المشاركة الأصلية كتبت بواسطة جـرح القصيد
حبيب الملايين كيمانول بدت تحك في الاسفلت نصرفها بخسارة ولا أنتظر
انت ما بعتها لليوم والتوصية عليها كانت بسعر 14 وش تنتظر بالسهم وإلا صار بينك وبينه عشق ؟ كيمانول ذكرتها أكثر من مرة أن السهم مشكلته واللي أثر فيه أن واحد مدخل من ورا الشبيح محافظ كثيرة وبعمولة ووقتها كثر التطبيل على السهم وقلت من الأفضل الخروج من السهم , على العموم كثير من المحافظ طلعت من السهم وباقي عندهم كميات جيدة ما صرفوها ومعدلاتها بين 16 و 17 ولازم يردون السهم ان شاء الله واذا سهمك ما قفل اخضر بيع وراح اوجهك لسهم ثاني ان شاء الله
المشاركة الأصلية كتبت بواسطة بلاتيني
يعطيك العافيه ياعمنا على التوضيح
الله يجزاك خير ويوفقك
المشاركة الأصلية كتبت بواسطة سكون
مرحباً بأبو الشرابيك ..
من طول الغيبات جاب الغنائم ..
بس المشكلة في المؤشر مو في الخشاش
يعني رفيقنا عنده كم سهم بالمؤشر :d
رفيقنا ما كان عنده بالمؤشر الا اتحاد الاتصالات واسهم ثانية بأوزان مختلففة مثل كيان والبيع اللي جاه اثر على القطاع بالبيع الجماعي على كامل اسهم القطاع وايضاً المعرفة واعمار بالاضافة انها وافقت احقية سافكو وقبلها الارباح اللغير متوقع لسافكو وبعدها احقية سابك واحقية الراجحي , يعني كلها عوامل توافقة في فترة وحدة ووقت خروج المحافظ وتسببت فيما نشاهده والذي لن نشاهده بإذن الله الا على مشارف الـ 9000 والله اعلم
المشاركة الأصلية كتبت بواسطة ولد صالح
واللاعبين الاجانب اللي ماسكين محافظ ما باعو
وتعرف ما اقصد المهم متابعة القروبات متعبه والخيانه زي شرب الماء
وفق الله الجميع ورؤقنا الحلال
اخر خبري فيه بالاتحاد التجاري لكن ما ادري وش الله سوى فيه وما تابعته بعد بربسة عسير
المشاركة الأصلية كتبت بواسطة جراند
السيولة تخرج من قبل شهر
والبيع على وذنه مع الاخضرار
بالله عليك محافظ الكبار مثلنا طقها والحقها
مع توصية من منتدى او رساله جوال يدخل
مثل ما جمعو لعده اشهر
برضه يحتاجون اشهر علشان يبعون
القصد ما فيه من الكبار متعلق الا الصغار متعلقين بكراعينهم
الخبر يقتل التشارت ..!! عجيب والله
يعني تضخم المؤشرات مالها داعي ..!!
هذا تصحيح مثل ما طلع لازم ينزل
وعلى قدر قوه طلوعه يكون نزوله.
الشئ المطمئن نحن على وشك ان ننتهي من هذا التصحيح
الاسبوع القادم سوف نرى التغير ان شاء الله
يا سيدي الفاضل هذا الكلام قريته عشرات المرات والمؤشر عند 6400 وعن تضخم المؤشرات ومن ذاك الوقت لليوم شركات دبلت ولو تبي رفعت لك عشرات المواضيع ومن محللين متمكنين ما عدا اخونا العربي كان متفائل . وثق ثقة تامة أنهم متكرعنين واذا تبي تشوف عملي احفظ هذا الموضوع بالمفضلة وراقب صدق والقصيم الزراعية من الغد بإذن الله وهذا على سبيل المثال لا الحصر وشوف كيف راح يكون ارتدادهم وشوف اسعار اغلاقاتهم من يوم الاربعاء برغم ان السهمين مدبلين عند اسعار اليوم لكن راقب عودتهم للارتفاع . طبعاً لا احد ياخذها توصية وهذا الكلام موجه للي بالسهم وللاخ جراند عشان اثبت له انهم لليوم بشركاته . لكن ابي منك وعد انك اذا شفتهم ارتفعوا اكثر من 30% ترفع الموضوع وتقول فعلاً كلامك طلع صحيح
المشاركة الأصلية كتبت بواسطة مدحدر نحو القمة
قوقل قسم قسمات يعني اصدق
شربكة انت تسولف عند تسالي !!
ترانا شيبان وعارفين البير وغطاها
ارحم عقول الناس ترا فيه ناس تصدق سواليف شنقل بنقل
الكبار صرفو الكميات الهبره من بدري ومابقى بأسهمهم الا الخبل الي يلاحق وراهم بالقمم وراح يسلمها لهم باردة مبرده في القيعان
وخل الهرج الي مايودي ولا يجيب
تربت تيتتد تربت تييتد
يؤسفني أن أقول لك كلامك غير صحيح , وما راح أرحم عقولكم ! لين تصيرون تبحثون عن المعلومة بأنفسكم وتعرفون أن السوق السعودي من بداية الطفرة الاخيرة واللي انتهت عام 2006م ولليوم اذا تملك المعلومة تكسب وحتى لو صارت امور خارج السيطرة تكون الخسارة من الارباح فقط ورأسمالك في السليم .
المشاركة الأصلية كتبت بواسطة طيب النية
الله يعطيك العافية ياكاشف الشبيحة
باتسر وش يبي يوكلونا ؟
يا خال من باكر ان شاء الله راح تزين الأمور وفيه كم شركة بإذن الله راح تدبل مع شوي صبر
المشاركة الأصلية كتبت بواسطة مباشر
اقول ياصبر الارض عليك وعلى شبيحتك
يااخي عيب عليك احترم المنتدى والقراء
أي خزعبلات تتكلم عنها وكأن السوق يُدار من بيتكم
نحن في منتدى راقي يكتب فيه جهابذه قلما تجدهم في منتدى آخر
ثم ماهذا الوصف الإحتقاري لمن سميته بالمطوع ؟؟؟ ام أن هذا الوصف تريد به زيادة في التصديق لكلامك ؟؟؟؟؟
أول شي العيب ما يجي إلا من أهل العيب
والمشكلة لو عندك طرف خبر عن الموضوع كان ناقشتك , لكن للاسف من ردك واضح انك في عالم ثاني وما عندك أي خلفية غير هالشاشة اللي مقابلها , يعني عشان اقعد اناقشك ممكن يصير حجم نقاشنا 4 أو 5 كيلو بايت يعني نحمل سيرفر المنتدى 4 كيلو بايت على الفاضي , عشان كذا نخلي هالاربعة كيلو بايت لعضو يبي يستفيد . وبعدين وش دخل الاحتقار بكلمة مطوع ؟ ما اقول أن ما عندك أي شي أو أي طرف خيط اقدر اناقشك فيه , يعني يا أبو الشباب مدرعم بالموضوع لأن عندك مشكلة مع المعرف مو مع الموضوع , وعشان تستفيد اللي ضرب صدق اليوم امام مسجد سابق ورجل ملتحي , وإذا ما تدري مشكلتك ماهي مشكلتي , اقعد من بكرة ان شاء الله تحقق من الموضوع . ترا يقولون الدهشة بداية المعرفة وواضح أنك مندهش ومنت مستوعب الموضوع عشان كذا ممكن ان الموضوع يكون بداية المعرفة لك
المشاركة الأصلية كتبت بواسطة ليل
هلا والله بمشربك الهوامير ..
المهم اخوي شربكة ان عذيب ما هي من شركات الشبيح المتكرعن ..
وقولي رأيك بالسهم لاهنت
شركة عذيب شغالة بعالم ثاني وبعيدة عن راداري
المشاركة الأصلية كتبت بواسطة نسر
السريع...................... ممكن توضح شبيحه لان وصلني السهم وده يعكس ونتايجه طيبه.
السريع سبق ذكرت أن شبيحه أبوضروس وعنده السيارات وفيبكو وكميات باسلاك وانعام , ويمكن خروج محافظ أبن أخيه المطوع من صدق اليوم وفر لهم سيولة يدعمون فيها السريع والسيارات
المشاركة الأصلية كتبت بواسطة كاترينا
هلا وغلا بحبيب قلبي شربكه مسافر وتذكرتنا؟أشهد انك واصل
مادام ش ز صديقك قل له فيه مدرس بيتقاعد يبي يصير شبيح بس ماهوب لاقي اللي يوجهه
يعني عندك قابلية للتشبيح وتحتاج للبيسك فقط , وبعدها تشتغل كرعنا فينا من رموش عيونا . المشكلة عشان تصير شبيح لازم تتعلم النصب والكذب أول وأول مقابلة شخصية يطلبون منك انك تطلع مواهبك في النصب والكذب ! يعني أول شي خلينا نختبرك بالمنتدى انصب علينا بشي ولا نكفشك فيه إذا ضبطت من بكرة ان شاء الله وحنا متقهوين كبير الشبيحة بالتحلية
المشاركة الأصلية كتبت بواسطة متذبذب
يعني نحط النقط على الحروف
من كلامك نفهم الآتي :-
شرف الزهراني طُلب منه تصفية محافظ الرجال اللي تقول
ترتب على ذلك تلبيس طواقي على بقية المحافظ اللي عنده
بقية المحافظ تسابقت على الخروج باقل ربح او اقل خسارة
ترتب على ذلك لخبطة لبقية الاسهم
المشكلة إن طريقة عمل شرف و محافظ الرجال هي من صنعت الارتفاعات بالسوق
و خروجهم من السوق سيعيد السوق لسابق عهده التعيس مع تكالب اكتتابات ابو عمق
بصراحة شرف ذكرنا بالجارلله و كلاهما خسرهم سوق الاسهم السعودي
فلا يوجد سوق اسهم بلا مضاربات و لا تضخم
كلامك صحيح , لكن هالمرة ما اتوقع تلبيس طواقي بسبب أن بعض المحافظ اللي تعلقت مهمة جداً سواء كان بحجمها أو بوضع اصحابها , لكن الرجال واضح يخطط على شي ويمكن أني فهمت وش يبي يوصله بحكم معرفتي القوية في شخصياتهم وتركيبتهم . الخلاصة انه ما راح يتركهم متعلقين أبداً لان هذا يعني انتحار له بالسوق
المشاركة الأصلية كتبت بواسطة مضارب محت78رف
هلا شربكة ترانا متشربكين على الاخر في أسهمنا والله أني لو أقابل اي واحد من هالشبيحة أني لاتزانط انا وإياه قلهم ترى النفس عليهم خضراء. اعنبوهم خسف بالأسعار ولا كانه سوق مال صائر ساحة حرب لهم ما فيه الا رشاشات أر بي جي وكلاشنكوفات والدمان للركب ولا هامهم.
وانا بعد للتقاعد اقرب وأصير شبيبيح مع كاترينا بس بالنبيطه.
بكرة لا صار كاترينا شبيح أن شاء الله ما نحتاجهم دام صديقنا شبيح وواسطة , تصدق من شفت بو عبدالرحمن دايم يتعبث بالتأمين وانا اقول الرجال مشروع شبيح لأن كل الشبيحة كانت بدايتهم بالتأمين وبعدها وسعوا نشاطاتهم
عموماً لا تقلق أخي المتكرعن ما زالت الاخبار رغم كله هاللخبطة ممتازة ان شاء الله وكلها اسبوعين وتشوف المنتديات يوصون على تدبيلات
المشاركة الأصلية كتبت بواسطة aZuZ sMiTh
ههههههه
هذا الفلم الهندي
اخوي شربكة
ترا الصنف الي تأخذه مضروب
لا يكون المطوع الي تقول عليه هو الي يبيع في السوق الامريكي !!
احترموا عقولنا ...
أثر الشباب كلهم في الباي باي ومالهم علاقة بالسوق
المشاركة الأصلية كتبت بواسطة العالم الثالث
طيب اسمعو هالكلام الي انكتب بالشبكة الليبراليه وانحذف من الموقع بعد تقريبا نص ساعه
هالموضوع نزل اول ماتوقفت بروج والمتكاملة
وكتب عضو ان الشغله بين التويجري وعيال سلمان والشغله تصفية حساب بينهم خلت
التويجري يستخدم نفوذ ابو متعب بموضوع عيال سلمان وشركاتهم بالسوق
وكتب اضافات كثيره مختصرها إن عيال سلمان ومعهم اصحاب محافظ ثانيه
بتلعن ابو خير السوق حتى يطير التويجري او يضعفون موقفه هو وابن عمه عند الملك
اعترف وش وداك عند الجحلطية بمنتداهم ؟
المشاركة الأصلية كتبت بواسطة علي محسن
الرايق بالنسخه المعدله ....
مين النسخة القديمة ؟
المشاركة الأصلية كتبت بواسطة معاذ
بارك الله فيك أخوي شربكة
هل في المتطورة أحد الشبيحة ؟
امسك سهمك وعض عليه
المشاركة الأصلية كتبت بواسطة ابوكاس
السوق قريب من انتهاء التصحيح
يعني الارتداد قريب بإذن الله
لكن المشكلة ان ( ع ش) اتفق مع ( ز ح ) على ضرب
الاسهم اللي فيها ( س ن) وقد يتعاون معهم ( ك ن )
وايضا ( س ص ) للإطاحة باسهمهم
اذن بما أن ( س ص ) و ( ك ن ) > ( ع ش ) و ( ز ح )
فإن الارتداد سيكون من منتصف قاعدة المثلث الشبيح الساقين
هذا ما اتوقعه في الفترة القادمة والله أعلم
رجاء ارحموا عقولنا
ما نراه التصحيح اوشك على الانتهاء بإن الله
للتصحيح والتوضيح , دايم اسمع كلمة تصحيح من الكثير وهذا بدت الثقافة مع الدورات في التحليل الفني أيام الطفرة
معنى تصحيح يعني كل شركات السوق بدون استثناء لازم تنزل عن الهاي اما لو فيه ربع شركة مع النزول تسجل هاي اعرف ان الوضع ليس بتصحيح والنزول له اسباب ثانية سميها اللي تسميها لكن لا تقول تصحيح , وسهم التعمير خير مثال
وشكل الحساب والجبر والهندسة لاحسين مخك يا أبو س ص
المشاركة الأصلية كتبت بواسطة taif.roses
بارك الله فيك وفى عقليتك
المشاركة الأصلية كتبت بواسطة سهران
مساء الخير شربكه شوف لنا سهم الخال المصافي نازل اكثر من 30 بالمائه من افتتاح التوصيه ما صار سهم شيوخ ...
اقتباس المشاركه عن شربكه .....
نبذة عن الخال
هالخال يحلفون الرجاجيل أن الكورنفليكس عمره ما طب فمه ، وما يفك ريقه إلا على غبوق نياق حمر أو عفر , ولا يقلط إلا على لحم حاشي , وما يحلي إلا على مضير مطحون بسكر
الخال طموح جداً وطموحه ماله حدود , ويحلم أن يكون عنده ذود من المغاتير والمجاهيم والصفر والحمر , الخال يحب التنويع عشان يشوف كل أنواع الأبل قدامه
ويوم بغا يدخل السوق قال للي حوله ما يقعد رأسي كود أعلى سعر وصل له سهم بالسوق , وقالوا له الربع يالمطنوخ ماغيره سهم الشيوخ المصافي , لين عنده ناقة لقحا , ويقول بوقتها للي حوله لين أضنت الناقة يا جماعة ترا أسم اللي ببطنها المصافي عشق السهم الخال وناوي يسوي فيه الهوايل والسهم لازم يرجع لأيامه الحلوة ويصير على أسمه سهم الشيوخ
طيب دامك كلفت نفسك بالاقتباس وراك ما كملت الاقتباس ونقلت الباقي المذكور بالموضوع واللي فيه ( أنكم إذا ارتفع السهم مع الافتتاح لا تطامرون وراه !! ) يؤسفني أني أقولك أنت شخص غير أمين
المشاركة الأصلية كتبت بواسطة DREAM
اتمنى على الاداره تغيير معرفك
يكون (الواصل) بدال شربكه
بالتوفيق
الاسماء ما تفرق الواصل شربكه طحنون , المهم ما يكتب المعرف
المشاركة الأصلية كتبت بواسطة الجوت الجوي
خخخخخخخخخخ الاخلاق تغيرت ------------
شربكه يا أنك تقول من مصادر قويه ----او انك بتخربط علينا سواليف ابو حديجان -------- وبعدين ما كل ما وضع لحية مطوع وياليت نكون مطاوعه ونتلزم ونتقي الله ونتجنب الاسهم الحرام والمختلطه بالحرام اللهم اغننا بحلالك عن حرامك---
سوف نمهلك يومين لتحديد مسار السوق ------------ثم نقرر -------------بارك الله بالجميع -----------------------
ما ألوم البعض على الاخلاق التجارية لأن المال عديل الروح , والشي الثاني اللي ماهو قريب من الأمور ومطلع عليه ممكن يستغرب ويشوفها نسج من الخيال .
واللي اعرفه أن الألتزم بالداخل أهم من الظاهر , لأن ظاهر الالتزام من السنن المؤكدة وباطنه النيات والتي يعقد عليها سلامة الدين كامله بواجباته
المشاركة الأصلية كتبت بواسطة الواقع
أبو الكتارن .. أخبار الكراعين
كيف تعليقتها
و إذا صرت شبيح لا تنسانا يا قاطع
.
لا تصدق ان فيه احد ما تكرعن الا اللي اساساً ما كسب وشغال على خمس هللات
المشاركة الأصلية كتبت بواسطة السهم الماسي
شربكة اسم على مسمى ..
ومثله الكثير من كتاب المنتديات ممن يدعون العلم يظهرون فجأة ثم يندثرون بسبب دهورة من يقرأ له واكتشافهم انه لا يملك شيئا سوى الضحك على عقولهم ..
ولك العودة الى موضوعه الأخير وغيره والنظر فيما كتب بل وطريقة الصياغة البدائية التي توحي بقدر بسيط من التعليم ..
قدر بسيط من التعليم !!! تعجبني فيك فراستك الخارقة , انتبه لا يدري عنها أحد ولو أنك عايش بوقت , أياس بن معاوية ونقلوا عنكم خبر ما فرقنا المنقول هو لأياس وإلا لك . حافظ على فراستك من العين
المشاركة الأصلية كتبت بواسطة ابو المحاميد
الشكر لك الأخ شربكة ...
هذا يعني تطابق أخبار الشبيحة مع نظرة التحليل الفني ...
كلاهما يقول بقرب إنتهاء النزول ...
ولكن التحليل المالي والأساسي ينتظر أن يقول كلمته عبر نتائج سابك !!!
والإخوة كاترينا ومضارب محترف ...
ترى التشبيح سلاح ذو حدين ومضر بالصحة ... نــنصحكم بالإمتناع عنه !!!
والجمع هنا ليس للتعظيم المراد به التفخيم ... بل
أنا وشربكة !!!
أخوي أبو كاس ... معادلتك ناقصة !!!
ما أشوف فيها (س ن) مع أن موقعه في المقام !!!
وبالتالي فإن ناتج المعادلة سيكون بالقسمة على صفر ...
ما يعني أن الجواب هو "ما لا نهاية" !!!
وهذا غير مقبول رياضيا ولا علميا ولا هندسيا ... ولا حتى إقتصاديا !!!
أرجو إعادة النظر في المعادلة مرة أخرى قبل إفتتاح السوق غدا ... للأهمية القصوى ...
ونقطة مهمة أخرى ... منتصف قاعدة المثلث الشبيح الساقين ...
هذي ما مرت علي في الهندسة الفراغية ... ليتك تشرحها لنا !!!
*****
أبو المحاميد طلعت مدرس حساب ! بصراحة فراستي خانتني وكنت أضنك تدرس جغرافيا وفقه !!
اشكر لك مداخلتك أبو المحاميد , وسابك مهما كانت نتايجها لن يكون تأثيرها كبير على الوضع العام للسوق ولن يتجاوز تأثيرها جلستين تداول سواء كانت بالسلب أو الايجاب , السوق بإذن الله مقبل على خير كثير وبحسب علمي بأن هناك سيولة جديدة سوف تدخل السوق بإذن الله وهذي السيولة لم تشتري سهم واحد خلال العام الماضي وحتى اليوم
المشاركة الأصلية كتبت بواسطة الف باء
ههههههههههههههههههههه شر البلية مايضحك سوق بكبر سوقنا يحركه شخص واحد
المشاركة الأصلية كتبت بواسطة الف باء
ودي اصدقك بس قويه والله مره قويه وهالمره من جنب القده خخخخخخخ
اعطيتك شركاته , وسواء صدقت ما صدقت هذي مشكلتك , وبصراحة مو مشكلتي يصدق أحد أو ما يصدق ولا يهمني أن أحد ما صدق دامني أكتب الصدق وصدق اليوم نسبة تحت
المشاركة الأصلية كتبت بواسطة نوماس.
والله اتابعك من فتره ولم اعلق
المشاركة الأصلية كتبت بواسطة نوماس.
بطل الافلام الهنديه وانا أخوك وتلحف قبل تنام واقرأ المعوذات وآية الكرسي
نص الل في المنتدى مضاربين كبار او يعرفون مضاربين وقروبات وساكتين
على هالكلام اللي قاعد تكتــبه بين فتره وفتره
وعشان نص اللي بالمنتدى مضاربين كبار شربكه اختار هذا المنتدى يكتب فيه واسألهم
المشاركة الأصلية كتبت بواسطة نوماس.
ماتذكر جدتك وهي تسولف لك قصص من راسها إلين ترقد
المشاركة الأصلية كتبت بواسطة نوماس.
مثل سوالف شربكــــــــــــه
أهم شي تكون القصص ممتعة
المشاركة الأصلية كتبت بواسطة aboyousef
والله العظيم اول ماقرات الكلام الفاضي عرفت ان الدعوى بربسه
المشاركة الأصلية كتبت بواسطة aboyousef
وكانك ياشربكه من يدير السوق
والله العظيم انك في وادي والسوق في وادي ثاني
السوق له صناعه ومن يديره باحتراف ومهاره
بلا خرابيط زايده شبيحه ومطوع ورموز
والعتب على من يسمح لك بالمزايدات او من يصدق كلامك كانك من صناع السوق
الامر ومافيه تصحيح قاسي زي ماكان ارتفاع صاروخي وخاصه في اسهم الخشاش والمضاربه
وسلامتكم
يقول شكسبير ما دمت صادق لماذا تحلف ؟
وبعدين وأنا أخوك لازما تكفر عن حلفك تراه بذمتك الحلف , على قولك ان السوق بوادي وأنا بوادي .... اللهم فأشهد اللهم قد بلغت
المشاركة الأصلية كتبت بواسطة عبيلان
مع احترامي للمنتدى واعضائه الا اني ارى حديثك ينم عن عقليه قاصرة لم تنضج حتى الآن فاستغلت من البعض او ان حديثك ينم عن خبث وتعاون مع قروبات للتصريف فما تتكلم به تغرير وقلب للحقائق ورسم آمال للمتداولين المتعلقين بشركات الخشاش حتى يتم التعديل وعدم البيع ولعلم من يقرئ وانت تعلم هذا علم اليقين شركات الخشاش تصحح بطريقة تختلف عن مايو وستستمر بالتصحيح وستستمر انت ومن هم على شاكلتك بمحاولة ثني المتداولين عن البيع والدخول للتعديل وفي المقابل التصريف لكم .
المشاركة الأصلية كتبت بواسطة عبيلان
السوق اكبر من خزعبلاتك ورموزك ش ز وكأنك تتكلم من الاستخبارات الامريكية عن قضية هامة ، ويؤسفني ان ينساق خلفك من يصدق هذه الرموز بل ويختلق رموز لامراء او مشغلي اموال وكأن ذكر اسمائهم الصريحة ستكون نهاية العالم .
احترمو عقولنا وقبل هذا خافو ربكم في اموال الضعفاء والايتام والموظفين ممن يحلمون بتحسين وضعهم المادي عن طريق الاسهم فيقعو في شباككم .
نصيحتي للكل السوق يصحح في اسهم الخشاش بشكل واضح ومن لديه شركه لم تتفاعل مع النزول فعليه ان يحمد الله ويصفي اسهمه فيها لانه مهما قاومو فهم يقاومون للتصريف وبعدها سترى النسب في السهم كما يحدث الآن في بعض الاسهم بالتدريج .
كيف الحال أبو الشباب ؟ أهم شي أنت طيب وسليم وناضج ومندي ومظبي
للأسف هذا الموضوع أثبت بأن هناك من هم بالسوق ولا هم بالسوق وكان هذا واضح من الردود , وبالنسبة لي يوفرون عناء فتح مواضيعهم لأني بهذا الموضوع اكتشفت بأن فتح مواضيعهم لن تكون مفيدة لي على الأقل وقد تكون مفيدة لغيري . بالنسبة لي ابحث عن المعلومة والمعلومة ولا غير المعلومة وبمناسبة المعلومة اطلب من أخونا معلومة العودة للكتابة واعرف أن دام يقرأ موضوعك ولو شخص واحد فمن حقه عليك أن تكتب له
وفقكم الله ونستكمل الردود في الغد ان شاء الله لمزيد من الاكتشافات الممتعة لي
المفضلات