم وياليت من عنده علم يفيد اخوانه
اسمنت الجوف وعدونا بالعشرينات لكن طلعوا خرطي وعلى العموم مازالوا بالسهم نراقب ونشوف اخر خراطهم
الغاز الأخ اللي نتفو منه مبرد بسعر 15 دخل السهم وعشعش فيه وكل ما قابل واحد قال له وش رأيك بالسهم شفت وشلون مسيطر على السهم وما تأثر بالنزول السابق !!! من صدقه يتكلم ذا الشبيبيح هو السهم طلع أساساً عشان ينزل ؟؟؟؟!!! من يوم اكتتابه وهذا سعره
الغذائية مافيه جديد دام السامج مازال بالسهم ويمكن التغيير اللي صار برمضان ان كم شبيبيح دخلوا السهم وتعلقوا ويدورون النحشة من السهم ولحقهم قبل كم يوم كم هويمر لكن ما أدري بتنسيق أو درعمة ودخلو معاهم بشبه تعليقة إذا ما تحرك القطاع وفكهم
أنعام طبعاً ما يحتاج ماركة مسجلة لاخونا معلومة (أبومحمد) لكن السؤال يا أبومحمد لو وافقت الهيئة على رفع رأسمال الشركة وش الجديد ؟ قرمبع بقرمبع
القصيم الزراعية وما أدراك مالقصيم الزراعية هذا السهم اللي بقى للمشير بعد ما عزله مرسي وشكل المشير راح يسوي فيه ثورة يستعيد فيه أمجاده ومتحفظ جداً لدرجة أن جته خمس محافظ ومن حرصه عليهم نادى عوض وقال له ياعوض الله يستر عليك خذ الاخوان وافتحلهم محفظتين ببنك الدم وثلاث محافظ بالبنك الزراعي , والله يخارجنا من اللي يتابعون المحافظ !!!
جيزان انتهت الترتيبات على السهم واصبحو جاهزين لفك التعليقة لكن ما أدري إذا كان إلتون داخل معاهم بالترتيب أو .. لا
عذيب هالشبيح ما عنده سالفة يوم درا أن شبيح المتكاملة ناوي يطير بالمتكاملة أخذ عذيب وقال امشي هذي مع هذي واخرتها شوط بقرة وطلع اغلب محافظه من السهم بعد ما فاحط وغبر علينا وخلانا نقول الله يعين عسى نلحق ناخذ من أول نسبة فوق ! أقول الله يصلحك خلك بزراعيك وعساك بحملك تثور
المتكاملة بصراحة لعب عليّ رغم أني غردت فيه ووصيت عليه بسعر 18 ما ادري 19 وقلت نبي نطلع حق السفرة والسمبوسة والفيمتو منه قبل رمضان رغم أني ما أحب السمبوسة لكن عشان الأهل لكن مللني وانحاش وخلاني والعجيب أن الأخ مازال بالسهم وشال زيادة وما أدري وش النية لكن نقول ان شاء الله يفك المتعلقين
المصافي الخال مازال مصر على التدبيلة من سعر 70 وذاك اليوم قابلته واستفزيته وقعد يحلف لين طلعت عروق سنادحه ورقبته كنه عامل شايل فوق رأسه ثلاجة . ويقول تشوف والشاشة بينا , لكن كل مضارب له اسلوبه! تكفى خف علينا يا وارن بافيت , بصراحة الخال من شفته يروح للأبل بعز القيظ وأنا حاس أن الشمس عاملة عمايلها معاه , وبعدين ما أدري وش معجبهم بالبعير هو براطمه ومطير عيونه بالسماء كنه خبل , أمريكا أرسلت مسبار للمريخ وهذول جيب الشعير رد الوايت . لكن الله حق الخال راعي فزعات وياما استدعوه الشرطة بسبب كفالات اصحابها ما سددوا اللي عليهم يعني راعي فزعة وان شاء الله تكون الشمس ما أثرت على الخلايا اللي برأسه اللي فيها مركز التحكم في أهداف السهم
عسير تفركشت المجموعة اللي بالسهم من بركات أبو راشد
الباحة صار فيها تعاون شبيحة جيد ومجموعة منهم تخارجوا من السهم يوم الأربعاء والمجموعة الثانية باقية بكمياتهم والغريب أن راعي الدلة كل يوم واحد رادفه بسهم ومطلعه بخسارة وبصراحة ودي أقعد معاه واشوف وش يحس فيه أو وش نوع الأكل اللي يأكله ! لكن السهم أظن اللي يشتري فيه بهذا السعر أحس أن برأسه فتق أكبر من فتق طبقة الأزون رغم أنهم يحرجون على السهم ويقولون الوعد 40
الصادرات بصراحة المطوع واللي معاه أبدعو فيها واستفاد وفاد من السهم ومازالت عنده كميات جيدة بالسهم ويحاول يطلع من السهم بنظام التطبيل لأن عنده سهم بالقطاع الماخوذ ومنتهي تجميع ولو قال راح يدبل فيه خمس مرات راح اصدق والأخ حريص جداً جداً أن ما أحد يعرف السهم ويمكن الكميات الباقية خارج محافظه ما تجي 2 مليون سهم قيمتها أقل من 80 مليون ريال والرجال حريص أنه يخلي مؤشراته الفنية سيئة عشان ما يبلشونه حقين التحليل الفني ويقعدون يتميلحون ويوصون عليه , وبصراحة لو لي بأسهم التأمين كان حطيت ما وراي ودوني بالسهم وبعت البيت والسيارات وحطيتها بالسهم ورحت سكنت بالريفيرا وقعدت أكتب مذكراتي أيام البديعة ومثل ما قال ما أدري مين : قلوا علامك تزور حي البديعة كل يوم .. قلت السبب صاحبي الله حسيبي عليه
وقمت أكتب مذكراتي مع رفقاء الدرب اللي كل واحد فيهم حياته ملحمة تاريخية تستحق الوقوف عندها أمثال جلوف والدغبجي والجرادة والزرادية وخصوصاً الزرادية هذا واحد من الشباب حضرمي جانا من جدة وسكن الحارة معانا , ومسمينه الزرادية لأنه إذا سلم عليك وضغط على يدك لازم يكسر واحد من اصابعك من شدة الضغطة وما شاء الله عليه الوحيد اللي مشت أموره من الشلة وصار تاجر مواد بناء كبير واعتقد الوحيد من السعوديين اللي ما دخل سوق الأسهم لليوم وكنت أحاول أقنعه يدخل السوق وكل ما جبتله طاري الأسهم قال ( إذا أنت أمير وأنا أمير مين يسوق الحمير) ما أدري وش دخل أم المثل بسوق الأسهم ! أساساً من عرفت الزرادية وهو حافظ هذا المثل ومثل ثاني يقول ( اللي اخذته القرعة تأخذه أم شعور ) والمصيبة موظف المثل الثاني بكل شي ويستخدمه في غير مكانه الصحيح ويقول الزرادية الله يذكرها بالخير خالة فريال جارتنا بجدة تعلمت منها هذي الحكمة وصارت ناقوس بحياتي ! أمحق من حكمة هو خالته فريال
حنا طلعنا من موضوعنا لكن لعلنا في موضيع لاحقة إن شاء الله وكان عندنا متسع من الوقت نتكلم عن الدغبجي وعن مناقبه والمقولات اللي اشتهر فيها وذهبت فيما بعدأمثالاً , المهم راعي الصادرات ناوي سهم تأميني الله يغنينا بحلاله عن حرامه , لكن الله يهديه ويشوف سهم بغير هالقطاع الماخوذ عشان نعشت معاه
صدق يقولون مرسي عنده محافظ فوق 24 مهمة وناوي يطلعها من السهم .
التعمير شبيحه قاعد يأدب سهم تأميني حشره اليوم للنسبة تحت ويقول أنتظروني
مدينة المعرفة بالطيب بالقوة بالمذابح بالمجالد لازم يوصلونه 23 والا يطلع المشروع عليهم بخسارة وترى 23 تعتبر رأس برأس ويا دار ما دخلك شر
الجماعي , إلتون لعب لعبته يوم الثلاثاء والأربعاء وطلع محافظ تهمه وكالعادة ممكن سيناريو جيزان يوم كانت بالثلاثينات يتكرر مع الأخوان بالسهم وصورة طبق الأصل حتى بالأعذار ! وبعض محافظه فيها الجماعي والطباعة والتغليف وخسرانين بالجماعي ورافعلهم الطباعة عشان هذي تشيل خسارة هذيك ! يا شطنو إلتون ذهين ! ولا تستغربون إذا قعد ينب عليكم ويعزمكم على الطباعة والتغليف ويقول الوعد 40 والله يكثر الخرفان بالبلد لأن الحج قرب ونحتاجها للضحية
مبرد إذا قدر يخارج نفسه من السهم فوق 60 يعتبر فنان مع مرتبة الشرف الأولى للشبيحة
تهامة المهبول يقول 150 بلا هبال اللي كسبان السوق مليان فرص كثيرة مثل أمانة ومبرد
شمس أبو ضروس مسكين عليه الهيئة الله يقويهم كم محفظة وورط بعمره
طبعاً ما ذكرت كل الشركات وحاولت اختصر ومثل ما قلت الموضوع للمتعلقين والمراكز الجديدة نحاول ان شاء الله نفتح لكل سهم موضوع مستقل
المعذرة يا اخوان اذا ما قدرت ارد على مداخلاتكم بسبب بعض المشاغل لكن أحاول ان شاء الله الرد مع أول فرصة
نطلع من موضوع وندخل بموضوع
بالنسبة لحسابي بتويتر فأني لن اغرد فيه الفترة القادمة والكتابة من خلال المنتدى فقط لسببين.
الأول أني راعي قرقة وشغل كم حرف ما يخارجني ولا يقعد رأسي
والثاني لأني سئلت أحد المختصين وقال لي أن أسهل شيئ اختراق حساب التويتر ودريت أن ممكن أي أحد يعطي بنغالي 10 ريال ويجيب خبر الحساب و20 ريال ممكن يخترق البنتاغون ويمرر مكالمات على سنترالهم . والله البنغالية عندنا لاعبين لعبتهم بدون حسيب أو رقيب أول
وبالنسبة لبعض حسابات تويتر واللي تحمل اسم شربكة أو اسم مضاف إليه شربكة لا تعنيني لا من قريب ولا من بعيد غير الحساب اللي يعرفونه بعض الاخوان فقط لا غير البتة
مثل ما قلت الأساس بالموضوع السلام عليكم وان شاء الله لنا مواضيع قادمة جديدة , وتوصيات نحاول التعويض فيها بعد إرادة الله سبحانه وتعالى
نطلع من موضوع وندخل بموضوع
متى ما شفتوا الشبيح طاق صورته بأي وسيلة تواصل إجتماعي وهو مفرع رأسه وجايب شعره على جنب ويناظر نظرة كني ما أدري أن أحد يصورني , ادروا أن الشبيح يدير محافظ نسائية , هذي خلوها قاعدة عندكم
قبل ما اختم موضوع الأسهم شبيح الدرع العربي يقول جمل الله حالكم
نطلع من موضوع وندخل بموضوع
يوم الجمعة بعد الغدا قولوا وش يدرينا متى معاليكم يتغدا ؟ أقولكم قمت من الغدا الساعة 2 الظهر بالضبط وعلى بال ما غسلت وقعدت قولوا خذت المسئلة ربع ساعة بعدها قمت اقرأ التغريدات على الجهاز عندي , طبعاً أخوكم ضايف عنده أكثر من 600 مغرد بين افراد وقنوات وهاشتاقات وخرابيط من شرقها وغربها اتسلى فيها اذا كنت فاضي أو انتظر دوري عند حلاق او زحمة عند إشارة المهم لتضييع الوقت والاستفادة احياناً , المهم وشوي إلا والعنز مجتهد بدأ ينعق , طبعاً الوضع طبيعي أنه يناعق طول السنة لكن اللي مو طبيعي أن نعقته تطلع بحساب قناة الميادين المجوسية بنفس الوقت !!!!!!!! وما طلعت ريتويت طلعت وكنها صادرة من نفس حساب الميادين وقمت اشيك المضافين عند العنز مجتهد وما لقيته ضايف الميادين واشيك الميادين ولا لقيتهم ضايفين العنز مجتهد , طبعاً العنز مجتهد واصل النعيق لكن الميادين ما طلعت عندها إلا النعقة الأولى . تقولون وش تبي توصله ؟ أقولكم
حساب الميادين غير موفقين معاي ابداً وحظهم ماهو حلو معاي لأن قبل فترة وأنا اتابع حسابهم إلا وشوي وتطلع تغريدة من الحساب تقول أن على سطح الخزان فيه شخص معاه مضاد طائرات وبلغوا الطيار , طبعاً انقلب رأسي وش الموضوع المهم شوي وتنسحب التغريدة ! وشوي إلا وتجي تغريدة يعتذرون فيها أن الحساب اخترق واللي مكتوب حنا غير مسؤولين عنه وتم استرداد الحساب !!!! يا سلام اللي قاعد يتابع شربكه غلام خان !!! في أقل من دقيقة تم اختراق الحساب وتم استرداد الحساب !!! المهم واقعد ابحث بقوقل طول اليوم إلا وألاقي الذيابة حقين الجيش الحر صايدين التغريدة وطلع العنز مراسل الميادين بحلب قاعد ينبه الطيار اللي يقصف حلب عن طريق الحساب واظن أنه عنده صلاحية على الحساب الرئيسي ويستخدم حساب اخر للتواصل مع جيش الجحش بشار عشان يعلمهم بتحركات الجيش الحر لكن اخطئ بدل ما يستخدم الحساب الفرعي استخدم الرئيسي !
تقولون وش اللي بتوصله ؟ أقولكم يوم بدأ العنز مجتهد ينعق ما طلع بحساب الميادين على تويتر إلا النعقة الأولى وباقي النعقات ما طلعت والله اعلم أنهم خافوا يسحبونها وينكشفون مثل ما صار مع مراسلهم بحلب فتركوها ومازالت موجودة بحسابهم وكذلك بحساب العنز مجتهد , وهذا يعني أن فيه تعاون ما بينهم وفيه رابط كبير وراء من يدير حساب العنز مجتهد وحساب الميادين
شباب الرجاء ثم الرجاء ثم الرجاء ثم الرجاء عدم التعليق على الجزئية اللي تخص العنز مجتهد وما طرحتها إلا لتكون صورة لمن يهمه الأمر فقط لإتخاذ اللازم . وحنا خلونا بأسهمنا وشبيحة سوقنا .
نطلع من موضوع وندخل بموضوع
لاتنسوا اخوانا في سوريا من دعائكم ومساعدتكم
قال صلى الله عليه وسلم (ما من امرئ يخذل امرءاً مسلماً في موطن تنتهك فيه حرمته ، وينتقص فيه من عرضه ، إلا خذله الله في موطن يحب فيه نصرته ، وما من امرئ ينصر امرءا مسلما في موطن ينتقص فيه من عرضه وتنتهك فيه من حرمته ، إلا نصره الله في موطن يحب فيه نصرته)
وحتى تعرفوا معاناتهم فقد عبر أحد الاخوان السوريين ساخراً بقوله : أنه اصبح من الترف اليوم أن تدفن جثة سوري في سوريا وهي كاملة
كتبت على عجالة فسامحونا على الأخطاء في الكتابة
وفقكم الله
استاذ شربكه ما هي الفائدة بالنسبه لك من فضح المضاربين انت كذا ضريتنا ولم تنفعنا ياليت تغير من سياستك في الكتابه اذا انت تبي لنا الخير على قولتك
|
 |
 |
|||
 |
 |
||||
رد مع اقتباس
المفضلات