بسم الله الرحمن الرحيم , وسلام الله عليكم جميعاً
ان شاء الله تكون النفسيات أحسن والاعصاب اهدأ ! بصراحة كان المفروض يكون عنوان الموضوع السابق ( حموئة ) بالمصري , يعني ( حمقان ) لأن أكثر الشباب الله يهديني وأياهم كانوا كلهم معصبين واللي يقرأ ردودهم يقول أن شربكه هو اللي ضرب السوق وعلقهم , الله يعين أهلهم عليهم !
يا أخوان هذا سوق أسهم ومثل ما تتوقع الربح توقع الخسارة , وخلي إيمانك بالله قوي وأنه سبحانه وتعالى بيده الرزق , يرزق من يشاء ويمنع عماً يشاء , واجعل توكلك على الله في كل أمورك , ومن توكل على الله ما خاب .
قبل ما أدخل بالموضوع الرجاء ثم الرجاء من الاخوان اللي حاب يتداخل بالموضوع إذا عندك معلومة تضيفها يستفاد منها أو استفسار عن معلومة أو تفنيد معلومة وطرح المعلومة الصحيحة فحياكم الله .
أما أن ناخذ الموضوع لغير الغرض المطروح من أجله فهذا شي غير صحيح ، وممكن تكتفي بالقرائة بدون المداخلات الإنشائية اللي لا يمكن تكون مفيدة للقارئ , ورأيك الشخصي أنت حر فيه سواء تعتبر الموضوع مفيد أو خزعبلات أو إسرائيليات أو صفه كما تشاء .
صحيح أن الموضوع مشاع للجميع ودامه مطروح في المنتدى من حق الجميع المشاركة ولكن نحتاج لطرح مفيد ، فإذا لم تكن تملك المعلومة العكسية للمعلومة المطروحة فمشاركتك لن تكون مفيدة , وبالأول وبالأخير للجميع التقدير والاحترام وللجميع الأراء
الكيمانول وحتى كتابة هذا الموضوع مازال الشبيح يحتفظ بكميات كبيرة أستطاع إعادتها بالنزول الأخير ومعدلاته بين 16 و 17 للمحافظ الكبيرة , يعني نلعب عند هالمعدلات
بتروكيم ليس لديه أخبار إلا أخبار التشغيل التجريبي والتجاري , وحسب المعلومات أن لن يكون هناك مدة طويلة بين الاعلانين .
اللجين للي راغب السهم يجمع معاه بهدوء وبدون شوشرة عشان ما نزعجه , والمستعجل 26 بإذن الله إغلاق اليوم 20.55
نماء وما أدراك ما نماء , تتذكرون سالفة الأمير اللي قاعد يطعس وراكبين معاه أخوياه ويجيهم طعس ويطمرونه ويجونك متقلبين عشرين قلبه ويوم استقروا ونزلوا سالمين , قال لهم الأمير أسف يا جماعة كنت مسرع وتسببت بالانقلاب , وردوا عليه .. لا طال عمرك حنا اللي ما كنا راكبين زين !!!
نفس الشي راح يكون في نماء , راح يسرع والله أعلم عند كم راح يجي الطعس ؟ لكن السيارة مليانة للأخر ,,, يعني الحذر ثم الحذر من القشوع والردميات
الصحراء على الشيل اللي شالوه تقول أول محطة 30 لكن أبو مريع شكله قضى قازه .. لكن نعطيه فرصة مع حركة كيان القادمة ان شاء الله
كيان , أنتبه ياللي متعلق بالسهم تفكر تفرط بسهم واحد من أسهمها وطلعهم من المحفظة وحطها بالتجوري , وبحول الله وقوته راح تبيع بربح جيد وفوق 24 والسهم له أنطلاقة قريبة جداً والعلم عند الله , وراح يسحب الأضواء من شركات السوق .
بترو رابغ للمرة المليون أقول لكم ( خلوها تولي ) لا تزعل يا هوب والله لو تعرفون ما أعرفه عن الشركة من أول طرحها كان ما حطيتوا ريال واحد فيها , وكلامي مالياً , لكن مضاربياً ممكن الله يسخر لها مضارب يبي يجلد ذاته ويدخلها كل شي جايز . اللي يتذكر كذبة سمارك ترا هذي سمارك ثانية
السيارات , لو يدري أبوضروس عن الأخبار الايجابية للشركة والمشاريع الجديدة كان ما خلى السهم يتداول تحت 30 لكن كل شغله درعمة بدرعمة .
الغذائية دام السامج بالسهم ولا لقى من يتفق معاه فيبقى الحال على ما هو عليه , والرجال متكي بصالة بنك البلاد ومستانس أن الناس تتكلم عن السهم , هذا إذا قالوا معقد
أنعام متابعها الشاهين وله موضوع عنها ,, لكن بصراحة يالشاهين الشبيح له كم يوم يطبل للسهم وما عجبني الوضع , لكن أن شاء الله يكون صادق بتطبيله
حلواني فيه شبيح ماسك السهم وينتظر الونش يطلع من السيارات ويسحبه
نادك , والله الجماعة مصرين أن التعويض جايهم جايهم وانهم راح يغردون بالسهم
القصيم الزراعية , سبحان الله يوم أكتب موضوع ( حموئه ) وصلت أقل من 22 واليوم قفلت فوق 26 وقلنا أن الرجال متعلق لكن طاروا فينا وأكلونا بريشنا وقالوا ان الرجال صرف اسهمه , سبحان الله السهم طار بسبب الغبار الكثيف اللي مغطي أجواء الرياض من كم يوم !! ما علينا
المهم يا حلوين أهم المحافظ عند الشبيح شبه طلعت من السهم هذا الاسبوع وباقي محافظ مهمة لكن معدلاتها تحت 20 يعني السهم مغامرة وما يدخله إلا اللي عارف خط سيره , ومنتب ملزوم تغامر مغامرات غير محسوبة
جيزان تحت عشرين شيل ولا تشاور والشبيح نوى يتفرغ للسهم الفترة القادمة وبصراحة مصخة ! على هالإنتظار تدبيلة ما تكفينا
المصافي , الخال قاعد يبربس بالسهم ولو هو يحفر أبار بترول كان يمديه حفر وصدر ويمكن ضموه للأوبك . مسوي فيه صانع سوق يا خال ؟ وقاعد تحارش الشرقية الزراعية ! طلعنا من المصافي وبعدين تفرغ للشرقية
المتطورة , هذا الشبيح إذا بغيت تشتري معاه خليك كنك قاعد تسرق وما تبي أحد يشوفك ! حساس بدرجة كبيرة ! شبيح وحساس بصراحة مستغرب ! لكن الرجال واعدنا يكون كريم معانا , ويقول خذ وقفل ولا تزعجني , وراح تدعيلي من كل قلبك ... نشوف
تكوين الشبيح عنده محافظ متعلقة بين 60 و 64 وخروجه من السهم بأقل أعتقد صعبة عليه ولا يقدر يطلع كل محافظه عند هذي الأسعار
بي سي أي , معدلاتهم فوق 36 وبكميات كبيرة يعني توقع الرجوع فوقها بأي وقت والمتعلق ينتظر ولا يبيع بخسارة
معدنية , مازال الشبيح متمسك بالسهم واغلاق اليوم قريب جداً من معدلاته , عندك صبر اصبر , الشبيح عنده إعادة ترتيب أوراق بمحافظه
العبداللطيف , تكلمنا عنه كثير بأخر المواضيع وأهدافهم بحسب ما يزعمون 40 هدف أول و 60 هدف ثاني .
الصادرات , أيضاً تكلمنا عنه وقلنا أنهم يتكلمون عن 60 كهدف نهائي للسهم , وأنت لا تصير طماع وتصدق أهداف الشبيحة
أسلاك , أبوضروس لاعب لعبته بالسهم , لكن مشكلته مشتت نفسه بأكثر من شركة الله يصلحه , يعني لا توفر ربح معاه , ضارب معاه عشان لا يضيع وقتك بمسك السهم على أمل أنه يسحبه سحب متواصل
أنابيب السعودية , أزعجونا أنهم راح يتحركون بعد إعلان النتايج وأشوف الجماعة معبين محافظهم ولابدين , ياليت أحد يفيدنا وش فيهم مبنشرين ؟
صدق , طبعاً الشبيح ما طلع من السهم ولا فكر أساساً يطلع , والأخ بعد نتايج الأرباح طمع أكثر وقاعد يجمع من جديد بهذي المناطق , ومازالت معدلات كثير من محافظه فوق 25 وواضح من شغله أنه مطول بالقعدة , المتعلق يعدل معاه , واللي ما عنده كاش يقفل المحفظة ويبقى أو يبيع ويروح يسترزق بسهم ثاني ويرجع لصدق . والسهم صار بالنسبة لهم ثروة .
الكابلات , الأخ استلم محافظ جديدة وقاعد يجمع لهم بالسهم وهذا يعني أن الحفلة ما انتهت
مسك , مثل ما قلنا سابق خلي هدفك فوق 26 وقفل على سهمك .
أعمار , السهم بإغلاق اليوم عند معدلات الشبيح بكثير من محافظه والأخ مازال يملك كميات كبيرة جداً , يعني مو معقولة مشتري كل هالكميات عشان يبيعها بسعر مشتراه , وحتى الحركة اللي صارت اليوم لم تكن للتصريف , ولو بدأ يبيع بإذن الله راح نوافيكم فيه
جبل عمر , ذكرناه سابقاً والسهم في بداية مجده والعلم عند الله
دار الأركان , من أكثر من مصدر الشركة لديها القدرة على تسديد قيمة الصكوك
مدينة المعرفة , برغم كل ما حدث , السهم والنية ان شاء الله عند 24 والسهم فرصة متجددة بالسوق لا تخلو محفظتك منه .
الجماعي , الأخ رتب أموره مع شركة دراية وعازم أنه يفك التعليقة , عموماً كثير من محافظه معدلاتها فوق 17.50 وبالنسبة لي أفضل سهم للمضاربة اليومية وتقدر تطلع منه راتب الشغالة ومقاضي البيت وأنت مرتاح , لأن صاحبنا يؤمن بالتحليل الفني , وتقدرون تسمون السهم بسهم العمالة المنزلية والمقاضي .
مبرد , تم رفع السهم اليوم بعد أدخال محافظ رضاوة وتدليع عشان ما يزعلون من الأحداث الأخيرة , وتم رفع السهم بمحافظ معدلاتها لا تتجاوز 35 يعني ما زالت المعدلات أقل من إغلاق اليوم بكثير , وعموم المعدلات لا تتجاوز 40 عند أعلى معدل للمحافظ , يعني الحذر واجب والمضاربة معاه للمحترفين واللي يملكون المعلومة عن حركة السهم
بدجت مثل ما قلنا سابق ان الشبيح ينتظر طرف خبر ايجابي للسهم عشان يطلع والأخ شرع بالبيع
تهامة سبق ذكرت أن أهدافهم بحدود 100 ريال , لكن وصلني أن عندهم مشكلة مع محفظة كبيرة ومهمة وقررت الخروج من السهم .
الأبحاث والتسويق , رغم دخول محافظ جديدة على السهم الأسبوع الماضي إلا أن انشغال الشبيح بسهم الجماعي أفقده التركيز على الأبحاث والتسويق .
الطباعة والتغليف , طبعاً كما ذكرنا سابقاً معدلاتهم لا تتجاوز 20 ريال وشبه متعلقين بالسهم لعدم وجود طلبات على السهم , ننتظر عام 2020 م يمكن يلاقي طلبات
=======
كتبت على عجالة نظراً لأنشغالي هذه الأيام , ومتى ما وجدت الوقت ان شاء الله سوف اتابع الردود هنا وعلى الخاص , والمعذرة للأخوة على الخاص من عدم الرد اليوميين الماضيين . والعذرة أني لم أكتب عن جميع الشركات لضيق الوقت , ولعلنا مع الردود نستذكر ما نسيناه
وفقكم الله
المفضلات