بسم الله الرحمن الرحيم والسلام على من اتبع الهدى
اخوكم شربكه صرخة سابقاً
هذا الشهر يعتبر الشهر العالمي لتلبيس الطواقي والشبيحة لاعبين لعبتهم وتلفونات تدهر من بداية السوق . يا ابومحمد اطلب 10 الاف على سعر 40 وشوي يدقون على ابو صالح يا ابو صالح حطينالك طلب على 40 بيع كميتك على الطلب . وطول اليوم الشباب على هالوضع وكم محفظة عندهم يوزراتها لزوم تقليب السهم . والخرفان او مثل ما يقولون اخوانا المغاربة الحولي ما يدري وش السالفة ينتظر هالتلفون يجيه وشغال دفع عمولات ! ما علينا ومالنا ومال الناس خلو كل واحد بحاله . واحاول ان شاء الله اطرح موضوع كامل عن علاقة الشبيحة بالخرفان وبالتفصيل . طبعاً اخوكم الفقير لله ناطل أذنه بكل مكان كله عشان عيونكم الحلوة وتصيرون بالصورة ومعاهم على الخط , نتوكل على الله ونسدح أوضاع بعض الأسهم لكن لا يجي واحد عاكس الخط وطامر الرصيف ويقول وش رأيك بهذا السهم وهو مو مكتوب لأني بكل بساطة راح ارد عليه واقول الله اعلم ولا يجي واحد ويقول كم الهدف لأني ما راح اغير أقوالي وراح أقول الله اعلم لان القصد ماهو توصية للبيع او الشراء لكن كلام ممكن يستانس فيه البعض وراح نبدأ بالترتيب حسب ترتيب جدول موقع تداول :
التصنيع داخله قروب جديد ينتظر خبر جيد للسهم سواء أرباح أو توزيعات قوووية الله ابخص لكن كلامه فيه خبر ينفع للتصريف
الصحراء ما حولك أحد تطبيل في تطبيل وأماني وما سمعنا او ذكرلنا أحد معروف في السهم
المتقدمة فيها مضارب نفسه طويل وأطول من خط الشمال يعني فيك صبر اصبر وألبد ما فيك صبر شوف غيره واسترزق
بترو رابغ فيها قروب نفس قصير ويعتمدون على التطبيل أكثر من الشغل
اسمنت الجوف فيها قروب قصمان ويكفي أن أبو عمر معاهم لكن قاعدين يطامرون رغم ان أهدافهم ما بعد تحققت وكمياتهم موجودة ورجعين للسهم
اكسترا اللي فيها يقولون البيع فوق 100 لكن وش علينا من القول نلبد ونراقب الشاشة
الحكير فيها لماح لكن باع وطلع من السهمامزح ما اعرف عن السهم شي
الغذائية فيها قروب وكمياته موجودة لكن فازع مع قروب بسهم ثاني يعني واضح انه ما حقق اللي يبيه
حلواني اخوان يقول راعيها الوعد قدام وحول 90 واليوم طلع خرفان وركب خرفان جدد . ووينك يالمتسلفة انتي قناصعك تسئلين عن السهم وهو جايب هاي سنوي ما ادري وش تبين
نادك البكيراوية يحرجون عليه ويقولون كسبنا القضية
القصيم مثل ما قلنا قبل فترة ما راح يطلعون قبل العشرين والله حق باقي كميات كبيرة عندهم وما طلعوا تهقون يلحقون براعي جيزان ؟ والا وش القصد طلعوا عشرين وما باعوا !
تبوك الزراعية مثل ما ذكرنا سابق قروب عيال الجنوب راحوا يفزعون مع الهويميرة ومازالو بالسهم
الشرقية الزراعية كل ما اتصلوا عليه قال على وعدنا فوق 100 والله حق داخلين فوق الـ 80 ريال وقلقانين على وضعهم ويخافون يركبون زحليقة
جازان مثل ما قلنا سابق أهل الرس كلهم قالطين في السهم وناس تركب وناس تطلع والسهم صار اصنصير
المتكاملة الأسهم طالعة من خشومهم من كثرتها لكن مدير السهم من اللي كان مكتوب في تابعيته زمان العلامة الفارقة نجس
التأمين نطمره ونشوف القطاع اللي بعده
المصافي الرجال قاعد يطلع خرفان ويحولهم لفيبكو
الاحساء تهاوشوا مع بعض وقرر راعي المصافي الطلوع من السهم ودخل مضارب جديد للسهم في حال ثباته يمكن يرجع لفوق 14
زجاج طبعاً ما راح يفيد معاه أي خبر وابوعمر لو تدخل عليه ما يفكك منه بعد الله الا صندوق سيادي أو على الأقل صندوق الاستثمارات العامة
فيبكو طلعوا خرفان وركبوا خرفان جدد يقولون الوعد حول 80 ما يمنع نراقب لأن الكميات عندهم كبيرة
معدنية قرر اليوم احد شبيحتها الخروج بكمياته لكن باقي شبيح موجود بالسهم ومعدلاته فوق 35
الصادرات شبيحة طالعة وشبيحة داخلة والتطبيل على قدم وساق يعني شغل شدة وبيعة
المعجل مجموعته اغلبهم منه وفيه واعلانات عقود جديدة بالطريق ولو واصلوا بكرة يعني الاهداف بعيدة
اميانتيت ذكرناه قبل اكثر من مرة وممكن تشوفه ب 18 بأي لحظة واللي فيه متمكنين منه ويعرفون دربهم زين
أنابيب الأولى ما في شبيح ما دخل في السهم ولا عاد تدري مين الشبيح الرئيسي لكن الجيد في الموضوع ان السهم رغم خروج كميات كبيرة مازال محافظ على وضعه وقوي
العقارية دخلها امس قروب واليوم دوروا كميات وما لقوا لكن مشكلة السهم فيه دانياصورات ما ينداسلها على طرف
مدينة المعرفة فيه موضوع مفتوح عنها نتابع فيه أخبار الخالة الله يطول عمرها
مبرد ما غيره ( ش . ز ) معشعش بالسهم شكل البراد عاجبه
تهامة أنواع الغباء في السهم ولليوم يدخلون خرفان تحت 70 ويطلعونهم فوق 75 لكن الخاتمة يقولون حول التسعين
شمس مضاربها باع جزء كبير من كمياته وسعادة المشير قائد المجلس العسكري متردد وخايف من الهيئة
لا يجي احد ويقول وش تنصحني فيه لأني راح انصحه بتقوى الله في السر والعلن ولأني خارط ام شركات السوق لملاك الشركات عشان يعرفون وش عند سهمهم ويقررون بناء عليه وفقكم الله جميعاً
اخوكم شربكه صرخة سابقاً
|
 |
 |
|||
 |
 |
||||
رد مع اقتباس
المشاركة الأصلية كتبت بواسطة شربكه
المفضلات