منقول..

السلام عليكم و رحمة الله و بركاتة <--- من تالي ما يسلم إلا العضو الجديد


يقول لك .. الرفع مذموم في كل الأحوال ...

لا ترفع نظرك لمن هم فوقك تتعب ..
و لا ترفع خشمك على العالم والناس يسفلوون فيك ..
و لا ترفع احجاجك قدام احد ... لا يحسبك تشر له ..
و لا ترفع صوتك في وجه الخلق لا يطبون بطنك ..
و لا ترفع اكتوفك عشان لا يقولون : على باله مثقف ..
و لا ترفع يدك على أحد ... لا يكسرها لك ..
و لا ترفع صدرك لا يقولون : هذا عربجي ..
و لا ترفع ثوبك في الكوره ،،، لا يدخل فيك كوبري ..
و لا ترفع المفعول به يقولون هذا هندي ما له باللغة ..

اذا كان الرفع مو عجبهم ،، اجل النصب زين .. ؟؟!
النصب اردى و اردى ... مع ان العالم ماخذين راحتهم فيه ، طيحين لك نصب بنصب ،، و لا أحد قال لهم شئ :

في هالبران العالم شغله نصب .. خيام
و في هالعماير المقاولين مدهرين في نصب .. العمدان و القواعد
و في المناسبات طايحين لك بوضع النُصب التذكاريه .. !! و لا احد أنكر عليهم أو قال لهم لا .
و في العروس و الزوجات ناصبين لك الكوشه .. عني عينك قدام المعازيم و الكل مستانس و يضحك ..
و في البنوك و مكاتب اشتراكات الاتصالات .. النصب بالكيلو ، و لا تهون المعارض و مكاتب العقار .
في الإنترنت و المنتديات الشغل على وذنوه نصب في نصب .. و الأمور طيبه ..
يا خوك في المجالس و مع الأهل و الجيران و زملاء العمل ..تشوف الواحد ينصب قدامك ،،، و هو متأكد انك عارف انه ينصب ..و عادي !! الجميع نصب في نصب .. أهم شيء ان فيه سواليف !!
لصارت أمريكا ماسكه العالم مغير نصب ... و كلن موقن انه نصب ،، و مدنقين روسهم و مصدقين ،، إلا غصب عليهم يصدقون النصب ..
لا وما يغثني كثر هالسلنتح إلي اليوم ... صاروا يتفاخرون في فن النصب و الكذب و القدره على التلوون و النفاق ...و تلقاه ينصب في وجهك و من ثما يبتسم افتخاراً بمهارته في حبك النصب !!!




يعني .. لا رفع ... و لا نصب !!

الظاهر اني بـطيح في الظم ،،، و اطلع فيها !!

و مالهُ نمشيها موضه ...و إلا وش رايكم .. ...

خلاص يكفي مع السلامه ،،،