بسم الله الرحمن الرحيم والسلام عليكم ورحمة الله وبركاته
تخبرون اخوكم لازم يعطيكم تفاصيل التفاصيل عشان تعيشون الأجواء اللي أعيشها في بعضات الأيام
أمس وأعوذ بالله من كلمة أمس وإلا مالها دخل . أمس اتصلت على واحد من أصدقاء الحارة القدامى الأوفياء لكن مع طفرة الأسهم الله فتحها عليه وصار شبيح يشار له بالبنان أبو ظفر مكسور وإلا مو معقولة تشير لشبيح بأصبع مسويله بودي كير ومناكير
المهم اتصلت عليه واسمع أصوات تلفونات وأجهزة تخترش عنده كني داق على غرفة عمليات الدوريات . المهم قلت يا الدحمي وش ذا الصجة اللي عندك قال تعال لي بالبيت ماني مركز معك مشغول شوي .
طبعاً لو ما قال تعال راح أقول له أني جاي اتقهوى عندك . تخبرون الاجازة قربت وندور توصية نطلع منها مصاريف الاجازة المهم رحت عنده للبيت لينه قالب الخيمة غرفة عمليات تلفونات ولاب توبات وجهاز برافو وناس معاه على الاسبيكر والدنيا مقلوبة ناقصة يلبس مموه , قلت بس الحرب قامت بالخليج ومالها إلا هالتفسير والا وش ذا الخرشة اللي صايرة عنده ووش مطلع التلفون الاسود أبو قرص , الدعوة ما يبيلها ذكاء كل شي بالخيمة يذكرني بحرب حتى صوته وضحكته فيها شي .
ما علينا سلمت على الرجال وقلت وش ذا يالدحمي قال كله من المتكاملة قلت وش متكاملته قال سهم المتكاملة قلت وش فيه قال الجبان رشنا ب 3 ملايين سهم وحنا طلعنا 3 ملايين سهم قلت كل هالحوسة عشان سهم قال أنتم يالصغار وش يدريكم عن اللي نسويه قلت طبعاً ما ندري نشوف مكافخ بالشركات ولا ندري وش السالفة . قلت طيب وش بتسوون مع الجبان . قال ما نبيه يرجع للسهم وناوين نوديه بالعلالي قلت يعني وين قال راقب الشاشة قلت لاني مراقبها ولا شي الله يقويكم وسهم فيه هواش ما نبيه نبي ندور غيره قال باقي فيه رزق قلت الله يرزقكم لكن عندك غيره ما قفل نسبة عطناه أخوك يبي 10% ومو طماع .
قال قلبك قوي ؟ نظرت له شذراً . قلت يالدحمي أنت عارفني من أيام الحارة وأنا بالصف الامامي والأوسمة بمقدمة رأسي شاهدة عليً لليوم . واستطردت يالدحمي
أنت تدري أن اللي بين حنايا صدري شلته وركبت بداله حصاة ! دنق رأسه الدحمي أبو دقيقة ويوم رفع رأسه إلا وعيونه اغرورقت بالدموع ويضرب على كتفي اليمين ويقول لله درك يا شربكه عنديلك سهم يدسم شواربك .
قلت بنفسي دموع ولله درك ! مرحبا تعليقة .قلت يالدحمي سهمك وشهو من لحية ؟ لله درك ما طمنتني ! ترى بيدخلون معي ناس يتاما وأنت داري أن الله قال فأما اليتيم فلا تقهر . ولا تخلي ذنبهم برقبتي . المهم انقلبت طرار وقعدت احزنه واجيبله كل الأحاديث والاقوال عن اليتاما .
قلت يا الدحمي لو أنا بلحالي راح ادخل السهم ترى ما همني وخبرك فيني شرس . إيه معليش قال شفت ذا الحوسة اللي عندي تراها ما هي للمتكاملة لحالها وتراني قاعد أجهز لقنبلة 2012 قلت يا أخوك مابي قنابل أبي 10% فقط لاغير البتة قال ولك مني عشرات بالمية لكن قوي قلبك وخليك صياد بالبطانيج قلت لا يهمك اطلع اليتاما ب 10% واقعدلك قراد بالسهم قال اجل من بكرة ان شاء الله اقلط معانا بفيبكو ودع القيادة لنا وتمتع بالرحلة . قلت تم
وفقكم الله
|
 |
 |
|||
 |
 |
||||
رد مع اقتباس
المشاركة الأصلية كتبت بواسطة NaYeF
ماتنلام يوم تغني فيك شربك شرابيك 
المفضلات