الف : أولف واول السوق نسبة
نسبة تحت ما عاد تحتاج حسبة
سوق ضربنا فوق عشرين ضربة
والصبر زين الابسهم المواشي
والباء : بدينا واشترينا وبعنا
وياليتنا فيما سبنا قنعنا
طرنا وتعلينا ولكن وقعنا
والصبر زين الابسهم المواشي
والتاء : توقعنا تزيد المكاسب
وقلنا نبي نشرب لذيذ المشارب
لكن ورطنا بين عارض وطالب
والصبر زين الابسهم المواشي
والثاء : ثبت عندي بعلم يقيني
اني خسرت وراح ما في يميني
الله على تسديد ديني يعيني
والصبر زين الابسهم المواشي
والجيم : جمعنا سهوم كثيرة
ولا درينا ان الدعاوي خطيرة
حتي خسرنا والخسارة كبيرة
والصبر زين الابسهم المواشي
والحاء : حسافة ياجماعة فلوسي
حطيتها بأسهم وكسرت قوسي
صحيح هالدنياعطتنا الدروسي
والصبر زين الابسهم المواشي
والخاء : خلاص اقول توبه ولاأعود
لو كنت بالمكسب موصي وموعود
وهذا قرار ما على فيه منقود
والصبر زين الابسهم المواشي
والدال : دجينا بسهم المواشي
نشرية غالي وثم نبيعه بلاشي
هذا جزاة اللى شراء بالخشاشي
والصبر زين الابسهم المواشي
والذال : ذاك اللي تسبب علينا
ويلاه لو انه يطيح بيدينا
من دون ذبحة كلنا ما رضينا
والصبر زين الابسهم المواشي
والراء : رمينا رمية دون رامي
وصابت وقلنا حرفنة ياسلامي
والسوق طيب لين جانا الصرامي
والصبر زين الابسهم المواشي
والزاي : زدنا يوم شفنا المرابح
وقمنا مع العالم نزيد المطابح
ويمكن على بعض السهوم انتذابح
والصبر زين الابسهم المواشي
والسين : سوينا بها فاهميني
نشري نقول السوق بكرة يزيني
نبغي المكاسب واثرنا خاسريني
والصبر زين الابسهم المواشي
والشين : شاري يومه السوق غالي
ما همني لو زادو فيها ريالي
لا والله الا راح باقي حلالي
والصبر زين الابسهم المواشي
والصاد : صدق اللى سهما منول
حول مية وسبعين واليوم حول
ينزل الى ستين شئ يهول
والصبر زين الابسهم المواشي
والضاد : ضاربنا بسهم الفنادق
لكن رمونا مثل رمي البنادق
حتي زبنا بالحفر والخنادق
والصبر زين الابسهم المواشي
والطاء : طمرنا طمرة دون داعي
نبغي النسب بالباحة او الجماعي
واليوم يكفينا حليب المراعي
والصبر زين الابسهم المواشي
والظاء : ظلمني من نصحني بتعمير
ويقول لي هذا السهم مكسبة غير
وانا مطح فية من دون تفكير
والصبر زين الابسهم المواشي
والعين : عيوا يرفعون المؤشر
يمكن سياسة سوق لازم يخسر
كم واحد من ذا المؤشر مدمر
والصبر زين الابسهم المواشي
والغين : غير يالمحافظ وبدل
موضوعنا حلة وبالسوق عدل
نظامكم ما هو كتاب منزل
والصبر زين الابسهم المواشي
والفاء :فتيحي مشترينة بطمعه
لكن جانا منه عشرين قمعه
ما اظن يستاهل حسابة وجمعه
والصبر زين الابسهم المواشي
والقاف : قالوا بكرة السوق يرتد
والوضع اشوفة كل يوم يتعقد
مقرود يامن طاع شور المقرد
والصبر زين الابسهم المواشي
والكاف : كافي ياوزيرة التجارة
خمسين بالمية علينا خسارة
ان كان تفهم فنون التجارة
والصبر زين الابسهم المواشي
واللام : لبني يوم أغارت بلا خيل
خذت بسطوتها سهوم الرجاجيل
وخلت مدامعهم تبل المناديل
والصبر زين الابسهم المواشي
والميم : ماتنفع سهوم العوايد
خسرانة وما عاد فيها فوايد
الفايدة بالكاش لاصار زايد
والصبر زين الابسهم المواشي
والنون : نادوا من يعرف السلومي
وقولو اتوجه يم شيخ القرومي
يحلها لا صار وقت اللزومي
والصبر زين الابسهم المواشي
والهاء : هروج كل يوم تعادي
كل يسوي فاهم واقتصادي
ياطيبكم عند العشاء والمنادي
والصبر زين الابسهم المواشي
والواو : وهقنا المسمي ابراهيم
يقول انا بقلب جميع المفاهيم
ياعزتيلة علقوه الشغاميم
والصبر زين الابسهم المواشي
والياء : ياربي طالبك ترحم الناس
وان تنتقم يارب من فعل الانجاس
ولاباس ياللي صابة الهم لا باس
والصبر زين الابسهم المواشي ================================================
اخوكم ابو هلا ( منقول )
|
 |
 |
|||
 |
 |
||||
رد مع اقتباس
المفضلات