توضيح بخصوص سهم مدينة المعرفة (2)

[شربكه]

هماني قلت لكم على هالرابط السهم تصريف وصار تصريف


http://www.thegulfbiz.com/vb/showthread.php?t=346529

ثم رجعت وقلت لكم على هالرابط ان الفارس الخفي دخل السهم


http://www.thegulfbiz.com/vb/showpos...9&postcount=50

طبعاً ما كنت أدري وش سبب دخول الفارس الخفي للسهم لكن جدت معلومة عليه بالصدفة أمس دق علي واحد من اصدقاء الطفولة وأيام الحارة لكن الرجال مشكلته أنه عربجي بالفطرة سبحان الله من نعومة أظافره الشينة العربجة تجري في دمه .. هذا سلمكم الله يقاله (عبود) طبعاً اسمه الحقيقي عبدالله وما عرفت ان اسمه عبدالله إلا بالمتوسطة المهم عبود هذا من عيال الحارة القدامى أيام ماكانت الحارة حارة وعشان نتعرف على الحارة لازم نعرف أنطروبولوجية الناس في ذاك الوقت . واللي مايعرف معنى أنطروبولجيا فهي دراسة الثقافة والمعتقدات والممارسات البشرية زمان سبحان الله كان بزران الحارة ينقسمون لقسمين وهو السواد الأعظم في تلك الحقبة من الزمان فكان اما أنه بزر يمشي ويناشق ودايم يمش كمه أو بزر إذا تكلم يسعبل وهذا ينطبق على كل الحارات بدون استثناء حتى المسؤولين والوزراء اللي تشوفونهم وأهل البشوت كانو يا يناشقون وهم صغار يا يسعبلون إذا حكوا ولا تقولون وش ذا الحكي هذي حقيقة تم تغيبها في وسائل الإعلام المقروئة والمرئية والمسموعة لسببين الأول عشان ماتشوف المسؤول وترجع فلاش باك وتتخيله أيام الحارة وينضرب برستيجه والشي الثاني أن مثل هذي الوثائق لم يتم التطرق لها حتى لا تفسد إجتماعات اللجنة المختصة في إنضمام السعودية لإتفاقية (الجات) فمثل هذه الوثائق راح تخلي اليابانيين والأوربيين والأمريكان يكشون شوي منا ويخافون تنتقل لهم هذي الأنطروبلوجيا ويرفضون انضمام السعودية وحتى ويكليكس النسخة العربية ما تطرقت لهذي الوثائق . نرجع للموضوع لكن في بعض الحارات تلاقي بعض البزران لا يتجاوزون أصابع اليد الواحدة جامعين المجد من جميع أطرافه مناشق وسعابيل وهذول في الغالب يكونوا هم حكماء ودهاة الحارة واتوقع أن كثير من المسؤولين هم من هذي التركيبة وأيضاً كان بزران الحارة ينقسمون لثلاث أقسام من حيث شعر الرأس اما ان يكون أقرع وهذا الغالب والنسبة الكبيرة أو يكون له شعر كثيف وهذا دائماً ريحته قاز لأنه مايرجع قبل المغرب لأهله إلا وكل شعره علوك وخاصة علك طابع أو علك أبوخنزير ويشقي أمه بتنظيفه ومالها إلا قاز مزيل للعلوك وفي الغالب مثل هذي النوعية ماتطول بشعر وينضم للقرعان نظراً لتكلفة الصيانة لشعره . وجزء بسيط من عيال الحارة محلقين تواليت وفي الغالب هذي النوعية يكون فيهم عرق شامي أو مصري . اما نوعية القرعان تستطيع أنك تحدد منهم الشجعان من الذرقان وهذي تحتاج فراسة بسيطة وهي أن البزر اللي تجي فلقاته في مقدمة راسه تعرف أنه يواجه في حرب الحواري ودايماً في الصف الأول وفي مقدمة عيال الحارة أما اللي تجي فلقاته من الخلف فهذا النوع انهزامي ودايم منحاش من أرض المعركة . هذي مقدمة لمعرفة الجو العام المحيط بالأخ عبود واللي لليوم هو أسير تلك الأجواء ولم يستطع الخروج من جلبابها . عبود هذا وهو بالثانوية يعني صار يافع وفي عنفوان شبابه ما كان يأمن احد يغسل سيارته الـ 240 أل الذهبية اللون وكان يحرص رعاه الله أنه يغسلها بنفسه وما كان يلمع كفرات السيارة إلا ببسي قوارير من زود الدلع ويقولون محل الغاز اللي بحارتهم يكسب من الببسي قوارير أكثر من انابيب الغاز بسبب عبود وسيارته. وعبود هذا مشارك في كتابة ألفية السيارات الشهيرة أتذكر منها ( السي .. صار سدرك والفرش فرش كدلك ... والزد .. أكس بخاخ قومه زعاق وصراخ )
نرجع لموضوعنا الرئيسي دق علي عبود وقال وش عندك بعد العشاء قلت ما عندي شي وقال أبيك تروح معي للأستراحة عند الشباب عشان اتعذر فيك لأني ماني مطول عندهم قلت يا أخي أنتم استراحتكم باخر الدنيا والمشوار روحة ورجعة يبيله ساعتين خط قال لا الوضع تغير وفتحوا طريق حمزة وماراح ياخذ وقت قلت تكفى احدعش ونص لازم اكون بالبيت بإذن الله قال مالك هم ومادريت إلا وخمس دقايق ويتصل يقول أنا عند الباب اثريه داق علي وهو متخذ قرارأنه ياخذني معه وقريب من البيت وركبت معاه لين وصلنا الاستراحة ونزلنا ودخل قبلي وانا وراه وانكشف الجو العام للجلسة من المنظر الخارجي والله لا يوريكم لين واحد ماشاء الله طول بعرض تفصل منه دولاب درفتين وشنق للتطبيق ولابس فروة واصله نص ساقه وصايرة عليه شانيل ميدي ناقصه هيلا هوب وبوت . المهم وعبود يعرفهم علي ويقول جايبلكم واحد من حقين استراحات الشمال وقعدوا يضحكون الشيون والعير راعي الفروة ينكت علي يقول أنتم أكيد تطلعون الاستراحة وعشاكم همبرجر دلفري يوم قاموا يضحكون من قلب اثاري حقين الشمال مضحكة لهم وطبعاً انا لازم اجامل واوزع ابتسامات المناظر هناك ماتسمح أنك تخرج عن النص وبعد ما جلسنا لين سواليفهم كلها سيارات بسيارات قال الجربوكس وطاح عمود الكردان ولذعت الكتاوت ومن هالسوالف وحسيت أني سهران مع عمال بورشة في الصناعية ومن زين السوالف يوم غيروا الموضوع قامو يسولفون كيف كانوا يصيدون الظوطير بالنباطة وهم صغار ومادريت إلا بواحد منهم يقول وأسفابو على ابوفراس لو في بالأولميات رمية النباطة كان فاز بذهبيتها وحصل على النباطة الذهبية !! طبعاً أنا حسيت بغربة بهالاجواء والتفت على عبود قلت مين أبوفراس قال هذا واحد لليوم ونباطته معه وحريف لليوم بصيد أصغر الأشياء ولو هو فيه كان شفت بعينك لكن الرجال رايح عند خواله بمصدة وش مصدة ذي مدري ، الحقيقة تشوف وتسمع هالمخلوقات وجوهم اللغير طبيعي وتتفاجئ أنهم مسمين عيالهم أسماء شوام أجل راع النباطة أبوفراس الله يحلل أبو مهند عندهم . وشوي دخل علينا واحد أرتب شوي منهم وواضح أنه من زمان ماجاهم وقاموا يتشرهون على بعض وينك وماوينك ويالقاطع ومن هالحكي المهم مادريت بعد ثلث ساعة إلا ويقول ياشباب اللي عنده دراهم يشتري بسهم المعرفة طبعاً أنا ردت الروح فيني شوي وطلعت من حالة الغربة ولقيت واحد يتكلم مثلنا وطبعاً الأربعة اللي قاعدين ما يدرون أصلاً وش معنى سهم وماهو بقاموسهم لأن التفخ راعي الشانيل قال وش اسهم هذي قمار والتفت على صاحب المعلومة وقلت تصدق أني مكتتب بالسهم بـ 10 ريال وخسران فيه قال لا تفرط فيه قلت ليش وش عنده قال أمس نسيبي عندنا ويقول للوالدة ياخالة إذا عندك دراهم أو ذهب أحسن ماتزكين عليه وهو قاعد وما تستفيدين منه بيعيه وحطيه بالبنك وخليهم يشترونلك بقيمتها سهم مدينة المعرفة لأن السهم عليه أخبار زينة بالحيل وكل الكبارية يقصد الكبار القروي مشترين فيه وان شاء الله بتشترين بعد كم شهر ضعف ذهبك !! أفهموا شباب تدبيلة بكم شهر يعني استثمار .. قلت له سامحني على اللقافة نسيبك وين يشتغل قال بوزارة المالية . طبعاً تأكدت أن الفارس الخفي ما اختار هذا السهم بالتحديد إلا أن وراه خبر قوي ولازم نعرف وش ممكن يكون الخبر ونتساعد أنتم قريتوا معاناتي ومغامرتي مع عبود عشان بس أوصل لطرف معلومة وعشان تعرفون أن المعلومات ماتجي بالساهل ويبغالها كفاح وما اظن الرجال راح يوهق أم زوجته ببيع ذهبها وفقنا الله جميعاً

[لمّاح]

باختصار ,,

للي مستعجل وفيه النوم :

التوصية على سهم المعرفة وأنه بيجيب تدبيلة بكم شهر , والمصدر أحد موظفي وزارة المالية ,,


..

شكرا صرخة ,,

لكن هل تعتقد أن الموظف يجيب العلم ؟؟

يمكن أنوه في الحركة ,, خصوصا أن ربعه كلهم أهل ورش وسيارات ,,


..

[مضارب محت78رف]

الله يوسع صدرك بالعافية
والله اني اخرخر دموع اربع اربع حسبي الله على شيطانك.
اقول انت زعقة منتب صرخة

[مضارب الخليج]

و 7050
المتكامله

[DREAM]

صرخه
والله انك منسم
وحط نماء في بالك زين

[على نياتكم]

أنا اتابع مواضيعك تتبع
ماهمني اكسب همني اضحك
يااخي وش هالاسلوب
الله يوسع صدرك بالعافية
خطيييير
قاعدة احفظ مواضيعك بالمفضلة
طيرت عيون اللي حولي من ضحكي وبصوت عالي
الله يالدنيا
سؤال بسيط انت من سدير

[NOMERCY]

خل عنك بعد ماقلت ان الاسهم تصريف وللحين قاعدة تبدع طلعت علومك ماش سواليف وناسة وبس.... غيرة يفتح الله

[الشرق الاوسط]

تم تم تم تم
الصده في لغتنى الدارجه زواج ويمقن يمقن في لغتهم صده صدا يصدو صدا صيدا
وبس
وشكر لك كل الشكر

[Abu Basil]

ياحبي لك ياخلفهم والله يانك توسع الصدر......

[الله كريم]

جزاك الله كل خير واللى راح يدبل مضارب عالمي ينتمي الى فنيله العالمي

[كاترينا]

في بعض الحارات تلاقي بعض البزران لا يتجاوزون أصابع اليد الواحدة جامعين المجد من جميع أطرافه مناشق وسعابيل وهذول في الغالب يكونوا هم حكماء ودهاة الحارة واتوقع أن كثير من المسؤولين هم من هذي التركيبة

الله يذكره بالخير دحيم الزبده فل ابشن مثل ماتفضلت بس ماصار وزير

ممكن توضح الاسباب

[العطـوف]

ماقصرت اخي صرخه
والله يسعدك

[ابو براهيم]

باااااااااااااااااارك الله فيك

[طيب النية]

الله يغربل شيطانك ياشيخ صرخة

تسنك تحتسي عن حارتنا منول

وللتوضيح

ذي دمجة عبود

وذولا عيال النعمة منول

وذولا شلة الفصل

وذي ميتين اله

وذي السيارة اللي كانت حلم عبود

والتي كانت عقدة عبود لعدم حصوله عليها

مما جعله يحارب حتى اصبح يمش خشمه بالفاين بدل كمه
وبعد ماكان ياكل

صار ياكل

وبعدما كان هذا بيت الراحة

صار

وصار يجالس عيال النعمة اللي يجيبون اخبار السوق من فم الأسد

في خضم فوضوية السوق

وبمشيئة الله مع اخباريات عبود
نبي نشوف التدبيلات والتعويض

[طيب النية]

[AlhzEn]

مبرووووووك النسبه يا اخ صرحه



الله يهديك فتح السوق وانا جالس اقراء موضوعك ويوم عرفة السهم لقيتهااااا مقفل عليه الحارس


والله يرزق ملاك السهم كل خيرررررر

[Hope]

وما اظن الرجال راح يوهق أم زوجته ببيع ذهبها وفقنا الله جميعاً[/color][/size]

ظنك طلع في محله لكن مالنا نصيب الله يبارك لكم

[العطـوف]

ماشاءالله تبارك الله الف مبروك وماقصرت
شكله فعلن يحب خالته حيل

[عذبه]

الف مبروك

مامداني ابيع ذهبي

خيرها بغيرها ان شا الله

..

[Mac Man]

ماشاء الله مبروك لملاكها

[مضارب محت78رف]

ماشاءالله عليك تنبيه مهم في توقيته
انشهد انك نااااااااااااااصح امين
بارك الله فيك

[أيمن خالد]

ماذا عساني أقول فكل تفاصيل هذا الموضوع أبكتني منذ منتصف الليل وأنا أعيد قراءة الموضوع ولاأدري كم عدد تلك المرات ولكن أعادتني للوراء وجعلته واقعا أعيشه آآآه يا أيام الصراحة والصدق والنقاء وطول الصرخات والضحكات ورائحة رغيف الصباح فجر الشتاء ووعود الحلوى ,,, أعرف أنّه ليس مكان وليس وقت نثر هذه الكلمات ولكن صرخة جعلنا نبكي الماضي لأنه جعلنا نعيش تفاصيله فلم يكن موضوعه من كلمة أوكلمتين أوسطر أوسطرين ولم يمنحنا دقيقة أو دقيقتين بل ربما أكثر من ساعتين ومحبة خالصة تمثّلت في صدقه رغم سهولة الخداع أعادت لأعمال الخليج (وكر الصقور ) بريقه في زمن نعته البعض بالضياع ولكن عندما تظهر الصقور تختفي الضباع ,,, ويظل السؤال هل ماقلناه يكفي بحق صرخة ؟؟ عندها فليعذرني الجميع في المكان والزمان ,, ويبقى الدعاء بظهر الغيب لصرخة في الخفاء

[NOMERCY]

اعتذر منك سبقت الحكم على توصيتك لكن طلعت انت صح مبروك لملاك السهم النسبة

[مالها ألا رجالها]

ما مداني ابيع سيارتي ولكن حنا معك في السهم الجاي ان شاء الله وربك كريم

[alrajel]

صرخه من انت ؟؟؟؟؟؟؟؟؟؟؟؟؟؟؟؟؟؟

[شربكه]

باختصار ,,

للي مستعجل وفيه النوم :

التوصية على سهم المعرفة وأنه بيجيب تدبيلة بكم شهر , والمصدر أحد موظفي وزارة المالية ,,

..

شكرا صرخة ,,

لكن هل تعتقد أن الموظف يجيب العلم ؟؟

يمكن أنوه في الحركة ,, خصوصا أن ربعه كلهم أهل ورش وسيارات ,,

..

اساساً لو شفت وجيه اللي بالاستراحة تحس ان العالم كله تصريف مو بس الاسهم واللي دخل علينا وكنه ارتب منهم شوي ينقل عن نسيبه ويبي يفيد الكمخ لكن ما عندك أحد وبعدين كانت عندي معلومة نقلتها بالرابط فوق ان الفارس الخفي ( م . ص ) معبي محافظه بالسهم وكانت معلومته دبل تشك

الله يوسع صدرك بالعافية
والله اني اخرخر دموع اربع اربع حسبي الله على شيطانك.
اقول انت زعقة منتب صرخة

كنك داري ان وليد يسميني زعيقي عشان الهلال

و 7050
المتكامله

قلنا أول أن فيها خلايا نائمة وممكن يفجرون أي وقت يعني ألبد ولا عاد تجيب طاري السهم تراهم حساسين

صرخه
والله انك منسم
وحط نماء في بالك زين

نما قايلك قبل كذا قروب زغنطوط 10% وبعدها يدوخ يعني ركز معاي شوي والا اعطيك الموضوع واجب تحله وتجيبه بكرة معاك

أنا اتابع مواضيعك تتبع
ماهمني اكسب همني اضحك
يااخي وش هالاسلوب
الله يوسع صدرك بالعافية
خطيييير
قاعدة احفظ مواضيعك بالمفضلة
طيرت عيون اللي حولي من ضحكي وبصوت عالي
الله يالدنيا
سؤال بسيط انت من سدير

الله يجعل صدرك وسيع دايم وماتشوفين ضيق . وشرف لي أن أكون من سدير لكن ماني منهم

خل عنك بعد ماقلت ان الاسهم تصريف وللحين قاعدة تبدع طلعت علومك ماش سواليف وناسة وبس.... غيرة يفتح الله

زمان كان التصريف باللون الأحمر والحين انتهى والاحتراف الحين التجميع بالاحمر والتصريف بالاخضر

تم تم تم تم
الصده في لغتنى الدارجه زواج ويمقن يمقن في لغتهم صده صدا يصدو صدا صيدا
وبس
وشكر لك كل الشكر

دورت أمس على معناها بالنت ولقيت موقع اسمه مصدة ودوخوني بالبحث بالموقع وطلعت مصدة اسم هجرة سكانها الروسان يعني خواله راع النبيطة روسان والنعم بعتيبة كلهم

ياحبي لك ياخلفهم والله يانك توسع الصدر......

الله لا يريك ضيق وكلمة يا خلفهم ترا هذي كلمة الوالدة حلوة اللبن دايم ترددها إذا جت تدلع أحفادها

جزاك الله كل خير واللى راح يدبل مضارب عالمي ينتمي الى فنيله العالمي

الله يفيك ويحفظك إذا العالمية ترى كل الناس تطبلها يعني ما راح تشوف خير لين يهدأ التطبيل

الله يذكره بالخير دحيم الزبده فل ابشن مثل ماتفضلت بس ماصار وزير

ممكن توضح الاسباب

هذا يكون تعرض لأكثر من كوية على علباه من جراء الأمراض اللغير معروفة مما تسبب بحرق فيوزه لأن أول إذا ما عرفوا وش المرض اللي مع الشخص طاروبه للصمعاني وكواه

ماقصرت اخي صرخه
والله يسعدك

ويسعدك دنيا واخره

باااااااااااااااااارك الله فيك

وفيك الله يحفظك من كل باس

الله يغربل شيطانك ياشيخ صرخة

تسنك تحتسي عن حارتنا منول

وللتوضيح

ذي دمجة عبود

ركز معي هنا وين الفلقات فيه شوف الفلقات كلها من الخلف يعني شخص انهزامي

وذولا عيال النعمة منول

وشف هنا ابو طاقية اللي مطلع كشته من قدام هذا على طول ريحته قاز وشعره من ورا كله علوك لكن الصورة مي واضحة لو فيه 3د كانت صارت أوضح

على طول حفظت الصور عندي الله يجزاك خير لأنها وثائق مغيبة

مبرووووووك النسبه يا اخ صرحه



الله يهديك فتح السوق وانا جالس اقراء موضوعك ويوم عرفة السهم لقيتهااااا مقفل عليه الحارس


والله يرزق ملاك السهم كل خيرررررر

عاد لماح ما قصر اختصر الموضوع

ظنك طلع في محله لكن مالنا نصيب الله يبارك لكم

وتظن أنه خلاها تبيع ذهبها عشان 10% بس . خليك مفتح

ماشاءالله تبارك الله الف مبروك وماقصرت
شكله فعلن يحب خالته حيل

هذا والله اللي بار بخالته أكيد بعد هي يمكن بصفه على بنتها

الف مبروك

مامداني ابيع ذهبي

خيرها بغيرها ان شا الله

..

يمديك تبيعين ذهبك وشباصاتك بعد وتلحقين الطريق توه بأوله

ماشاء الله مبروك لملاكها

ما شاء الله مبروك لهم

ماشاءالله عليك تنبيه مهم في توقيته
انشهد انك نااااااااااااااصح امين
بارك الله فيك

الله يقدرني على النصح ما استطعت

ماذا عساني أقول فكل تفاصيل هذا الموضوع أبكتني منذ منتصف الليل وأنا أعيد قراءة الموضوع ولاأدري كم عدد تلك المرات ولكن أعادتني للوراء وجعلته واقعا أعيشه آآآه يا أيام الصراحة والصدق والنقاء وطول الصرخات والضحكات ورائحة رغيف الصباح فجر الشتاء ووعود الحلوى ,,, أعرف أنّه ليس مكان وليس وقت نثر هذه الكلمات ولكن صرخة جعلنا نبكي الماضي لأنه جعلنا نعيش تفاصيله فلم يكن موضوعه من كلمة أوكلمتين أوسطر أوسطرين ولم يمنحنا دقيقة أو دقيقتين بل ربما أكثر من ساعتين ومحبة خالصة تمثّلت في صدقه رغم سهولة الخداع أعادت لأعمال الخليج (وكر الصقور ) بريقه في زمن نعته البعض بالضياع ولكن عندما تظهر الصقور تختفي الضباع ,,, ويظل السؤال هل ماقلناه يكفي بحق صرخة ؟؟ عندها فليعذرني الجميع في المكان والزمان ,, ويبقى الدعاء بظهر الغيب لصرخة في الخفاء

زمان أول ما ينعاد سبحان الله كان كل شي يرضينا وكل شي يفرحنا والوقت كله بركة وسبحان الله تلاقي عيال الحارة الساعة 2 الظهر بالضبط فاتحين بيبانهم بتوقيت واحد ولا ساعة بيج بن وكل واحد ماسك قطعة جح (حبحب) كنا وقتها ذوق فرنسيين ما نحلي الا بالشرف وكان المغرورين يطلعون بقطع خربز وشمام وسبحان الله كان الوقت كله بركة يمديك تلعب كورة وتروح تكسر لمبات الحارة اللي جنبكم وإذا في عمارة فيها اصنصيرات يمديك تلعب بالاصنصير ملاهي ويمديك تدق البيبان وتنحاش وتروح تدربي كفرات وترجع البيت تذاكر كل هذا بين العصر والمغرب

اعتذر منك سبقت الحكم على توصيتك لكن طلعت انت صح مبروك لملاك السهم النسبة

ولا يهمك يا بطل المنتدى اخذ وعطى

ما مداني ابيع سيارتي ولكن حنا معك في السهم الجاي ان شاء الله وربك كريم

خلينا أول نطلع من هالسهم وبعدين نفكر بالجاي

صرخه من انت ؟؟؟؟؟؟؟؟؟؟؟؟؟؟؟؟؟؟

أنا البردعي يا رشدي

000000000

ما هو المستفاد من الدرس أنك لا تحقر أحد أبد وحافظ على صداقاتك القديمة صحيح أن عبود لا يمكن تستفيد منه الا بالبر وعن مشاكل السيارات لكن منه فايدة وممكن يكون سبب بعد الله والغريب سبحان الله ان عياله وبناته متفوقين دراسياً طبعاً مو طالعين على عبود طالعين على امهم الاجودية والا لو على عبود الغيال يدرسون ليلي والبنات منازل . وحتى الاستراحة اللي خذاني لها من يوم ما تدخل تحس أنك لا يمكن أنك بتطلع بفايدة أو معلومة بتفيدك بأي جانب من جوانب الحياة فما بالكم بمعلومة عن الأسهم ومن يوم تشوف قراشيع الاستراحة مراكي ومساند حمر مشجرة وابريق اسود محترق يقولك شاهي عالفحم تدري أن ماعندهم أي مظاهر عن الاقتصاد ولا حتى الاقتصاد المنزلي والمعلومة اللي خذينها بالصدفة عندهم مثل المذنب هالي ما تشوفه الا كل 75 سبعين سنة

وفقكم الله

[عزام]

تسلم يا صرخة الإبداع

ما شاء الله جمعت المتعة في الطرح والصدق في المعلومة

وتستاهل الدعوات الطيبة اللي حصلتها .. موفق لك خير أخوي

[شنغريلا]

ما شاء الله عليك توصية موفقة ،، لكن مالنا في الطيب نصيب الا ان كان فتحها بنفس الاقفال بدخل

[الحـكـومـة]

صراحة مبدع

سواء توصية والا سرد روائي

والمعرفة نزود بها دام معن فيها

[q_iii_k_JI]

توصيه ولا أروع ...ما شاء الله تبارك الله وان شاء الله يواصل السهم ويكسر الهاي