بسم الله الرحمن الرحيم والسلام عليكم ورحمة الله وبركاته
استكمال لموضوعنا المقتبس وكما توقع الكثير بأن نتائج سابك مهما كانت راح يكون تأثيرها وقتي , وهذا اللي صار ولله الحمد
نرجع لموضوع السوق وكلامي الجاي كله في حالة السلم ان شاء الله حروب ما حروب لا سمح الله , المارية الغفلة
وش قدامنا والعلم عند الله ؟ قدامنا من الأسبوع الجاي مراقبة سابك والراجحي حتى يوم الاثنين القادم بحول الله وقوته فإذا كان الوضع مستقر وبنفس الكميات ما قبل اعلان سابك فهذا يعني ان الدعوة سلامات على الربع الاخير من 2011م من جميع النواحي . وندخل إلى عام جديد وبإذن الله عام خير وبركة على الجميع بما فيهم شبيحة سوقنا الأعزاء
ماذا لدينا ؟ لدينا ثلاث أمور لشركات السوق , شركات ستدخل في ركود وشركات في تصحيح وشركات في طفرة , وعشان يكون القصد مفهوم ستكون البداية من الاسبوع القادم ولمدة ثلاث شهور لذا وجب التوضيح من القصد لأن كثير من اللي يحبوني راعين الدبابات يدورون الغلط بالحرف هداني واياهم رب الهداية
دايم بعد اعلان النتائج يقوم مدراء الصناديق الاستثمارية بعمل تبديل مراكز لشركات الصناديق اللي يديرونها بناء على نتائج الشركات الحالية والمستقبلية من خلال قرائة أرقام الميزانية المفصلة , وعشان كذا نقول وش فيهم زود عنا ما نسوي اللي يسونه خصوصاً إذا كنا مستثمرين والا قاعدين يشخصون علينا انهم مدراء وفاهمين أكثر منا ! نفس الكلام اللي بالموضوع السابق المقتبس نطبقه الفترة القادمة ان شاء الله .
وراح اوضح موقف كثير من الشركات حسب معرفتي بأحوالها وراح اذكر كثير من الشركات عشان ما يقعدون شبيحتها يتبزرنون علينا ويقعدون يجلدون الطلبات او يكومون علينا عروض اذا ذكرت ثلاث او اربع شركات . وراح ابدأ بالقطاعات حسب ترتيبها بصفحة تداول .
البنوك ما يهمني فيها البنوك الاسلامية :
بنك الجزيرة اعتقد انه البنك الوحيد من البنوك الإسلامية المستفيد من حركة الأسهم الفترة القادمة بإذن الله لأن اعتماده على عمولات التداول مازال يمثل جزء كبير من أرباحه إضافة إلى ان البنك بعد النتائج الماضية اللي كانت بترند نازل عكست الاتجاه وصارت في ترند طالع حسب النتائج المعلنة في الربعين الأخيرة وهذا يوحي بأن التصحيح في نتائجه انتهى إضافة إلى انه يملك احتياطيات حسب مو موجود في قوائمه المالية تخوله أن يرفع رأسماله بواقع سهم لكل سهمين كأقل تقدير عشان يقدر يكبر محفظة الأقراض المتنامية , ويعتبر من افضل الفرص الاستثمارية في القطاع ولن يبقى تحت العشرين والعلم عند الله .
الراجحي , السهم من الناحية الاستثمارية يأتي بالمرتبة الثانية بعد بنك الجزيرة حتى وان كان يعاب عليه انه هرم والنمو عنده بطيئ بعد دخول البنوك الاسلامية الجديدة واخذت من حصته في السوق إضافة إلى ان احتياطياته شبه استنزفت . ولكن المشكلة اللي راح تواجه ملاكه أن القيمة السوقية للسهم لن تعطي كثير نظراً لتأثيره الكبير على المؤشر ويستخدم بعملية الموازنة بينه وبين سابك حسب الحاجة .
بنك البلاد , لو يقفلونه كان احسن ماخذ مكان بالشاشة على الفاضي , وما عنده أي ميزة في الحياة إلا انه ذنب للبنوك الاسلامية اذا ارتفعت ارتفع معاهم واذا نزلت نزل معاهم ولا تدري وش يبي يعني مع الخيل يا شقرة واحس ان اللي يشتري فيه ما عنده شخصية مستقلة , ودك يقهرني وينطلق من السبت .
مصرف الانماء . هذا المصرف وسبق ذكرناه أكثر ما يعيقه الناس اللي تاخذ قروض ومرابحات لأنهم كلهم او الغالبية يشتري بالسهم ويرجع يبيع عشان يستبدل لكاش لضيق التذبذب السعري وهذا اللي مأكله هوى وداعس عليه تحت العشرة رغم ان البنك داخل السوق (فيرجن) ما عنده مشاكل ومازال استدعاء رأس المال محدود لمصاريف التأسيس وما شابهه والارباح لابآس فيها لكن من عيوبه ان إدارته بطيئة في اتخاذ القرار وقاعدة تفوت على نفسها فرص كثير في السوق سواء من البنك نفسه او ذراعه الاستثماري شركة الوساطة .
قطاع الكيماويات : هذا القطاع لازم نكيف انفسنا ان ارباح 2010 و 2011 ننساها شوي بسبب المشاكل الاقتصادية العالمية ونتعايش مع الواقع ولا يطلع مطفوق الربع الجاي ويقول الارباح دون المتوقع مسوي فيها بيت خبره ! السوق لمنتجاته ضعيف ولازم تنزل من اسعارها عشان تمشي بضاعتها وخصوصاً ان اكثر شركات القطاع بما فيهم سابك تعتمد على البيع للصين مع حق الصين البيع لأوربا وأوربا متعلقة بأزمتها مثل ما تعلقنا بفيبكو يعني الطلب راح يكون منهم بالقطارة . نبدأ بشركات القطاع .
كيمانول . ميزة السهم قلة اسهمه الحرة والشركة تحقق ارباح ومطمع للشبيحة وحالياً السهم فيه شبيحة ولليوم ما طلعوا منه .
بتروكيم . طلع مقلب لكثير من الناس اللي كان تتوقع ان نتايجه جيدة لكن ممكن يخدم السهم مضاربه ( ي . س ) غير كذا نسى الموضوع .
سابك الشيخة . هذا اذا قالوا سهم الشيوخ , سابك مثل ما ذكرنا سابقاً السهم مو لنا والدولة ابخص فيه يضبطونه حسب الوضع العام وولي الأمر يعرف مصلحتنا .
اللجين فيه شبيحة يجمعون فيه من اسبوعين لكن السهم نتايجه زي وجه والدخول فيه لازم يكون بعد استقراره علماً ان معدلات الشبيح 17.60
نماء سبق اشرنا للسهم والشبيحة ما زالت كمياتهم الكبيرة موجودة واعتقد يحتاجون لشدة ثانية إذا لهم نية الخروج من السهم وحسب كلامهم 14 لكن ما يهمنا كلامهم وعينا على الشاشة .
المتقدمة يمكن افضل ما بالقطاع لأن شبيح السهم الكاش عنده كبير والنفس عنده طويل .
قطاع الاسمنتات يعتبر افضل القطاعات الاستثمارية خلال عام 2012 نظراً لأن كل شركاته شبيحة على المواطنين دون حسيب أو رقيب ووصل كيس الاسمنت في بعض المناطق لسعر 20 وانعكس على نتايجه الايجابية هذا الربع وأكيد الربع القادم .
اسمنت حايل الشبيحة فيه شغالين على قدم وساق وما يشبعون لكن ما ندري وش الاهداف .
اسمنت الجوف مازالت محافظ كبيرة للشبيحة بالسهم ومجمدينها واعتقد والعلم عند الله انهم راح يحركونه مع حايل .
اكسترا السهم يدار من صناديق البنك الأهلي بالتعاون مع أحد الشبيحة , ولا تستغربون لو سمعتو تطبيل لرفع رأسمال الشركة .
ثمار , أبو صالح وصاحبة العصمة أكيد راح يحتفلون بنتائج الربع الأخير لكن بالنسبة لي هذا السهم لا ينتهي التداول اليومي إلا وأنت شايته بوز رغم انهم يطبلون لتدبيلة .
فتيحي , يقولون شبيحته للمجد بقية .
الكهرباء , طبعاً هذا السهم يعتبر من الأسهم الدفاعية والمتوقع ان تتجه لها السيولة لأن ركود الأسهم الدورية يحرك السيولة للشركات الدفاعية , مو بكرة إذا بدأ السهم ان شاء الله يتحرك يطلعون المطافيق ويقولون تحركت الكهرب السوق خروج ! لأن تحركها في حالة ركود شركات البتروكيماويات طبيعي .
صافولا , ما عاد للسهم عذر انه يغرد بعد النتايج الجيدة .
الغذائية بؤرة الشبيحة وقرب الدور عليه وعلى ابداعاته .
حلواني مازالت محافظ كبيرة متعلق بالسهم ومثل ما علقنا تعلق الشبيح اللي علقنا ما عاد عنده سيولة ولازم يضحي بوحدة من شركاته ( الشرقية الزراعية او انابيب او حلواني ) عشان يوفر سيولة .
نادك , لليوم البكيراوية يحرجون على السهم ويقولون كسبنا القضية .
القصيم الزراعية . سعادة المشير قائد المجلس العسكري ما يعترف الا بالتدبيلات , والسهم ممكن يرتفع لكن ما اظن فيه عاقل راح يلاحقهم ولازم تعرفون ان المحافظ الكبيرة بالسهم معدلاتها ما تتعدى 17 يعني لو باع كم نسبة تحت كسبان .
تبوك الزراعية . مستخدمينها لتحريك القطاع بعد ما طلعت الهويميرة من السهم .
الشرقية الزراعية . قرر انه يركز عليها وبدا يحرج عليها .
الجوف الزراعية ايضاً تستخدم لتحريك القطاع من سعادة المشير .
جيزان . محافظ كثيرة خرجت من السهم لكن ابو نايف مسيطر على الوضع رغم انشغاله بسولديرتي .
المتكاملة . راح تصير مرجيحة الفترة القادمة ويبيلها صيادة .
التأمين كالعادة نطمره .
المصافي . باقي كم محفظة للمطاوعه ومسلمين امرها لله .
الاحساء . سبق ذكرناه مع نماء والشبيح بعد اعلان خساير السهم شال كميات كبيرة لين طلعت الأسهم من خشمه .
معادن محافظ استثمارية كبيرة دخلت السهم قبل الاعلان واكيد على بينة .
فيبكو , نظراً للظروف الخاصة للسهم لن نفصل عنه ولكن الأمور ان شاء الله جيدة حسب متابعتي .
معدنية , الشبيح يقول انتظروا وبتلاقون خير كثير .
الصادرات , انتهوا من التجميع الجديد وجاهزين للانطلاق في أي لحظة .
اسلاك . السهم جاهز من زمان لكن اللي ذبحهم كثر التوصيات وضروا انفسهم وضروا السهم ودخول شبيح كبير على الخط .
الجبس . قائد شبيحة السهم الدكتور الاقتصادي المتشنج كل ما سألوه قال حتشوفوا الستين بعيونكم , طبع حسب معرفة سابقة الرجال خذ وخل .
الكابلات , نفس شبيحة الصادرات ومبروك يالعطوف جاكم شبيحة لكن ما ادري عن النتايج بعد اللجين وسيسكو ولد زينل لاعب لعبته وما لقى من يرده الأمل بالله ثم بشبيحة السهم .
صدق , سعادة المشير نشط المحافظ الجديدة بالسهم ومطوع فيبكو يحرج على السهم وصار مكفول بعد ما كان كافل .
اميانتيت ذكرناها سابقاً ويقولون على وعدنا 18
انابيب نهاية رجل شجاع .
العقارية الشبيح مصمم يناطح الديناصورات بالسهم .
التعمير . شبه انتهت الاتفاقية بين المضارب الرئيسي للسهم مع الشبيح اللي رفع السهم .
مدينة المعرفة . سهم الخالة الله يعطيها طولة العمر . أكثر ما اعاق السهم الفترة الاخيرة هو تناوب الشبيحة على السهم ونفضل المضاربة على السهم في الفترة القادمة حتى يستقر بغض النظر عن ارباحه ثم نعود للاستثمار في السهم حتى يحقق اهدافه القادمة ان شاء الله .
البحري . اصبح السهم مغري للفترة القادمة وخصوصاً بعد ركود شركات البتروكيماويات وكذلك ارباح السهم .
مبرد . سعادة المشير طويل بال في التصريف على السهم ولا ننصح فيه في ظل وجود الفرص بالسوق .
تهامة , سهم القطية . السهم دخل في مرحلة خسائر لكثير من محافظ الشبيحة فتحت 65 السهم خطر على محافظهم .
شمس . شمس بيني وبينك , السهم جاهز من اكثر من شهر ومن الفرص النادرة في اسهم المضاربة .
هذا مجمل ما لدينا عن شركات السوق والبعض راح يقراها سوالف والبعض ممكن يستفيد منها والبعض راح يقراها توصيات والبعض راح يعرف وضع سهمه من خلالها وكل واحد بطريقته.
حاولت قدر الامكان جمع كل مواضيعي القادمة بموضوع واحد , وهذا لا يمنع ان تكون هناك مواضيع ان شاء الله حسب المستجدات في الساحة .
=======
في هذا الجزء هو رسالة لقروب أبناء القبيلة رغم أنكم في نظري كلكم شبيحة وتضرر منكم الكثير , ولكن في نفسي لا أحمل على واحد منكم ذرة من الحقد أو الكره رغم تضرري ولكن لازم أقول مافي خاطري واخوكم من الناس اللي بقلبه على لسانه .
يا سيد ( م . ح . ن . ح ) انت حديث عهد في سوق الاسهم ولولا الله ثم اخونا الشبيح ( ن . ح) ما كان احد عرفك او سمع فيك لأن له الفضل بعد الله انك عرفت الف باء المضاربة وادارة المحافظ ومع ذلك لم تحفظ له ذلك وطمعك وكثرة الناس حولك جعلكم تستغلون طيبته في اشياء يمكن هو ما يعرفها لليوم
والنتيجة تناطحتوا يالمطاوعة وكلكم خسرتوا وتعلقتوا وغير اللي خسروا معاكم في فيبكو وانابيب وحلواني والشرقية. وقاعدين يدعون عليكم .
وانت تعتقد انك أن تحالفك مع ( ش . ز ) هو الحل الأمثل ! لكن ابي اعطيك نبذة مختصرة عن ( ش . ز ) لا شك هو الآن سعادة المشير القائد الأعلى للمجلس العسكري وامبراطور السوق حالياً بسبب الإنقلابات اللي قادها ضد كثير من رؤساء القروبات وأصبحوا كلهم تحت مظلته .
ويكفي أنك تعرف أنه بيوم من الأيام قاد انقلاب ضد ملك تقليب الأسهم اللي كان يدور كامل أسهم الشركة في يوم واحد وهو ( م . م . ق ) وهذا شهادة حق لله ثم للتاريخ رغم ان النجاسة تقطر منه لكن لا يمكن يمر على السوق فنان بالتقليب والتعليق مثله .
في يوم من الأيام كان ( م . م . ق ) عازمنا على مناسبة في جدة وكان واحد جالس جنبه ومتلطم بشماغ وما ادري مين هذا الشخص ؟ واسأل واحد من الجالسين واقول له مين اللي جنب ( م . م . م ) قال هذا ابليس جاي يرتب على سهم معه ! ابليس بكبره داخل قروب مع (م . م . ق ) ! وشوي وهم يتوشوشون ويرتفع صوت ابليس واسمعه يقول خاف ربك يا أبو أحمد !
ابليس أمن بالله ويذكر أبو أحمد بربه من اللي ناوي يسويه في السهم . هذي نبذة عن ( م . م . ق ) وتخيل أن ( ش . ز ) قدر يسوي انقلاب عليه ! يعني أنت ما تاخذ معاه مسج ويشربكك , واخرتها على رصيف السوق .
ارجو ان تكون الرسالة وصلت . وان كنت ناوي تستمر بالسوق امامك حلين يا انك تشتغل لحالك وتجيب مستشار لك يعلمك كيف تلعب مع اللعيبة وبسرية تامة , طبعاً إلا اخوك شربكه لازم يعرف أو أنك ترجع تعتذر لـ ( ن . ح ) وتكمل معاه الطريق رغم ان ابو ضروس جلدنا بفيبكو لكن هذا شي وهذاك شي ثاني . وتأكد أن ( ن . ح ) رغم أنه تشربك بشركاته إلا انه قادر على العودة مرة ثانية لأنه شخص محبوب أكثر منك ولسانه معسول ، وأنتم الاثنين في نظري شبيحة مثل ما قلت أول
وفقكم الله
المفضلات