توضيح بخصوص صرخة وبعض الأسهم

[شربكه]

بسم الله الرحمن الرحيم والسلام على من اتبع الهدى

أولا : اليوم واحد من الاخوان اتصل فيني وقال انت ووجهك قاعد تتميلح بالمنتدى باسم صرخة واكتشفت ان فيه واحد ثاني يكتب بالمنتديات اسمه صرخة ومسجل أقدم منك وتوصياته بالثمانيات طبعاً محاكيكم يعلن برائتة وليس لي علاقة باي معرف بنفس الاسم يكتب بالمنتديات الاخرى ولا اكتب الا في اعمال الخليج واصلاً يوم اسجل كنت اتصفح جريدة وكان مكتوب خبر ( دوت صرخة بريئة في منزل الزميل ما ادري وش القحطاني ) وقمت واخترت هذا الاسم واذا الادارة بتغيره تحط بداله اي اسم ما عندي مشكلة عشان بس لا يصير تداخل بين المعرفين والأمر لكم

ثانياً : والله وبالله وتالله أني لا اصفي حساب مع احد او لي علاقة او اتفاق مع اي مضارب او قروب وان السبب في كل ما اكتب اني احب الخير للجميع وبصراحة اللي استفزني اني قريت كثير عن مأسي بسبب سهم بروج وقررت المشاركة باللي يتوفر لي من معلومات اقو عسى ولعلى انها تفيد وداري ان البعض لو تبلع المصحف ما صدقك ولو تلحس اصباعك وتسوي صليب على رقبتك ما صدقك إلا ليش من اول نسوي كذا غذا حلفنا ومن زود التخلف نرسم صليب الله يرحم ضعفنا وجهلنا يا والله ماشين بالبركة بكل شي ويوم تعلمنا النجاسة ماعاد تأهلنا لكأس العالم ولا اخذنا كاس اسيا

ثالثاً : كل اللي اكتبه ترانا نسولف فيه اذا اجتمعنا بمجلس او استراحة خاصة اذا كان المجتمعين يضاربون بالاسهم يعني ماهو جديد على الكثير من اللي القراء والاعضاء لكن ممكن يستقيد منه اللي صاكة عليه حرمته وطول يوم من البيت للعمل واذا طلع راح وداها لبيت اهلها ودخل عند اخوانها وصكو عليه بالمجلس ثم رجعها للبيت واغلبهم تلاقيهم مشترين بكيان والمعجل ومتعلقين بأميانتيت

رابعاً : يمكن البعض او الكل يقول وراك مالك شغلة الا هالشركات وكم اسم ترددهم واقولهم لان اصلاً بالسوق مافيه الا شركاتهم اللي تتحرك وملفت وبناء عليه واستناد على حركتها شدنا ان ندور وراها وورا اخبارها ولو تحرك غيرها دورنا وراه وش رايكم صاحب حجة ما شاء الله علي والله لا يضرني ويحفظني لأهلي

خامسا : اللي اكتبه كلام عام يخلي اللي يملك في الشركات اللي اذكرها يعرف سبب سلوكه سواء طلوع او نزول او يكون وصلته معلومة ويطابقها مع اللي اذكره واذا طابقت الروايتين يتخذ قراراته قولو تكفى يا ورش انت روايتك

ندخل لموضوع الأسهم

مثل ما توقعنا المصافي وفيبكو راح يهملونها لكن الشباب موجودين بكميات كبيرة ويحتاجون لطلعة جديدة لزوم التصريف والاهداف للتصريف بينهم فيها اخذ ورد لكن ما وصلني الهدف بالضبط لكن معاهم بحول الله وقوته ومتابعين شبه يومي بمواضيعنا
وبرضو مثل ما توقنا بالموضوع السابق وقلت (الخلاصة فيبكو رغم الهبد والهبيد الا ان الجماعة يوازنون بين فيبكو والمصافي والمحصلة أنهم موجودين بالسهمين بقوة يعني لا تستغربون لو جمدو السهمين وراحو يطقطقون على حلواني عشان باقي التصريف واغراء الصغار وبعدين رجعو يكملون مشوارهم بالسهم ولو بطلوع فوق على دفعات هذا بالنسبة لفيبكو والمصافي الوضع على ما هو عليه ومتواجدين ) وكان واضح من اللي صار بحلواني وما يبيلها فتوة والجماعة طلعو كم محفظة وحاسبوهم عليها لكن باقي محافظ راح تدخل وتطلع مقابلها محافظ يعني اجمالاً السهم بطور التصريف واللي يقدر يلعب معاهم يلعب باحتراف لأن اعتقد السهم يحتاج لنزول وطلوع عشان يقدرون يطلعون باقي المحافظ

الشرقية الزراعية الرجال يبيله سنة ضوئية عشان يقدر يطلع من السهم وما قدامه الا انه يضرب السهم تحت ويبيع على النسب او يواصل طلوع عشان أغراء الصغار يعني الموضوع سهل وما يحتاج كيم كرديشتيان

صدق تراه لليوم ما تحدد وجهة السهم رسمي وان كانت الاخبار تقول للنزول اقرب وتراني قاعد استفز المضارب وقاعد يقرا معانا يالله اقهرني يوم السبت وقفل السهم نسبة فوق

ومدينة المعرفة مثل ما ذكرنا سابق انهم يصرفون وترى المضارب القديم شبه انتهى وتنتظر مضارب جديد

والمتكاملة إذا غذا انضغط تراه فرصة واشوف ( م . ع ) غير التكتيك لكن مازال فرصة

وشمس مثل ما ذكرنا ( ش . ز ) تارس المحافظ بالسهم يعني طولوا بالكم

وتهامة ومعدنية على ما ذكرنا بالموضوع الأول الغثيث موجود فيها وراح تلقف على الغذائية يعني ممكن السهم يصير فيه حروب

وفيه سهم جديد لقروب ( م . ح . ن . ح ) حسب كلام أبو مهند وقبل لا يروح فكركم بعيد وتتوقعون من الاسم ابو مهند شخصيته انه شاب يميل للشقار وقريب كثير من الوسامة ومخنجر السكسوكة لا يا شباب تراه ششيييين يعني لو شفت واحد شين ممكن تقوله يا شين أو يا ابومهند ترى هالكلمتين وجهان لعملة وحدة وفوق هذا كله ارفل وتبي تعرف معنى الرفالة خليه يحكيلك اي قصة من قصصه اذا راح البر مع اخوياه هذول فاهمين البر غلط ولا الحين مزحة مطاق ومن النوع اللي يمسكك ويعكف يدينك على ورا ويضغط على كتفك بدقنه ويصر على سنونه المسوسة المهم كنت قاعد عند ابوعلي طبعاً ابوعلي قهوجي عندنا بالعمل ومن تالي تعلم اللئامة مصادق كم بنغالي وعلموه كل انواع اللئامة وصار يسوي القهوة والشاهي كنها غسال عشان يفستفزنا ونقوم نصير نعطيه بخشيش عشان يضبطهم فقاعد معاه عشان اكسب وده واوصوصه بكم قرش عشان يضبط الشاهي والقهوة لي وبصراحة سامع وما ادخل بذمتي انه صار يبيع تتن للموظفين المهم ما دريت إلا والشين ابومهند طاب علينا وقال وينك ابيك قلت وش عندك قال تعال لمكتبي ابيك بموضوع مهم قلت يارجال ما وراك الا القرقة وانا عندي شغل قال موضوع اسهم يوم قال كذا قلت سم ابشر جايك قلت بنفسي يمكن يكون عنده شي جديد نسدحه بالمنتدى المهم رحت عنده قال شف الزرافة يوم السبت بيدخل سهم جديد قلت يا اخي ما عندك سالفة اول شي ما بعد فتحو البيع والشراء للاجانب من خارج السعودية ثاني شي بشار الاسد عليه حضر وعقوبات يعني ما في أمل يخلونه يشتري ببيشة وهي موقفة قال يا اخي لاعبة فيك السياسة ومسوي فيها محمد حسنين هيكل قلت اجل مين قال (م . ح . ن .ح) صار جورج مايكل يعير الناس قلت حلو وش السهم قال يوم السبت بيوصلني قلت يا اخي تشمشم لنا بالويكند وعطناه قبل السبت قال مالك الا قبل السوق يكون عندك لان السهم يقولون فيه اتفاق مع قروب ثاني فيه وحتى خوي اللي معاهم بيدخلونه السبت وبيعطيني السهم الله واكبر يا زمن ابومهند صار يعرف هوامير صحيح الدنيا مالها امان قلت بنفسي افا وهذا كيف نسدحه بالمنتدى النت عندنا بالعمل اسم نت ما يفتح الا مواقع الدوائر الحكومية والجرايد وبعض مواقع البريد لكن ان شاء الله ما يطير السهم ونلحق نعرفه قبل لا يطيرون ونتابعه ونضارب معاهم ماهي مشكلة الجماعة كريمين ولو قفلوا السبت نسبة اكيد ما راح تكفيهم لكن ياشباب اللي يعرفون السهم بصلاة امكم وابوكم تعطونياه قبل الشين ابومهند خلو العالم تستفيد

العذر والسموحة ان ما رديت على المشاركات لأن اخوكم بكرة ان شاء الله بيكون في فياض تمير والرجعة متأخرة بالليل واسفين على الاطالة لكن هالكلام كان يقرقع بقلبي وقلته لكم وسامحنا على الاخطاء بالكتابة وتصبحون على خير

[مالك2]

ننتظر السبت سهم صديقك ابو مهند ونتفرج عليه

الان ماشاء الله عليك كونت شعبية ماهي بطالة لك تحت اسم صرخة والى الان مافي توصية صريحة استفاد منها الجميع وانت كما ذكرت تحب الخير للجميع ومالك هدف

بس هذا الموضوع كأنك تقول لاحد يشتري السبت وتحروني هنا

[تنفيذ]

بالنسبة للأسم فـ
صرخان احسن من صرخة
وخصوصا انك كما تقول مزعج بعض المضاربين
صرخان ماشي مع المشهد تمام
باكستاني أقشر وقوي
مجرد اقتراح اتمنى ان يجد منك القبول

[badr]

مشكور انت وابومهند ..

اسلوبك روعه ومشيق اشكرك

[JaaFaar]

وّفقك الله وأنار بصيرتك لما فيه الخير والصلاح ،،،،،،

[اسلوب]

بارك الله فيك اخوي صرخة على التوضيح

[كاترينا]

حبيب قلبي صرخه

شدني خويكم شز ( ش ز ) يشهد الله حبيته والاذن تعشق قبل العين احيانا

طالبك توصل له سلامي واذا احتاج فزعه بأي سهم قبل مايوديه نسبه بيوم يعلمني وانا حاضر افزع معه

شفت اللي يشيل ويحط بالاسماك بالهبل تراه

وانا من نزل معدنيه نسبه تحت والسوق ملعلع فوق

الموهيييييييم مثل ماوصيتك وانا اخوك بلغه واذا احتاج فزعه
بأي سهم قبل مايوديه نسبه بيوم يعلمني وانا حاضر افزع معه

أخوي صرخه ما ألقى عندك سلف الين نرفع سهم نسبه انا والشز

[على نياتكم]

بصرااااحة اسلوب ولا اروع
ماشاء الله عليك تبارك الله
يعني نطقطق معهم بحلواني
وشمس متى الافتتاح

[مالها ألا رجالها]

ننتظر السبت سهم صديقك ابو مهند ونتفرج عليه

الان ماشاء الله عليك كونت شعبية ماهي بطالة لك تحت اسم صرخة والى الان مافي توصية صريحة استفاد منها الجميع وانت كما ذكرت تحب الخير للجميع ومالك هدف

بس هذا الموضوع كأنك تقول لاحد يشتري السبت وتحروني هنا

كتبت وعببررت وكفييت ووفييت

ونحن صرخه في زمن صرخه مع مع سووق صرخه ونشوف صرخه وش عنده من صرخه يوم السبت الصرخه

ههههههه

[alrajel]

اولا اسلوب شيق ولطيف ,
ثانيا الله يعينك اكثر المشاركات تبى سلف لدخول فى السهم
ثالث شئ شكل الجميع فى السوق الله يستر وانا منهم والله يستر
ليصك العساف الابواب ويحجرنا فى السوق فهو يتمتع فى مداعبتنا
بالرعب ولو ان العين صارت حمراء واى لعبه فيها ثقل دم تتعلق
بحلالنا لن نسكت عليه فلم يعد الاهو وحق موؤسسة النقد الجاسر,
رابع شئ وهو الاهم وضعت معرفك تحت المجهر وفى انتظار تسمية
السهم قبل التداول كما وعدك صديقك فانت كريم وحنا نستاهل ,,,

[الحبيب]

مضارب الشرقية الزراعية فى الغذائية الان وحالف يوصل السهم اكثر من 90 ريال ورقمة اس اس اح

[نسر]

مضارب الشرقية الزراعية فى الغذائية الان وحالف يوصل السهم اكثر من 90 ريال ورقمة اس اس اح

مضارب الشرقيه سبق ولن تملك بانعام واختفى ......وهولا زال بالسهم

[الحبيب]

مين تقصد يالنسر اس اس اح والا غيرة؟؟؟؟؟؟

[نسر]

مين تقصد يالنسر اس اس اح والا غيرة؟؟؟؟؟؟

راجع التملك الاخير للشرقيه ونعام وتعرف

[عذبه]

واصل ثوره ثوره الى الامام


واسمك ذكرني بكلمة يقولونها الاولين ... ( مستصرخ )

اسأل عنها كاترينا يعلمك .. هو متخصص في أخبارهم

[ابوعزوز]

انت ياصرخه
في صلاة امك وابوك انك تعلمني وش السهم
تراي قلتها في صلاتك امك وابوك

[khalid alhazmiy]

بارك الله فيك

ورحم الله والدينا ووالديك

[MNEEB]

اول نسوي كذا غذا حلفنا ومن زود التخلف نرسم صليب
قليلين اللي يفهونها هههههههههههه الله يرجك
ههههههههههههههههههههه قديم من جيل قواطي الصلصة ...... امتعتنا الله يوسع صدرك بالعافية

[كاترينا]

واصل ثوره ثوره الى الامام

واسمك ذكرني بكلمة يقولونها الاولين ... ( مستصرخ )

اسأل عنها كاترينا يعلمك .. هو متخصص في أخبارهم

ماعرف شي لاتوهقيني يابنت الاجواد

فبه مضارب اقشر جاي خصيصا لسوقنا يقال له م ع سيولته متجوله
بيقعد عندنا الربع الاول من 2012م بعدها بيروح يدور رزقه

[أ. العربي]

وقائع الكثير منها يتوافق مع حركة الاسهم المعنية ..
حلواني لوحظ بداية التصريف .. قد يكون بداية لتخفيف الحمولة للاقتراب من الهدف .. او لجني ارباح و لتهدأة المؤشرات وقد ياخذ وقتا ان هم ارادوا المواصلة لهدف بعيييييد ..

بارك الله فيك و وفقك لكل خير يسعدك بالدارين ..

تحياتي

[جراند]

الحقيقة انك تتكلم بواقع عن السوق لدرجة اني اشك انك هامور.
اصرخ واحنا نسمعك
لا عدمنا صراخك

[MARKET 99]

اسلوب وطريقة الطرح رائعه جداً

دمت بود اخي صرخه

[أبو جلنار]

الله يعطيك العافية يا بو مهند .. ( :

[مخاوي الليل]

دمت بود اخي صرخه




هبلت فيهم و الله انك كفو

[الصقر 99]

صرخه
أنا اشهد أنك ذيب ومن يأخذ على توصياتك يجني ذهب. فيه ردود عليك تشكرك وهم والله مقهورين منك لآنك ماجبت لآسهم التأمين طارى وهم معلقين في التأمين من قبل الحج .
لا وبعد يوصون على الخاص والعام في منتداهم يقولون فيه ارتداد نعلم ان فيه ارتداد ولكن متى وهل ستعود اسهمهم لآسعار شراءهم سابقا فهو ربح بحد ذاته.

[حمود الصعب]

مساك الورد

وش علوم شمــوسه ..

[مالها ألا رجالها]

تصصصدق اني كل شوي اخش ابي الشوف وش اسم السهم الي دخله ابو مهند

تراني جاري الانتظار يا الخوووو ههههه

[شربكه]

ننتظر السبت سهم صديقك ابو مهند ونتفرج عليه

الان ماشاء الله عليك كونت شعبية ماهي بطالة لك تحت اسم صرخة والى الان مافي توصية صريحة استفاد منها الجميع وانت كما ذكرت تحب الخير للجميع ومالك هدف

بس هذا الموضوع كأنك تقول لاحد يشتري السبت وتحروني هنا

جا يوم السبت ما ينفع توصية صريحة مع اني اشوف كل اللي كتبته توصيات يا بيع يا شراء يا مضاربة وإذا تبي تجني على سهم وعلى اللي فيه اعطيني اسمه اسدحه بالمنتدى بتوصية صريحة عشان ما يشوف خير وخليك مصحصح معانا والله اني اشك انك مدرس تبي سهم تشتريه الحصة الأولى وتبيعه بعد الحصة الرابعة بالفسحة

بالنسبة للأسم فـ
صرخان احسن من صرخة
وخصوصا انك كما تقول مزعج بعض المضاربين
صرخان ماشي مع المشهد تمام
باكستاني أقشر وقوي
مجرد اقتراح اتمنى ان يجد منك القبول

صرخان صرخة مزعج كلها صجة وناوي اصجهم واقلق منامهم يا يلعبونا معاهم يا نخرب

مشكور انت وابومهند ..

اسلوبك روعه ومشيق اشكرك

قل امين الله لا يجعلك صديق مثل ابومهند

وّفقك الله وأنار بصيرتك لما فيه الخير والصلاح ،،،،،،

اللهم امين والله يجزاك خير ويبعد عنا البلاطجة والبلطجية والشبيحة

بارك الله فيك اخوي صرخة على التوضيح

وفيك الله يجزاك خير

حبيب قلبي صرخه

شدني خويكم شز ( ش ز ) يشهد الله حبيته والاذن تعشق قبل العين احيانا

طالبك توصل له سلامي واذا احتاج فزعه بأي سهم قبل مايوديه نسبه بيوم يعلمني وانا حاضر افزع معه

شفت اللي يشيل ويحط بالاسماك بالهبل تراه

وانا من نزل معدنيه نسبه تحت والسوق ملعلع فوق

الموهيييييييم مثل ماوصيتك وانا اخوك بلغه واذا احتاج فزعه
بأي سهم قبل مايوديه نسبه بيوم يعلمني وانا حاضر افزع معه

أخوي صرخه ما ألقى عندك سلف الين نرفع سهم نسبه انا والشز

يا قاسي يا شرس يا متوحش يا جلف وانا اقول من حاشر سهم الانماء تحت 10 يا اخي ارحم شوي

بصرااااحة اسلوب ولا اروع
ماشاء الله عليك تبارك الله
يعني نطقطق معهم بحلواني
وشمس متى الافتتاح

طقطق لكن انتبه تنطق

كتبت وعببررت وكفييت ووفييت

ونحن صرخه في زمن صرخه مع مع سووق صرخه ونشوف صرخه وش عنده من صرخه يوم السبت الصرخه

ههههههه

ان شاء الله كل خير

اولا اسلوب شيق ولطيف ,
ثانيا الله يعينك اكثر المشاركات تبى سلف لدخول فى السهم
ثالث شئ شكل الجميع فى السوق الله يستر وانا منهم والله يستر
ليصك العساف الابواب ويحجرنا فى السوق فهو يتمتع فى مداعبتنا
بالرعب ولو ان العين صارت حمراء واى لعبه فيها ثقل دم تتعلق
بحلالنا لن نسكت عليه فلم يعد الاهو وحق موؤسسة النقد الجاسر,
رابع شئ وهو الاهم وضعت معرفك تحت المجهر وفى انتظار تسمية
السهم قبل التداول كما وعدك صديقك فانت كريم وحنا نستاهل ,,,

شكراً تشكرات ثانكيو ميرسي فيات مرسيدس وتراكم حاطين أهمية لأبومهند وتوصياته يا ناس هذا أبومهند اللي لليوم يدق الأقط مع السكر لا تعطونا أهمية هو توصياته وتكبرون رأسه

مضارب الشرقية الزراعية فى الغذائية الان وحالف يوصل السهم اكثر من 90 ريال ورقمة اس اس اح

الحين ما فهمت الغذائية اللي بتوصل 90 وإلا الشرقية الزراعية فضلاً وضح التطبيل على أي سهم

مضارب الشرقيه سبق ولن تملك بانعام واختفى ......وهولا زال بالسهم

وشلون سبق ولن تملك واختفى وهو لا زال بالسهم يصيرلك شي يونس شلبي

واصل ثوره ثوره الى الامام


واسمك ذكرني بكلمة يقولونها الاولين ... ( مستصرخ )

اسأل عنها كاترينا يعلمك .. هو متخصص في أخبارهم

يقولون ان كاترينا يقضي الويكند بسوق الزل منها ياخذ علوم الشيبان ومنها يسترزق يبيع ساكتونات

انت ياصرخه
في صلاة امك وابوك انك تعلمني وش السهم
تراي قلتها في صلاتك امك وابوك

والله أبومهند صار مهم وينك يالشين تشوف كيف قايم حظك بأعمال الخليج عقب ما كنت تراسل مجلة النهظة والشبكة والكواكب وترز خشتك وتقول أنا رومنسي وأقدر الحياة الزوجية على بالك تغري يا ترافولتا

بارك الله فيك

ورحم الله والدينا ووالديك

الله يجزاك الجنة

اول نسوي كذا غذا حلفنا ومن زود التخلف نرسم صليب
قليلين اللي يفهونها هههههههههههه الله يرجك
ههههههههههههههههههههه قديم من جيل قواطي الصلصة ...... امتعتنا الله يوسع صدرك بالعافية

تدري اللي محيرني ومحير الهليل لليوم انه ليش كنا نسمي مفك المعلبات مفك صلصة رغم انه يفك كل العلب ما اقولك الله يرحم ضعفنا

ماعرف شي لاتوهقيني يابنت الاجواد

فبه مضارب اقشر جاي خصيصا لسوقنا يقال له م ع سيولته متجوله

بيقعد عندنا الربع الاول من 2012م بعدها بيروح يدور رزقه

انت متأكد ان اللي قاعد يتجول بسيولته مضارب ماهو فرقنة والله ما خبرت إلا الفرقنة شايل على كتفة بقشة وقاعد يتجول فيها بالضحاوي

وقائع الكثير منها يتوافق مع حركة الاسهم المعنية ..
حلواني لوحظ بداية التصريف .. قد يكون بداية لتخفيف الحمولة للاقتراب من الهدف .. او لجني ارباح و لتهدأة المؤشرات وقد ياخذ وقتا ان هم ارادوا المواصلة لهدف بعيييييد ..

بارك الله فيك و وفقك لكل خير يسعدك بالدارين ..

تحياتي

ما قدامهم إلا الرجوع لقواعدهم أو الهروب للأمام ولو يلاقون طلب غريب على شركاتهم كان قالو له اتصل نصل

الحقيقة انك تتكلم بواقع عن السوق لدرجة اني اشك انك هامور.
اصرخ واحنا نسمعك
لا عدمنا صراخك

لا هنت لكن توي يرقة وبرعم والله يسمع منك واصير هامور واقهر ابومهند

اسلوب وطريقة الطرح رائعه جداً

دمت بود اخي صرخه

جزاك الله خير

الله يعطيك العافية يا بو مهند .. ( :

تراني بديت اغار من الأرفل أبومهند

دمت بود اخي صرخه




هبلت فيهم و الله انك كفو

ان الله قالها وراهم وراهم يا يلعبونا معاهم يا نعلقهم

صرخه
أنا اشهد أنك ذيب ومن يأخذ على توصياتك يجني ذهب. فيه ردود عليك تشكرك وهم والله مقهورين منك لآنك ماجبت لآسهم التأمين طارى وهم معلقين في التأمين من قبل الحج .
لا وبعد يوصون على الخاص والعام في منتداهم يقولون فيه ارتداد نعلم ان فيه ارتداد ولكن متى وهل ستعود اسهمهم لآسعار شراءهم سابقا فهو ربح بحد ذاته.

بعدي أنت يا سنايدي وهذا المطلوب أنكم تصيرون صقور وتصيدون من المكتوب
يوصون ما يوصون يكتبون بمنتدياتهم يجمعون شبيحتهم ناشبينلهم ناشبينلهم باذن الله وحنا نتبع تعليمات الهيئة بالشفافية وقاعدين نمارس الشفافية

----------------------

طبعاً كنت مثلكم احتري يوم السبت بفارغ الصبر ودي ان يكون الاسبوع سبت احد اثنين ثلاثاء اربعاء سبت ومافيه خميس وجمعة عشان توصية الشين ابومهند . اليوم السبت قمت بحيوية غريبة ونشاط غريب وكنت من النشاط ودي أروح الشغل رجلية كله عشان التوصية المهم رحت العمل وقعدت بمكتبي ارتب بعض حوست يوم الاربعاء وبالي مشغول مع ابومهند ويوم رتبت قراشيعي دقيت على تحويلة ابومهند وصبحت عليه على غير العادة وكم كلمة ترقيص لزوم الدحلسة وقالي شوي وامرك يوم حسيت ان الدنيا كلها انفتحتلي ولو اقدر ازرع ورود بالمكتب واسحب سحابة من السما واحطها بالمكتب تسوي الجو غيم كان سويتها عشان راحت ابومهند المهم على الساعة 9 صباحاً تقريباً إلا هذا ابومهند واقف بنص باب المكتب وطاق ثوب صيفي لكن اللي لفت نظري أن عنده بالثوب كم اقصر من كم لكن طبعاً ما علقت وخصوصاً ان ابو مهند ذابحنا من قبل يقول تصدقون اني لليوم ما افصل إلا ثياب قماش أبو غزالين واني موزي كم طاقة من زمان قبل ما تنقطع من السوق وجا وقتها وصرت افصل منها الرجال يحب التميز وقد ربط سالفة ثوب أبوغزالين بجيب ثوب الوليد بن طلال بسالفة غبية ما ودي اشغلكم فيها لكن محصلتها ان شوف الوليد ثياب الوليد كلها مافيها جيب امامي وان هو انت يا ابومهند ما احد عنده ثياب ابوغزالين طبعا الشين يقصد انه تميز المهم من يوم شفته قلت له تو ما تبارك المكتب يا ابو مهند وما شاء الله مصيف اليوم طبعاً ما جبت له طاري أن عنده كم اقصر من كم . قال تعرف اليوم الجو ربيعي على باله ان عنده مشاعر ويفرق بين الصيف والشتاء هالتمساح هذا اساساً أيام ماكان يدرس ماكان عندهم بمنهجهم الدراسي بالجغرفيا فصول السنة الموجودة الحين كانت عندهم فصول السنة فصل بياع الخبل عباته وفصل إذا جا الجراد صر الدواء وفصل ابوالعقارب وانت ماشي من هالاسماء المرعبة المهم هالحساس لابس صيفي عشان الجو ربيعي وقام يتليعن علي وما جاب طاري السهم وقام يهذر علي عن زحمة الرياض ويطرح اقتراحات لحل أزمة الشوارع معالي الأمين المهم صار قريب مني وتجي عيني على أزارير لياقة ثوبة لينه حاشر رقبته بغالوق الثوب بطريقة غريبة والازارير ناقزة وواحد منهم ماهو مخيوط زين يعني ممكن ينطلق بأي لحظة ويلعب بوجهي فصرت احرك رقبتي مثل الكوبر خايف من الزر ولا عاد ركزت بمواضيعه وكل همي هالزر المهم رحت غيرت مكاني بحيث اني ما اصير مقابله مباشرة وقمت فاتحته بموضوع السهم قال يا اخي لا تستعجل على رزقك طبعاً اخوكم حاط اللاب توب بالسيارة وابوعلي اللي حكيتلكم عنه ديته 10 ريال ويهربه لي عشان ممنوع دخوله عندنا بالعمل المهم الحيت على ابومهند لكن قال بصراحة محلفني صديقي اني ما اقول عنه لاي واحد عزيز الا مع الافتتاح يعني ابومهند قاعد يسوي علي افلام قلت معليشلجل الورد نسقي العليق بعدها قال عندي شغل وبجيك قبل افتتاح السوق بدقايق وفعلاً قبل الافتتاح حشرني وقال اتصل ببنك الحين واطلب الاحساء ماركت قلت انت من صدقك فيه احد الحين يطلب ماركت ذاك أول أيام الهبال بالسوق قال اتصل الحين السهم رايح نسبة واطلب كامل المحفظة قلت وش كامل المحفظة عندي اسهم مستثمر فيها ومافيه بالمحفظة الا حدود 80 الف ريال اضارب فيها طبعاً اخوكم ينصب عليه المحفظة ولله الحمد فيها المقسوم لكن ماني مطاوعه المهم وبساعة غفلة وضعف تحت اصرار اللي واقف فوق راسي اتصلت وادخلت ماركت ويوم فتح السوق لين التنفيذ 14.45 المهم واتذكر قلت وانت وراك ما طلبت دامك متأكد من السهم ما دريت إلا وفتح فمه يضحك بأعلى صوته ولو اني مجهز كاميرت الجوال وصورت فمه كانت شفتو لوزه الثنتين وقال يا حليلك انا شاري الاربعاء اااه يالنجس المهم كنت ما بعد نزلت اللاب توب وادق على واحد من الشباب وقلت له كم سعر الاحساء قال نازل 3% يوم ضاقت بي الوسيعة ماهمني نزول السهم والمبلغ ماهو كبير لكن وشون هالشين يصرف علي وقحص لمكتبه ماشي طبلوني وادخل الا عنده رجال وارجع ارسل ابو علي يجيب اللاب توب وادق على تحويلته قلت يا اخي السهم نازل 3% قال هذا انتم يالصغار دايم خايفين لعن ابو بليسه عرف خروف يديرون محفظته وخلانا صغار ويوم جاني اللاب توب وافتحه تحت المكتب واشوف السهم إلا وبدأ يتعدل وشوي شوي صار اخضر المهم حسيت بالذنب اني ظلمت ابومهند ما دريت الا جايني المكتب قال ها كيف قلت بيض الله وجهك المهم ويوم طار السهم طبعاً انا نفظت ام السهم ب 15 وقمت اشغل اتصالاتي ابي اتأكد من معلوماته وانا اتصل الا دخل عندي وقال ما قلتلك عز الله انك ذيب وكل شوي داخل وراز خشته وقاعد يذلني بالتوصية واخر مرة دخل وقال تصدق ناقصك فصفص وتبدل سيارتك لكابرس قلت ليش قال حساوي لين طلع التوصية مني مر المهم لقيت ان جماعة (م.ح.ن.ح) هم اللي قاعدين يقشعون بالسهم قلت زين ما راح اسدح الموضوع لين تنحشي محافظهم خصوصاً اني عرفت انهم متفقين مع المضارب الاساسي برفع السهم لسعر 20 وتطليع محافظهم فصاروا القروبين الحين بالسهم يا يهبدون تحت يا يروحون فوق وحنا نشوف شغلنا صحيح المعلومة متأخرة لكن دخول قروبين يخلي الأمور تشعلل ويبيلها صقور صيادة

المصافي فيبكو مبرد شمس وحلواني بمراحل تصريف مع كل طلوع يستوجب تشغيل قرون الاستشعار

القصيم الزرعية اعضاء مجلس ادارة النصر كاشتين بالسهم من دريت ان اسهمهم خشاش وانا داري ان ماهنة بطولات

اميانتيت جاهز ينادي

المتكاملة على ماهم عليه

الغذائية كثرو عليها الشبيحة

شمس ينقل محافظ

واسفين على الاطالة وسمحونا على الاخطاء بالكتابة

[مضارب محت78رف]

هلا بصرختنا المدويه وش لون شمس ينقل محافظ

[على نياتكم]

بصراحة تنفع تكون كاتب قصص
اسلوبك وسردك للأحداث مشوق
شكلنا انطقينا ولا قدرنا نطقطق في حلواني