بسم الله الرحمن الرحيم والسلام عليكم ورحمة الله وبركاته
الحمد لله أنكم هلميتوا .تركتكم أكثر من أسبوع تكتبون على كيفكم وتفتحون مواضيع وما قلت شي ولا رديت ولا على موضوع والحين جا دوري وبكتب كل اللي بخاطري والموضوع اللي راح اتكلم فيه عن الوضع للسوق في 2011م والوضع الجاي ان شاء الله في 2012م
ندخل بالموضوع على طول والقرقر فيه كثير لأن السوق في 2011م مميز جداً وفيه مكاسب كبيرة ولله الحمد في كثير من الشركات ما عدا الخشاش سابك وبناتها واخواتها من القياديات
ونصيحة للي ما حقق على أقل تقدير 30% في 2011م يختار أحد الخيارات : إما ان يحط قريشاته في سهم مكرره ممتاز ويوزع عوائد نقدية جيدة ويتفرغ لشغله ولعياله وإما أن يترك السوق ويدور استثمار في مكان ثاني ويعتزل السوق وراح نسويله بالمنتدى حفل اعتزال أحسن من حفل الدعيع
طبعاً قريت مثل ما قرأ غير بالمنتديات أو قابلنا في حياتنا اليومية ناس كثير نحسبهم من العقلاء وباذن الله هم منهم في كتاباتهم أو في كلامهم نبرة خوف وحرص زايد وصار عندهم السوق للنزول أقرب من الطلوع وبقوا طول السنة بحيرة من أمرهم ما ينلام عاقل وقد لعبوا فيه الشبيحة ! واختاروا من مبدأ السلامة الأسهم اللي يعتقدون أنها أمنة والنتيجة نهاية السنة توزيع نص ريال قيمة علك حار .
ومن الجانب الثاني ناس تطامر ورى اللي يطامرون ويقولون الموت مع الجماعة رحمة والنتيجة بعضهم من زود الدراهم بيت جديد وسيارة جديدة ودلع نفسه وعياله ويمكن زوجة جديدة الله يباركلهم باللي رزقهم
المراد من الموضوع اسواق المال احياناً ما تحتاج لعقل زايد الا بحدود لأن العقل الزايد يضيع عليه الفرص ولازم تركب الموجة وين ما كانت اسهم مضاربة اسهم قرمبع ما تكون خاسرة من رأسمالها وتأمين للي يشتغلون بالتأمين . يعني اتبع السيولة وين ما راحت .انتهينا من 2011م ندخل على 2012م ونشوف وش قدامنا بحول الله وقوته .
في عام 2012 قدامنا ثلاث سيناروهات محتملة ولازم ننتبهلها زين عشان نشوف وش حنا عليه :
السيناريو الأول : ان تكون نتائج الشركات القيادية جيدة وتتفاعل مع نتائجها وهنا نقول للشبيحة فرصة سعيدة وخلونا نشوفكم مرة ثانية ونتركهم بشركاتهم ونروح مع صناديق البنوك والديناصورات ونختار الشركات حسب الأفضل بالنتائج . وما يمنع قليلاً من الشركات الصناعية الخفيفة والوسط شغل مضاربة
السيناريو الثاني : ان تكون نتائج الشركات القيادية جيدة وما تتفاعل مع نتائجها وهنا نرجع للشبيحة ونقول وحشتونا ووين هالغيبة وممكن نغنيلهم والله واحشني موت . حسب الامكانيات الصوتية . ونروح للشركات الصغيرة اللي ما تفاعلت الفترة الماضية والشركات الوسط لأن راح يكون فيه تبديل مراكز نتكلم فيه ان شاء الله بوقته
السينارو الثالث : ان تكون نتائج الشركات القيادية دون المستوى لا سمح الله وهنا والعلم عند الله تأثيرها ما راح يكون مخيف او يدعو للقلق وراح يكون تأثير وقتي فقط . وفي هذي الحالة راح تدخل الشركات القيادية في سبات جديد . ونتبع السيناريو الثاني مع اصدقائنا الشبيحة
ليش قلت هالكلام ؟ سؤالكم وجيه . قولوا مين سئلك اصلاً عشان تجاوب ! معليش مشوها واعتبروني ملقوف . التوجه العام ان يبقى السوق ممسوك ولا مجال للانهيارات ومافيه مانع نراوح بين 300 نقطة نزول وطلوع مالم يكون هناك لا سمح الله أمراً جلل مؤثر تأثير مباشر على الإقتصاد الداخلي بصفة عامة طبعاً سالفت التوجه العام هي معلومة غير أبومحمد
وبعدين لازم نترك بعض الثقافات في السوق اللي ما وراها إلا الخساير مثلاً : سهم عنده مشاكل خاصة فيه ونزل نسبة تحت وسهمي بشركة ثانية مال أمها علاقة بذيك الشركة أو علاقة بقطاعها ، أبيع ليش ؟!! وإلا من باب اضرب ما أدري أيش يخاف ما أدري ايش ثم رجع اشتري سهمي بسعر أعلى من بيعي !
والمشكلة الثانية يجي واحد يشتري سهم وضعه ممتاز سيولته عالية طلباته قوية مايسهر بالاستراحات ولا يسافر المغرب يعني السهم كامل ومكمل ويترك الطيب السهم ويقعد يراقب المؤشر ولا يراقب سهمه !!! ليش يا الطيب أنت شاري سهم وإلا شاري السوق كله .
واللي يرفع الضغط وتكلمت عنهم قبل بموضوع ثاني اللي يبيعون قبل الاغلاق بدقيقة أو دقيقتين ! تقول له يا الحبيب ليش البيع بهالتوقيت يقولك مضارب يومي يالحبيب تراك فاهم المضاربة اليومية غلط عندك أكثر من أربع ساعات تداول وتبيع اخر الثواني يعني ممكن تنزل القيمة السوقية لسهم بعشرات الملايين ! اللي مثل هالنوعية أعرف انه ماله علاقة بالاسهم يسمع بس أن فيه سوق أسهم ودرعم بالسوق من غير استراتيجية ومستخدم شختك بختك اشتري سهم وانتظر لأخر السوق واذا ما ارتفع لأخر دقية بعناه . اللي يعرف مثل هالعينة زي ما قلنا يمسكة ويحطه بخيشة وينطله بصلبوخ عشان ما عاد يدل السوق مرة ثانية .
نطلع من موضوع وندخل لموضوع ثاني يخصوص الشبيحة .
مثل ما تعرفون أن كثير من الشبيحة متعنقطين ومتعلقين باسهم الزراعيات ويدورون طريقة للتصريف خصوصاً بعد التدبيلات ! وشبه اتفقوا على موضوع تحريك القطاع كامل لسهولة التصريف وهنا راح يحمى الوطيس وتبدأ المضاربة اليومية وخصوصاً للذيابة مثلي نعم الشغلة يبيلها ناس شرسة تاكل البطاطس بدون كتشب وما تحلي بعد الغدا . اما الهواة أشباه المحترفين والله أني لهم من الناصحين ابتعدوا عن الأسهم المرتفعة بطريقة جنونية والمدبلة منها لأن التعليقة فيها راح تطول كثير وتحتاج لوقت طويل والجماعة تبي تغير مراكز.
هذاني نصحتكم لا يجي بعدين ونلاقي ناس فاتحة مواضيع وش رأيكم بالسهم الفلاني سعر مشتراي 100 وهو طالع من 20 لأنكم راح تشغلون المنتديات وتثقلون على السيرفرات وبدون نتيجة فخذوها من قاصرها وابتعدوا عنها .
ونجي للأهم وهي الشركات المهدد بالايقاف هذي الشركات تفر منها مثل ما يفر الغزلنجي من جمس الهيئة ولو عندك مليون معلومة عن السهم انه راح يمشي مليون نسبة ! واسألوا أهل بيشة كم كانت أهدافهم واسألوا أهل بيشة كم صارلهم بالحجز .
طبعاً وتوقعوا يجيك رد يقول يا اخي راعي مشاعر ملاك السهم ! الحبيب داخل قصة حب مو داخل سوق أسهم . لازم تحط ببالك ان اسواق المال أرقام ماهي عواطف أو نوال أو سوسو
ونجي للي راح تشوفونه من بكرة بالمنتديات أنواع التطبيل يجيك واحد ويقول السهم الفلاني للمتابعة اللصيقة الأهداف بعيدة ! وينك يالمليح يوم كان سعره بـ 30 جايني اتابعه بـ 90 وطبعاً بتشوفون تحليلات فنية إذا اخترق 86 الهدف القريب 416 وين رايح يا ابو الشباب هو بقى اصلاً شي ما اخترقه وشبع اختراق ومن كثر الاختراق داخ وبيجي على علباه .
يعني نترقب ظهور معرفات الشبيبيح على وزن شليويح وفعيعيل . وهو ذنب الشبيح وهذي الأيام جا دورها
طيب وش عندنا جديد ؟ عندنا خير اللهم اجعله خير ثلاث أسهم تطبخ وعلى النار لليوم وقربت تستوي من الاسبوع الجاي ان شاء الله . لكن واحد بنتركه لجمهور النصر دام مافي بطولات يصير فيه فلوس على الأقل شي يغطي شي والثاني أول ما يصدر عنه أخبار جديدة بنسدحها والثالث عزوز راح يعزمنا عليه
وفي شي دامني كاتب كاتب وفاتح موضوع خليني أذكره وهو ان بعض الشركات الاسبوع الماضي ارتفعت بونش طبعاً كلكم تعرفون معنى الونش وهو إذا تعطلت سيارتك تتفق مع ونش يسحب سيارتك من مكان لمكان وإذا وصل سيارتك للمكان اللي متفقين عليه تحاسبه على المشوار . لعب فيني عبود هو اصدقاه اللي بالاستراحة وصارت ثقافتي ثقافة مكانيكية وورش سيارات . ما علينا المهم كان فيه راعي ونش مشهور يقال له أبو محمد لكن الله فتحها عليه وصار عنده سطحة وباع الونش لشخص ثاني .
وعلى العموم الونش سحب المتكاملة والاحساء وبصراحة الشركات اللي تنسحب بالونش الواحد يصير مضارب فيها أفضل من الاستثمار على الاقل الفترة الحالية لين يصلحونها بالورشة
وقبل ما اختم الموضوع ما في شي اسمه السوق خروج أو دخول واللي نعرفه ان السهم الفلاني دخول والسهم الفلاني خروج وغير كذا ما نعرف . رغم اني شايف الضعف بالسوق يوم الأربعاء لكن واضح أنه صار عندنا فوبيا القمم والمرتفعات لكن ان شاء الله مع الوقت تروح . وشفنا الشهور الاخير بالسوق رغم ترنح السوق وتذبذبة البسيط إلا ان بعض الشركات دبلت مرة ومرتين . وفقكم الله
المفضلات