المشاركة الأصلية كتبت بواسطة NOMERCY
بس ياشربكه مضارب جيزان سفاح
اخاف يشوف موضوعك يتلذذ بذبحنا
اول شي ينتف ريشنا وبعدين يسلخ جلدنا وبعدها انت عارف
ولكن مايضر ندخل ولو 10%
تصدق لو ما اتعلق بالسوق احس بضيقة صدر
من ناحية سفاح فهو سفاح وإلا فيه واحد عاقل يحشر سهم شهور على نزول ويكوم عليه عروض طول الفترة الماضية . وهذا لا يمنع أن نتعامل معاه بحذر ولا نعطيه فرصة يصيدنا . واحساسك بضيق الصدر لو ما تتعلق . تراها مرحلة ترويض للنفس وتفيد وقت الانهيارات , يعني وقت الانهيارات تشوف كل واحد من المضاربين بالسوق برطمه واصل سره , وأنت ماشي توزع ابتسامات والنفسية عال العال
المشاركة الأصلية كتبت بواسطة سهران
صباح اليل اخوي شربكه ..
أعلنت شركة جازان للتنمية في بيان لها على "تداول"، أنه نتيجة لتعثر شركة سيلوندا المملكة المتحدة مالياً وعجزها عن مقابلة التزاماتها تجاه الدائنين وتسيير عملياتها الإنتاجية على الرغم من الدعم المالي المتواصل الذي ظل يقدمه لها مساهموها، تم وضع الشركة تحت الحراسة القضائية بتاريخ الـ4 يناير الماضي ومن ثم تم بيعها بواسطة الحارس القضائي الذي تم تعيينه بواسطة مجلس إدارة سيلوندا المملكة المتحدة إلى طرف ثالث بمبلغ 1.2 مليون جنيه إسترليني في 11/2/1433هـ الموافق 5/1/2012.
وقالت "جازان للتنمية" إن الخسائر المترتبة عليها من هذا الإجراء تبلغ 12 مليون ريال سوف يتم معالجتها على القوائم المالية للربع الأول من عام 2012 .
قد يوثر ذلك بشكل سلبي على اعلان ارباح الشركه في الربع الاول الان ...
اخوي سهران مثل هالاخبار تساعد المضارب بالتجميع , لأن المليح عنده بعدها أخبار ايجابية راح تطلع وقت التصريف , وللاسف هذا حال شركاتنا لا حسيب ولا رقيب
المشاركة الأصلية كتبت بواسطة الشاهين
السهم ممتاز بهذه الاسعار ولكن بعد اعلان الربع الاول ممكن يحقق خساير
عليك بسهم انعام وتراي راهنت على المعرف راح تشوف السهم فوق 100 ريال
لا املك الا قول الله يرزقك النسبه في جيزان
يعني يالشاهين صدق والقصيم الزراعية عندها استثمارات في اي بي ام و برتش بتروليوم خليها على الله , وأنعام أخذتها أمس وما زالت بمحفظتي بسعر 73 وراح انساها بالمحفظة حتى اعلان نتائجها ان شاء الله , وأنا وحظي كم يصير سعرها ذاك الوقت
المشاركة الأصلية كتبت بواسطة سمر سهم
والله يابو الشرابيك مافيه اخوك في كل المنتديات انا شخصياً اثق فيك ثقه عمياء وانت اهل للثقه وتاريخك يشهد وان شاء الله من بكرا نجمع معك في السهم وربك كريم
موفق لكل خير يابطل
الله يجزاك خير ورحم الله والديك وان شاء الله أكون عند حسن الظن
المشاركة الأصلية كتبت بواسطة جـرح القصيد
يعطيك العافية متى ماتوفرت سيولة إن شاء الله ندخل معكم إذا كان السعر مناسبا
السيولة كلها في انعام وكيمانول
انعام خبرها عند الشاهين وكيمانول قاموا يبربسون فيها وصار كل يوم للسهم قائد وحاسوه بعد ما كان اخر تمام , لكن مازالوا يراهنون عليه الله يسهل دربهم ويسعدون ملاكها
المشاركة الأصلية كتبت بواسطة Omarrr
كل الرموز معروفه:-
نفصح ولا نكتم؟؟
امزح معاك يا كحيلان
الستر زين وأنا اخوك ترا الجماعة حساسين , وما شفتهم اليوم كيف قحصوا بالسهم من فرط الحساسية
المشاركة الأصلية كتبت بواسطة راعي الطييب
الله يعطيك العافية
قالها الرجال
الله يوفقكم
الله يجزاك خير ويبارك لك برزقك وان شاء الله تكون جيزان اليوم عوضك عن النص ريال بالمصافي امسك المصافي ترا الخال شال كميات شوي وتطلع من خشمه , وقلت له اليوم يا خال ترا ما حرك داواك ! وقال قاعد تضحك على خالك لكن العبرة باللي يضحك اخيراً
المشاركة الأصلية كتبت بواسطة محمدابو دانه
اذا فيه احد بيدخل اكيد يبي له كوي مع علباه
شكرا اخوي سهران على الخبر
نبي من شخبطه يفسر لنا هالخبر هل هو من ضمن الاخبار الايجابيه اللي موعود بها السهم حسب قوله
يمكن من تحليله ايه
انكوى على علباه اللي ما دخل السهم . وليت كل الشخبطة تعطي ولو 1% باليوم مو 6% الله يرحم حالك يا أبو دانه , تابع الشخابيط وأنا اخوك ترا بعد الله سبحانه وتعالى راح تدبل محفظتك وبدون عمولة مثل الشبيحة ,لا نبتغي منها غير دعوة صادقة أن جادت بها نفسك , والا والله ما خلاني أكتب وانصح واوصي إلا طلب الاجر على اجتهاداتي , ما عند الناس ضايع واللي عند الله باقي
المشاركة الأصلية كتبت بواسطة ابو عبدالمحسن
الكلام اللي طلعوه هنا ويقطر اسى وخساير
اكبر محفز واول اشارات طيران الشركه
هذا سوقنا وهذي اساليبه خاصه وقت النشاط والتوهج
اذا شفتهم شوي ويشغلون قران ويحطون سرادق عزاء مثل اخوانا المصريين في اخبار شركه ما اعلم انها في الغالب فرصه ذهبيه
والله اعلى واعلم
احسنت وهذا كلام حكيم وفاهم السوق واساليبه . اسمع الكلام يا ابو دانه , كان الخبر سلبي والسهم اعطى ما يقارب 7% تقريباً والسوق نزل بحدود 90 نقطة
المشاركة الأصلية كتبت بواسطة الفال 111
يقول السديري أحمد رحمه الله :
أنا من نجد يكفيني هواها **** ويبري لوعتي شربي لماها
ورد عليه شربكه غفر الله له وقال :
أنا من جيزان يكفيني سهمها **** ويطرب محفظتي شوفي لنسبها
شاعر شربكه ما شاء الله (بس شل اللام من لنسبها يضبط البيت)
ما شاء الله عليك يا أبو فادي محلل وشاعر . فعلاً البيت انكسر وما انتبهت الا بعد ما فات وقت التعديل , لكن ممكن يمر مشرف على الموضوع ويطلع شاعر ورقيق ويشيل اللام ويعدل البيت
المشاركة الأصلية كتبت بواسطة الشرق الاوسط
شاعر شاعر يازعيم الشبيحه
الخاص عندك فل ماتفرغ البتاع
قبل شوي دخلت ولقيت 47 رسالة جديدة وما راح اقدر ارد عليهم كلهم اليوم لكن ان شاء الله ما يجي يوم الجمعة الا وراد عليهم , والحين مسحت كثير من القديم وصار فيه مساحة
المشاركة الأصلية كتبت بواسطة مضارب محت78رف
هلا وغلا بشربكتنا
وبارك الله فيك على تطمينك عن السوق والخاص عندك مفلفل ما قدرنا نحاتسيك
وبعدين ترى القصيدة اعتقد انها
ويبري علتي شربي لماها
القصيدة فعلاً البعض يرددها ويبري علتي وبعضهم يرددها ويبري لوعتي وأخوك حافظها من سنين ولا يعرف هي لوعتي والا علتي . ودامه مو قرآن بسلامتهم , والبريد فرغت مساحة فيه
المشاركة الأصلية كتبت بواسطة سكون
هلالا بأبو الشرابيك ..
شكل السهم مستوي ع الاخر بس له شوي تحّمير :d
الرجال انحاش وراح وخلانا وما قدرنا نكمل الباقي , لكن ما عليه أن رجع شلنا وان راح ما فيه حسوفة موجود بالمحفظة
المشاركة الأصلية كتبت بواسطة العطـوف
الله يطمنك ويريحك
وش الجلد صحيح انهم شياطين متعافيه
والله اني ماشفت سعر الاسهم امس ولا شفت الجلد اللي صار الحمدالله
صحيح رحمه من الله
فرق والله شاشه تغث واوجيه تفتح النفس
السهم حلو ومميزاته ومواصفاته كله تجنن وتغري
بس عيبه ان فيه واحد منحوس داخلبه
وان دخل في اي سهم هج مضارب السهم مع الشباك
مهو انا
أنا من جيزان يكفيني سهمها **** ويطرب محفظتي شوفي لنسبها
صح لسانك يالغالي
اسال الله الكريم رب العرش العظيم
انه يؤفقك بالدنيا والأخره
ويخليك لعين ترجيك
احمد ربك انك منت قدام السوق والا صرت نفسية مثل بعض الاخوان ووده يتهاوش مع أي أحد بسبب وبدون سبب الله يكفينا شرهم . أنت خلك بمرابعك وانسى السوق والهم وقفل لحين ميسرة
المشاركة الأصلية كتبت بواسطة وااافي
بارك الله فيك
وفيك الله يجزاك خير
المشاركة الأصلية كتبت بواسطة على بركة الله
السهم اعطى فرصه للدخول
افتتاح قريب من الاقفال
الان 4 ونص بالميه
ما شاءالله
بارك الله فيك
شرينا مع الافتتاح
وننتظر 30 باذن الله
الله يبارك لك بربحك وبإذن الله يوصل السهم لـ 30 قريباً
المشاركة الأصلية كتبت بواسطة الخاص
السهم أغلق يوم أمس تحت متوسط 200يوم .
المهم هو العودة فوق متوسط 200يوم وبكميات.
متوسط 200يوم = 23.90 ريال .
والله يا خوي الخاص ما افهم بالتحليل الفني , وتخصصي شبيحة وأنت وباقي الاخوان فيكم الخير والبركة في التحليل الفني . خلوا علينا متابعة الشبيحة وأنتم عليكم التوجيه بالتحليل الفني وبالنهاية المصلحة واحدة افادة الاخوة الاعضاء والقراء واجرنا واجركم على الله
المشاركة الأصلية كتبت بواسطة NOMERCY
توكلنا على الله ودخلنا معكم
نقول يارب تعوض خسايرنا
بصراحة السهم فية شراء مهبول
شكرا ياشربكه
الله يوفقك يرزقك محب للخير دائما
ونعم بالله . وبإذن الله تعوضك خسايرك وتعطيك ربح فوقها ، وهذا ما يمنع تكون حريص وتلعب معاهم
المشاركة الأصلية كتبت بواسطة العالم الثالث
نو مرسي
وش اخر اخبار التعليقات
رد يا نو مرسي
المشاركة الأصلية كتبت بواسطة شنغريلا
شربكة انت الان حجرت لهم وفضحتهم وراح يحبونك أكثر .
بارك الله فيك
المحبة بيني وبينهم أزلية سبحان الله
المشاركة الأصلية كتبت بواسطة NOMERCY
ايش تقصد اخي وضح لو سمحت
رد يا العالم الثالث
المشاركة الأصلية كتبت بواسطة العالم الثالث
اقصد عسى نزول امس سلمت منه
رد عليك يا نو مرسي
المشاركة الأصلية كتبت بواسطة أ.ياسر
طبينا ماركت بيض الله وجهك 7% زي العسل
ووجهك أبيض والله يبارك لك في ربحك
المشاركة الأصلية كتبت بواسطة FARiS NAJDi
جزاكم الله خير
بالرغم من عدم إستفادتي لأني متناشب مع علة العلل
ولكن رايتك بيضاء
الله يجزاك خير , والجاي ان شاء الله أكثر , وملحوقة بإذن الله
المشاركة الأصلية كتبت بواسطة نوماس.
تريد ان اعطيك سيرت جيزان
الشبيح الدايخ اللي علق أصحابه فوق 30 ريال وقالهم لاتبيعون بزود الكميات تحت
وجايكم وهالحين المساكين منتظرين فوق
ههههههههههه
وشكلها تعليقت العمر بالنسبه لهم
ومازالوا منتظرين سهم دبل من بعد احداث البحرين 4 مرات
يعني وش ظنكم ياشباب؟؟1!!
بإذن الله ان الله يفك تعليقتهم قريباً , وهذي نهاية اللي يثق بشبيح
المشاركة الأصلية كتبت بواسطة شمس طيبة
كم اقرب هدف ياشربكة الخير دخلنا اليوم
الخير بوجهك يا شمس طيبة رسول الله صلى الله عليه وسلم . أختي الكريمة حنا نقول العاقل خذ نص حكية واخوك يقول العاقل خذ ربع حكيه . هم يتكلمون عن سعر 50 واخوك يقول إذا وصلوا 30 خير وبركة ولهم منا دعوة طيبة . لكن لا تقعدين تتفرجين على السهم أوقات جني الارباح بالسوق اجني ربحك وارجعي شيلي كمياتك يعني حاولي تضاربين بالسهم حتى يوصل سعر 30 بحول الله وقوته
المشاركة الأصلية كتبت بواسطة الحاسه السادسه
بارك الله فيك
وفيك الله يجزاك خير
المشاركة الأصلية كتبت بواسطة نسر
راعي الانعام علقنا فوق 77
................ الله يفرجهااااااااااااا
بإذن الله ما فيه تعليقة شوية صبر وبإذن الله تبيع بربح , الاخبار عن السهم جيدة من حيث الشبيح , والاخ الشاهين متابع للسهم
المشاركة الأصلية كتبت بواسطة راعي الطييب
ترى ركبت معكم اليوم
وين اول المحطات
أول محطة قناعتك بالربح . ارجع لردي على الاخت شمس طيبة
المشاركة الأصلية كتبت بواسطة مضارب محت78رف
عسى المانع خير اخي الغالي
خير بإذن الله لكن شوية مشاغل
المشاركة الأصلية كتبت بواسطة جغيمان اللامي
مبرووووك يا بطل ولا هي جديده عليك دائماً متميز
حبيبي شربكة هل صحيح ان شبيحة مدينة المعرفة توجهو الى دار الاركان
تحياتي لك يا غالي
الشبيحة اللي طلعوا من المعرفة بالاساس داخلين بتنسيق مع الشبيح اللي بالمعرفة وطلعوا من المعرفة واتجهوا لدار الاركان ويقولون رايحين 20 بدار الاركان , وشبيح المعرفة مازال موجود بالسهم
المشاركة الأصلية كتبت بواسطة تحليل فني
متى يطلع السهم جيزان وكم المده
السهم بدأ بالطلوع اليوم . والمدة ما أقدر أحددها ترجع لشبيح السهم , لكن أنت وقناعتك بالربح
المشاركة الأصلية كتبت بواسطة عبدالملك
سهم المصافي وش صار عليه؟
المصافي وأنا اخوك بإذن الله راح يسعد ملاكه قريب جداً , واللخبطة اللي صارت بالسوق من بداية الاسبوع اثرت عليه كثير ولكن الشبيح مازال بالسهم ومتمسك فيه بقوة ومع استقرار السوق سوف يبدع بإذن الله
===========
بعد شكر الله الشكر لكل من مر على الموضوع . ومن دخل السهم عليه قرائة جميع الردود في الموضوع لمزيد من التوضيح عن السهم .
ارجوا من الاخوة المشرفين بعد موافقتهم اغلاق هذا الموضوع ووضع رابطه داخل موضوع أخونا طيب النية بعد موافقته , لأنه هو من نبه للسهم واشار لدخول السهم قبل هذا الموضوع , وانما هذا الموضوع هو نقل معلومات عن ما يدور حول السهم
الاخوة الكرام على الخاص سوف احاول جاهد اليوم ان شاء الله ارد على اكبر عدد من الرسائل واللي ما ارد عليه اليوم ان شاء الله راح ارد عليه بكرة أو بعده وان شاء الله ما راح اهمل أي رسالة .
انتظرونا قريباً في سهم جديد على النار يطبخ وأن شاء الله اول ما يستوي راح اسدحه لكم هنا .
وفقكم الله
المفضلات