السلام عليكم ورحمة الله وبركاته
قصه قد يكون الأكثريه سمع بها
فإذا كنت قرأتها فاطلع مشكوراً على ماكتب بعدها من رأي
((سوق مكيعل))
مكعيل هذا رجل بسيط يماني من صعده ..
الناس هناك مسوين بسطات حول التجمعات والجوامع ويبيعون فيها خردوات وحاجات وسلع متنوعة وبسيطة
السيد مكعيل صف معاهم وحط بسطه مافيها شي .... ما غير علبتين مليانه تراب "قواطي متربه " ..!
الناس تروح وتجي وتبيع وتشتري وذا المهبول كل يوم قاعد قدام ذا العلب ..
لا هو راضي يغير النشاط ولا احد حاول يشتري منه شي ..
هاك اليوم جا احد المحسنين .. وعطف عليه ، قال له : مكعيل .. وش تبيع ؟
قال : علب "قواطي" قديمة ..
قال المحسن : وش فيها ؟ قال مكعيل : تراب ..!!
الصدق منجاة .. عطاه اياه على بلاطه .. يقول : فيها تراب
يعني بالعقل .. العلب من الشارع والتراب بالشارع ....
اندهش المحسن ..!
قال : طيب اللي يشتريها وش يستفيد ؟
قال مكعيل : لو ما حد شراها منك انا اشتريها ....!
استغرب اكثر المحسن وقال : والله هالمسيكين "شكله منسم" وما عنده غير هالعلبتين ..
ابي اتقرب الى الله وافك عقدته واشتريها منه وخلصنا ..
والصدقة تجوز على الكلب ..
قال له : بكم هالعلبتين اللي لها سنه عندك ما حد شراها ؟
قال مكعيل : الوحده بريال ..
قال المحسن وهذي ريالين .. يالله هاتهم ....
اخذها وراح البيت ونطلها يمين الباب قبل لا يدخل بيته ..
وتوه ما قعد والا الباب يطق : طقطق طق .. طقطق طق .. كع كع كع .. دجدج دج ..
بغى ينكسر الباب .. قام الرجال مفزوع وفتح الباب بسرعة .. الا مكعيل واقف ومعه حصاة بغى يهبد بها الباب لو ما فتح ...
قال المحسن : شفيك .. شفيك .. خير .. عسى ما شر .. مالك يا مكعييييييل ؟؟؟ ! " بلهجتهم "
قال مكعيل : العلب اللي شريتها مني ... ، قال المحسن : شفيهم ؟
قال مكعيل : عندك ؟
ناظر المحسن يسار الباب .. شافها منطوله .. قال : ايه .. موجوده
قال مكعيل : تبيعها ؟
اندهش المحسن وفغر فاه .. قال : انا الحين مسوي فيك خير ومخلصك منها ..
تجي تشتري ثانية .! والله ما تلقى احد ياخذها منك بعدي ..
قال مكعيل : اخلص علي .. ابعطيك فيها ربح بس تكفى بعني اياها ..
قال المحسن : وبكم تشتريها ؟
قال مكعيل : بخمسة ريال ....!!!
جن جنون المحسن : وقال يعني دبل السعر وزيادة ..
قال : نعم واذا تبي زود عطيتك بس تكفى جبهم لي ....
قال : المحسن : لا لا كذا كفايه تفضل هاذي العلب لقطهم من عند رجليك وهات الخمسة ..
حط الخمسة بجيبة ومكعيل اخذ العلبتين وروح ..
يوم جا العصر والا هالرجال الطيب معلم جيرانه كلهم عن مكعيل وسوق مكعيل ...
قال لهم : مكعيل هذا يبيع قواطي ولو ما حد شراها منك يجي هو بنفسه ويشتريها منك بدبل السعر ..
اندهش الجميع وبدأ سوق مكعيل يثير فضول الجميع حتى التجار الشطار ..
جوا عنده اليوم الثاني والا هو صاف له 20 قوطي ومعبيهم تراب ...
الناس تطاقوا عنده .. كل واحد يبي يلحق له اكبر كمية قبل غيره ..
بكم يامكعيل ؟ قال : العلبة بخمسة ..!
ما كمل كلمته والا العالم ساحبين كل المعروض ..
اللي لحق علبتين واللي لحق علبه واللي ما لحق شي لانتهاء المعروض على البسطه ...
وما امداهم يدخلون بيوتهم والا مكعيل يطق عليهم الباب : طقطق طق .. دبدب دب .. دجدج دج
ويطلب منهم شراء القواطي بضعف قيمتها .. يعني العلبة بعشرة .. !!!!!
انتشر خبر مكعيل وسوقه ،
ويقوم مكعيل هاك الليلة ويدور بالديرة كلها ما خلى جرف ولا دحديره في قرية صعدة الا فتش فيها عن قواطي قديمة ..
ادخلها بسطته بدون علاوة اصدار حتى ..
وعباها تراب وبسط فيها اليوم الثاني
صار اليوم هذا يوم جمعه .. يوم كثرة الناس واجتماعهم وتسوقهم ،
وهاليوم تحديدا جو الناس وهم متزهلين بالكاش طمعا في سوق مكعيل .
اللي باع ماشيته والا باع بسطة القات اللي تدخل عليه ذهب واللي باع سراويله ..
المهم كلهم وعقب صلاة الظهر اجتمعوا على بسطة مكعيل دون غيره وخلو السوق خاوي على عروشه ، وياتلحق يا ما تلحق
وتكفى يا مكعيل ، وبكم يامكعيل ؟ : قال العلبة ب 95ريال ...!!!!!!!!
ما كمل كلمتة والا البسطة باللي عليها ممسوحه مسح ..
حتى اللي مالحق باقي مسوي زحمة ومطلع دراهم يبي يذبها على الرجال ..
وهو يقول : خلاص .. خلاااااص مافيش .. مافيش .. تعالوا بكره .. وتجمعت الطلبات ولكن بدون عروض ..
وبعضهم زاود بعض في القواطي اللي عنده بعشرة وعشرين طمعا في تدبيلة مكعيل ..
عقب هالطقاق وراتفاع اسعار القواطي الفارغة او المليانة تراب الى ارقام فلكية وغير منطقية
جا اليوم الثاني والثالث والرابع ما جا مكعيل ..
طبعا كل يوم يتأخر عليهم .. تفقد من قيمتها شي واجد .. مدري كم تعادل بالنسبة ومن اللي يحط النسبة بس كانت ماشية بالبركه ...
راحوا اصحاب القواطي عنده .. قالوا شفيك .. عسى ما شر ما عاد جيت البسطة ولا عاد شريت
ولا شريت .. ولا .. ولا شريت يعني ..!!!!!!!! عسى ما شر .
قال : صحيح .. صحيح .. والله انا غيرت النشاط ...!!!!!!!!!
ولا عاد لي بها البضاعة مصلحة لكن اكيد بتلقون من يشتري منكم ..!!!!!!!!
صعق الجميع .. وعادوا الى قواطيهم لعلهم يجدون بداخلها ما يمنحهم شيء من الصبر
او يتعوضون به عن ما لحقهم من خسائر ....
فتحوها واذا هي مملوءه بالترااااااااااااب ... !!!!!!!!!!!!
فصار بعضهم يعرضها على بعض بنصف المشترى ..
اللي جوا في الاخير قالوا : يالله هات ، ويوم نشبت في حلوقهم عرضوها بنصف مشتراهم
وصارت ذا العلب مثل الجمرة في يد احدهم ويحاول يرميها على الثاني بأي شكل ،
وكل من بلش فيها عطاها غيره بنصف التكلفة الين تلاشت قيمتها وصارت ببلاش .. وصارت خساره محظه ....
المشكلة ان كلهم يوم فكروا لقوا انهم بلا عقول .. فأخذوا يتلاومون : وين عقولنا ؟ !
عاد هذولي من جد يبي لهم من يأمر لهم بعقول ..
معقولة نشتري علبة مصدية وما فيها غير تراب بما يعادل قيمة بقره حلوب ..؟ !!!!!!!!
وينك يا مكعيل تجي تشتري ما بعته علينا ولو بأقل بنصف التكلفة ..
محبي الأرقام
سوف ندرج مثال لسوق مكيعل
قوووووووطي ""سهم الشرقيه الزراعية""
بتاريخ {19/1/2002م} كان سعر القوطي بـــ((4)) ريال سعودي!!! وتم تداول
30 قوطي بقيمة 120 ريال وهي صفقه وحيده مكسورة الجناح
بتاريخ {21/2/2006م} وصل سعر القوطي لقيمة تنقص عن الــ((300)) ريال سعودي !!! وتم تداول أكثر من 1,5 مليون قوطي بقيمه تقترب من 500 مليون ريال
بعدد أكثر من 4000 صفقه وقبل ذلك التاريخ بأيام بسيطه وصلت قيمة التداولات إلى مايقارب 1000 مليون ريال ((شركه واحده صغيره تم تدوير أموال تقدر بمليار ريال)
من 4 ريال إلى 300 ريال تقريباً وتداول في ذلك الوقت لايتجاوز حزمة أسهم
إلى تداول يصل إلى ثلاث أرباع الأسهم وقت طفرة سوق مكيعل
لايجي أحد ويقول عوايد وأسهمك بالحفظ والصون ووو
هذا المثال فووووووووق الى الآن اللي إشترى بــ4
مدبل أكثر من 8 مرات،، واللي يبي عوايد يروح لجيراننا
عندهم أسهم تعطيك مايقارب على 15% ربح على السهم سنوي
ضاحكين علينا بها العايد ،، العايد للي إشترى سابك والراجحي
وأسهم البنوك بتراب الدراهم مهوب هالحين سابك فوووق الــ100
وتزكى على مساهميها بطفاااااااااس ،،أضيفوا إليها الأسهم الجديده
والتي تربح منها لعبوا في علاوة إصدارها وبدل مايكون معقول وتستثمر
فيها بهدف الربح السنوي الموزع تجدهم بالغوا في علاوة إصدارها
وأن الربح طفااااااااس كما أسلفت سابقاً
طبعاً قد يكون في كلامي شيء من الإستعجال بحكم مجحف على توقع
ولكن إن شاء الله نرى شركات تغري المستثمر بإقتنائها وتحقق أرباح
تاريخيه مقارنةً بأسعارها لتجذب المستثمر السعودي والأجنبي
بعد الطفره اللي عاشها السوق وإنهارت الأسهم :
إنهار السوق في فبراير 2006م وهوت أسعار الأسهم بشكل
كبير وقوي وإرتدت بشكل قوي ثم هبطت بقوه مره أخرى وإرتدت
كمثال :
سهم بــ300 ريال وقت الطفره
إنهيار لـــ50 يال
ارتداد لــ150 ريال
إنهيارلـــ30 ريال
إرتداد لــ60
نزووووووول لــ20 ريال وركود لفترة طويله
ولاحظ الآن كثير من بدأ يقتنع تدريجياً بــالــ20 ريال وخفت
وطأت النزول عليه وهذا ماأسميه أنا بعملية الرضا
بالموجود
سبب الركود :
1-إختفاء المحرك الرئيسي للسوق ((السيولة))
2-كثرة الإكتتابات
3-توزع السيوله البسيطه جداً على الإكتتابات
4-وجود بدائل في أسهم جديدة والذهاب إليها وهجر الأسهم القديمه وخاصةً سيء
الصيت منها وذلك من باب أفضل الموجود
5-حتى الإكتتابات أصبحت ليست كالماضي وسخائها عدداً أوصل بعضها إلى السالب كما يحدث في سهم المملكه ((اللحين الوليد طارح 5% وخسران في الــ95% الباقيه"علينا ذا الحكي لو وصل لــ5 ريال هو كسبان" بس أنا أتكلم عن أرقام))
مشاهدات من إكتتابات ماضية :
بنك البلاد وقت الطفره تم إصال سعر الإكتتاب لرقم يقترب من الــ200 ريال
وسعر السهم إكتتاباً 10 ريال يعني المكتتب حصل على 20 ضعف لما أودعه من مال في الإكتتاب
أسهم ((أسواق العثيم ،، أسترا)) وتكرار أخطاء بعلاوات الإصدار الغريبه وكأن سهم
الحكير بعيد عنا
ولنأخذ أسترا كمثال :
الإكتتاب بـــ42 والآن بــ44 تقريباً يعني المكتتب خسران مالم تتجاوز
عدد أسهمه الــ6 أسهم وذلك نظراً لعمولة البنك!!!
كل هذا بسبب اللعب في علاوات الإصدار والمبالغة في تقييم الشركات
بالنسبه للسوق حالياً وعودة مكيعل صانع السوق الفذ
نلاحظ حالياً كثير من الأسهم ذات تداولات بسيطه جداً جداً
وهي من الأسهم صاحبة القيم السوقية الأقل في السوق منذ
مايقارب على الــ4سنوات لم يشهدها السوق والتي أعتقد أن
هنالك من إشترى فيها وقام بتركيعها ولايزال لحين أخذ إشارة الإنتهاء
مع تحفظي على كلمة أسهم إستثمارية ،، هنالك أسهم لها مستقبل مشرق
كما كان لسابك والراجحي وأسهم البنوك وإرتفاع أسعارها مقارنةً بعدد
أسهمها والربح السنوي الموزع "البسيط" ولكن كما ذكرت سابقاً
الأول لاعب والتالي تاعب
وأعتقد أن الصانع (((مكيعل))بدأ بالبحث عن قواطيه
آسف على الإطالة
بالتوفيق
المفضلات