بسم الله الرحمن الرحيم والسلام عليكم ورحمة الله وبركاته
الحمد لله على فضله حمداً كثيراً يليق بجلاله وعظيم سلطانه
في البداية نقول للمرجفين عظم الله أجركم بالسوق .
ثانياً الموضوع يخص فئة معينة بالسوق وليس فيه توصية لا من قريب ولا من بعيد . فأن كنت تبحث عن توصية فوفر الوقت على نفسك بعدم الاستمرار بالقراءة وإذا أردت أن تعرف الجو العام للسوق يمكنك الاستمرار علماً بأن المكالمة مسجلة لدواعي التدريب
واصل المؤشر صعوده 14 جلسة متتالية ما شاء الله تبارك الله , وقد حدث ذلك في عز الطفرة بنهاية عام 2005 م . وهذا أن شاء الله مؤشر جيد لعطاء قادم للسوق السعودي وليس كما يتخيل البعض أن ما يحدث في السوق هو عمل مضاربين مهما كبر أو صغر ذلك المضارب . وكما حدثناكم سابقاً وقت كان المؤشر 5200 أن المؤشر سيواصل الطلوع رغماً عن كل شي ! وها هو ولله الحمد قد حقق المؤشر أكثر من 2200 نقطة أرتفاع وبإذن الله القادم أجمل والصبر جميل .
نطلع من موضوع وندخل لموضوع ثاني
خالطت كثير من الشعوب والجنسيات وسبق أن قريت كثير من الكتب ولا ابالغ إذا قلت مئات الكتب لكن وبكل أمانة وأستقلالية ما لقيت أكثر من شيبان الحضارم حكمة في الشؤون العامة وخصوصاً الإقتصادية ! وعندهم أمثال وأقوال الواحد منها كتاب كامل ما شاء الله عليهم واخترت منها هذي المقولة اللي تعتبر قاعدة لا يمكن تجاوزها ويجب الوقوف عندها ( كون نمل تأكل سكر , وكون جمل تأكل تبن !) أعزكم الله
طبعاً شرح المثل واضح دام أنك صغير أمورك طيبة وإذا كبرت لا مواخذة بيجي يوم وبتأكل تبن ! كيف ؟ راح نوضح سبب ذكر هذي المقاولة , وهي أساس موضوعنا وعنوانه .
طبعاً تعال قارن بالأمثال والأقوال المأثورة عندنا . خذ هالحكمة العظيمة ( قال صبه قال أحقنه ) أوكي يالحبيب وين الحكمة أو الأكشن في الموضوع ! ويعني وش راح نستفيد من هالحكمة العظيمة يعني تهقى راح تضيف لنا شي أو أن ممكن يؤمن فيها أحد وتغير مسار حياته مثلاً .
نجي عاد للمقولة اللي حركت جيوش الأرض وأشغلت مراكز الأبحاث العالمية . ويقولون أن بعض أجهزة الاستخبارات في بعض الدول فتحت مكاتب متخصصة لمتابعة تأثيره على العالم . خذ عندك ( قال أنفخ يا شريم قال ماهنة برطم ) ما أقول إلا الله يرحم شريم وبرطمه ويرحم من قالها .
والله يرحم رباب يوم قالت ( قال وقال .. الوفي يبقى وفي ما عاد يقسى .. قال وقال كل تعابير الوفى بانت في حسه .. لحول لحول وش علامه )
لكن أفضل شي أنك تسمعها وتكون تأكل بسكوت مالح وتشرب معاه ميراندا ، معليش استحمل الحموضة في سبيل الاستمتاع بالفن الجميل .
نطلع من موضوع وندخل لموضوع ثالث
طبعاً للي معطيني وجه ويقرأ إللي أكتبه يعرف أني دايماً أردد اسم ( القائد الأعلى للمجلس العسكري ) بعضكم يعرف مين المقصود بهذا الاسم والبعض الثاني ممكن ما يعرفه . لكن للتبسيط هو ( ش . ز ) من بني أزد .
الأخ شكله شاف فلم من أفلام الاكشن الغربية اللي يطلع فيها شخص يترئس مجموعة قوية في مكان ما , ويحاول القضاء على باقي المجموعات اللي تنافسه واجبارها على العمل تحت مظلته وسيطرته .
نتعرف على الجو العام المحيط بالقائد الأعلى للمجلس العسكري :
الأخ محاط ببعض جلابين المحافظ , وهذول يذكروني باللي كنه نسويه أيام زمان , كنا زمان نربي حمام أسمه الجلاب أو الجذاب , وهذا النوع من الحمام نستخدمه بسرقة حمام عيال الحارة الثانية الله يذكرهم بالخير وين ما كانوا وللي يعرفون الحمام يعرفون أن هذا النوع عنده قدرة غريبة سبحان الله أنه يقردن فيها باقي الحمام ويضحك عليهم ويجرهم لصندقته وبعدها حنا نقوم بالباقي , واللي ما يعرف الصندقة تراها الزنقة اللي كان يقولها القذافي ( دار دار زنقة زنقة ) عشان ما ندخل بالسياسة خلونا بالجلابين .
الجلابين مجموعة من الأشخاص عندهم علاقات عامة وعندهم جليليبين صغار مساعدين للجلاب الكبير عملهم كلهم اقناع اصحاب المحافظ لإدارتها تحت اشراف الشبيح الكبير بنسبة من الأرباح تبدأ بين 25% إلى 50% وتبدأ النسبة مثلاً بـ 25% من الشبيح الكبير ويقوم الجلاب يحط عليها 10% وتصير 35% ويقوم الجليليب بزيادة 5% على نسبة الإدارة , ويصير مبلغ الإدارة كامل 40% وهنا يتم الاتفاق مع الخروف راعي المحفظة على الإدارة بنسبة 40% رغم أن الغبي البعيد لو وزع محفظته على بعض شركات السوق وخصوصاً اللي ما طلعت راح يربح ربح كبير بإذن الله ولا هو محتاج لشبيح ولا لغيره .
خلصنا من الجلابين المحيطين بالشبيح الكبير ونجي للمهايطية المحاطين بالشبيح
الشبيح الكبير محاط بمجموعة كبيرة من المهايطية وتكلمنا عنهم بموضوع سابق , هذول المهايطية شغلتهم عمل البروبجندا للشبيح الكبير , ومن الأمثلة على البروبجندا أنهم مثلاً تقول أبي شبيحكم يدير محفظتي وترا محفظتي ما فيها إلا 10 ملايين ريال , يرد عليك المهايطي ويقول محفظتك صغيرة للأسف وما راح نقبلها لأننا ما ناخذ محافظ أقل من 50 مليون لكن عشانك راح أقنع الشبيح الكبير أنه يضيفها لمحافظه
مثال اخر عن المهايطية إذا اجتمعوا مع ناس ما يعرفونهم , يقولون تصدقون أن اليوم الوليد بن طلال ولبنى العليان وبل جيتس كلموا شبيحنا يبون يحطون محافظهم عندنا عشان نديرها وأعتذرنا منهم .
اعطينكم الجو العام للشبيح الكبير عشان تتعايشون معانا بالموضوع , ونرجع لبداية الموضوع .
قلنا أن الشبيح الكبير أكيد شاف فلم وتأثر فيه كثير وقرر ضرب باقي الشبيحة لتفريقهم ومن ثم السيطرة عليهم وعلى محافظهم . طيب كيف ؟
الشبيح الكبير قرر دخول شركات رخيصة ما دون عشر ريال وحولها مثل اعمار والجماعي وزين وعنده شركات وسط مثل نماء والكابلات والاحساء وسيسكو ومسك والصادرات وغيرها من اللي فارض سيطرته عليها إضافة لشرائه كميات متفرقة في كل شركة فيها شبيح من الشبيحة اللغير متحالفين معاه . لكن الحين خلونا بموضوعنا , قلنا انه دخل الاسهم الثقيلة والرخيصة والغرض من هذا التوجه هو ضرب أكثر من عصفور بحجر واحدة .
الغرض الأول هو ضرب باقي الشبيحة بالشركات الثانية اللي اسعارها عالية بحيث مثلاً في حال تحرك سهم مثل فيبكو قام بتحريك الشركات الثقيلة والرخيصة لسحب السيولة المضاربية اليومية من فيبكو وكب اسهمهم على شبيح فيبكو واللحاق بالسهم الثقيل مثل اعمار أو الجماعي أو زين وبالتالي سحب السيولة لأسهمه وجعلها تهجر الشركات الثانية وضرب شبيحته بكميات أكبر إضافة لقيامه ببيع الكميات التي يملكها بفيبكو في نفس الوقت اللي يرفع فيها الشركات الثقيلة .
الغرض الثاني وهو تجميعي وهو نفس الاسلوب , في الوقت الذي يرفع فيه الأسهم الثقيلة يقوم برش أسهمه في الشركات المسيطر عليها ليقوم البقية ببيع اسهمهم والتوجه للأسهم المتحركة الثقيلة وبكذا يكون جمع كمية أكبر بسعر يريده
طبعاً كلنا نعرف ملهي الرعيان أو الشبوط . العصفور اللي يشغل الراعي عن غنمه ويقعد يلاحقه وينسى الغنم والبل .
اخونا استخدم الاسهم الثقيلة مثل ملهي الرعيان عن الاسهم اللي يجمع فيها .
واخر ما توصل له لضرب باقي الشبيحة قيامه بالدخول المفاجئ يوم الثلاثاء على أسهم البتروكيماويات الثقيلة مثل كيان وينساب حتى يوهم المضاربين بأن القطاع تحرك فيعمدون لبيع اسهمهم في الشركات الاخرى ومن ثم اللحاق بالقطاع ونجح فيها نجاح كبير لأنه يراهن على حركة ما يعرف بالقطيع مع كامل الاحترام والتقدير للجميع .
اللي ساعد الشبيح الكبير بشبه السيطرة الأكبر هو تفكك باقي القروبات هو كثرت المشاكل بينهم مثل قروب المطاوعة يوم متزاعلين ويوم متراضين كنهم بمدرسة . والغريب أن المطوع داخل معه بصدق والرجال ناوي يفرقعه , لكن تراك تستاهل أحياناً عندك حركات مالها داعي وما ودي أذكرها عشان ما أحرجك , لكن إذا استمرت راح أكون مجبر على كتابتها ، اثقل وإذا الله كاتبلك رزق بتاخذه غصب عن الجميع , ولا تصير طماع واشبع من يدك .
قبل ما انسى ترا يا ملاك فيبكو أبو ضروس دخل سهمكم والله يستر أن صملوا متراضين فالهدف بعيد أما إذا رجعوا يتهاوشون فترى السهم صورة طبق الأصل من المرة الأولى . لكن الغريب يا مطوع أنك اتفقت مع ( ف . ح ) وأول ما ارتفع السهم الرجال قال المارية الغفلة بمحافظ يديرها . ما علينا ما ودي أصير فتان .
نرجع لموضوعنا ونكمل عن حالة القروبات اللي ساعدت الشبيح الكبير بالسيطرة
قروب ( ف . ح ) اللي ماله خاتمة يتفق اليوم معاك وثاني يوم وهو كاب عليك من محافظ الحساوية .
وقروب ( ب . ع ) واغلب شغلهم تأمين بتأمين واللي يميز الحبيب أن ثلاث محافظ عنده كسبانة و97 محفظة خسرانة وتنسحب من عنده .
وقروب الرياضي والعقاري , شغلهم ممتاز جداً وخصوصاً بالتأمين لكن مشكلتهم المدرس السوري ما تدري هو مع مين فيهم وقاعد يحوسهم .
وقروب ( ح . ق ) يسيطر على سهم وباقي الإدارة على قفا الشبيحة
والأخ ( ج . م ) الحقيقة لليوم ما أدري وش يبي وقلب راسي .
وأمثلة كثيرة عن القروبات ساعدت الشبيح الكبير على السيطرة على كثير من الشركات . إلى درجة أنه فعلاً صدق نفسه أنه هو السوق واصبح يزعل إذا أحد رفع شركة بدون الرجوع له واخرتها الأسبوع الماضي بوحدة من الشركات .
طبعاً بصفتي مستقل وليس محسوب على أحد بإذن الله متى ما شفت من شبيح لف ودوران بالسوق وممكن يأثر بالسلب على صغار المضاربين راح افتح له متابعة يومية ولا أخليه يتنفس بشركة من شركاته , وأقولها وأنا والعياذ بالله من كلمة انا قادر على فعلها بإذن الله . شبيح كبير شبيح صغير كلكم عندي بميزان واحد .
الأخ القائد الأعلى للمجلس العسكري نسى أن فيه مقولة تقول أن السوق سابك وسابك هي السوق , وجرب بنفسه قبل ثلاث أسابيع حاول يرفع سابك عشان يسوي نفسه صانع سوق وقعد يفاحط بكل محافظه واخرتها طلعت معه ريالين وديورت عليه ويفترض بعدها أنه صحى من أحلام اليقظة اللي عايش فيها وعرف أنه مهما وصل عدد المحافظ اللي عنده فهي لا تنفعه إلا بشركاته وبالنسبة لمؤشر السوق لا شيئ ولا تحرك فيه نقطة واحدة طلوع أو نزول .
الخلاصة شغل المؤامرات ما لأم أهله داعي وكل واحد كاتب الله له رزق راح يأخذه والركادة زينة . وتراكم كلكم كتاب مفتوح ممكن كل يوم نفتح موضوع عن واحد فيكم ونكتب اسهمه وخطة سيره وأشياء ما تتوقعونها , استرزقوا وخلوا غيركم يسترزق
نرجع للحكمة الحضرمية ( كون نمل تأكل سكر , وكون جمل تأكل تبن )
ارجو ان تكون الرسالة وصلت للشبيحة .
في النهاية , نداء للي حول الشبيحة ( نناديكم بأسم الأنسانية ونخاطب فيكم الضمير , معي أني داري أن بعضكم معطي ضميره إجازة ولكن بعد العودة من إجازته نخاطب فيكم الضمير أن تنشقوا عن الشبيحة وتنضموا إلى جيش المضاربين الأحرار , وتسدحوا أخبارهم بالمنتدى )
وفقكم الله
المفضلات