هذا السهم سيلامس النسبة القصوى غداً بحول الله وقوته
بسم الله الرحمن الرحيم ،،، وسلام الله عليكم جميعاً
من زمان الواحد ما وصى على سهم نسبة وحساسيته على الكورة ضعيفة بعد الانقطاع الله يخارجنا على خير
سهمنا بحول الله وقوته سيلامس النسبة القصوى غداً فأن أصبت فمن الله وأن أخطئت فمن الشيطان وأبوضروس والله ورسوله بريئان منه ،،، عشان نكون متفقين من البداية
على طاري أبوضروس اللي بسببه وصلتني التوصية كنت قاعد يوم الأربعاء على النت وفاتح قناة المحور المصرية أتابع هبال المصاروة المهم وأخوكم لاهي بالنت إلا وأسمع بأخبارهم أن البابا أبو ضروس يغرد تغريدته الثانية للأقباط المصريين على حسابه في تويتر !!
واقحص من مكاني كني مقروص واقعد احلطم على عمري ،، سواها النذل علقنا بفيبكو وراح يشتغل بابا بمصر ! أكيد بأرباح فيبكو إللي صرفها علينا أشترى أصوات الأقباط وانتخبوه بابا عندهم ،، ومسوي حساب بتويتر ناوي يستخدمه بعدين للتصريف على الأقباط وجلب المحافظ مثل كثير من الحسابات إللي بتويتر اللي كل شوي ناقز واحد ويقول مبروك للي دخلوا معانا هذا الأسبوع وحققوا 15٪ وللاشتراك راسلوني على الخاص !! على باله يغري أصحاب المحافظ
المهم لين فيه واحد من الأصدقاء يقال له سعد بن سعد من حقين الأسهم المتمكنين وله في علم الأديان والمذاهب قلت ابي اسئله وشلون أبو ضروس صار بابا بمصر وهو مسلم ؟ وأقوم واتصل عليه ويرد وعلى طول بدون مقدمات قلت شفت يا سعد النذل أبوضروس بعد ما علقنا بفيبكو راح اشتغل بمصر بابا الفتيكان !
المهم ما دريت إلا ويقول لو ما أعرفك زين كان أقول فيك بلا وجلا وعلم خجلا !! قلت يا أخي قبل شوي سامعها بقناة المحور المصرية أفتح التلفزيون وشوف نشرتهم الجاية أكيد راح يعيدون الخبر ،، قال شكل تعليقة فيبكو لحست مخك وأول شي وش جاب الفتيكان بمصر ؟ ثاني شي بابا الاسكندرية يسمونه الأنبا تواضروس يا فالح مو أبوضروس !!!! قلت لا تلومني يا سعد لأن أبوضروس قاهرني من ضربته لفيبكو وصار أي شي فيه ضروس أتذكر فيبكو وأبو ضروس حتى لو عند طبيب أسنان
على فكرة سعد بن سعد دايم يقرأ كتب غريبة وكلها أشياء عن العبادات الغريبة والروحانيات وخزعبلات وما أدري ليش أحس دايم أن سعد بن سعد راح يجيه يوم ويصير يطير وما عاد يمشي على رجلينه من ذا الكتب اللي يقراها
أذكر مرة لخمني سئلني قال شربكه أنت أحياناً ما يصير موقف وتحس أنه قد صارلك من قبل وبنفس التفاصيل وكنك عشته قبل كذا ؟ قلت والله تصير أحياناً ،، قال هذا هو ،، تكون الروح اللي كانت عند صاحبها الأول عاشت هذا الموقف وبعد ما مات صاحبها أنتقلت لك وتكرر المشهد !!! قلت تعوذ من ابليس يا سعد وش هذي الخرابيط !! وهذي الخرابيط اسمع أن النصيرية العلوية يؤمنون فيها جماعة بشار العنز لكن سدير ما خبرت فيها علوية وكلهم راعين دين وصلاح إلا إذا جدانك من قرداحة ولاعبين على شيبان سدير أنهم سديراوية ومن الخطامة وقاعد تلعب علينا رحتا وجيتا وفيذا وفيذاك ! أعترف يا سعد ،، يوم قعد يضحك قال هذا الشي فيه ديانات تؤمن فيه بسبب جهلهم ،، قلت والله ما أدري عنك وعن خرابيطك ويوم جسيت نبضي وشفتني عصبت وما جيت على كيفك صرفت الموضوع ،، وشوي وترجع بي الذاكرة واتذكر حادثة صارت يوم كنا بخامس ابتدائي كان جايب فسحته أكلة غريبة وما عرفت أنها مقدوس إلا يوم كبرنا وتفتحنا على الدنيا وصار عندنا بالحارة جيران شوام وأربط سالفة المقدوس بسالفة تناسخ الأرواح ،، وإلا زملانا اللي بالمدرسة من أهل سدير خابر فسحتهم ،، يا تاوة يا مراصيع يا جراد مملح مصيود في أم الرجوم
المهم قال لي دامك جبت سالفة أبوضروس ما دريت وش صار فيه ؟ قلت ما أدري يقولون أشتغل هو والهويميرة ودخلوا شمس وبعدين تطاقو كعادة الشبيحة ،، قال ،، لا ،، فيه علم يخليك تستانس قلت عطناه ،، قال الهيئة تلو أبوضروس مع أذانيه ،، قلت يستاهل وماهي أول مرة يحققون معاه ،، قال هالمرة تختلف لأن تلته على مخالفات في سهم فيبكو ،، قلت أحلف قال قسم بالله مثل ما أقولك ،، واتشقق من الفرح ،، قلت شفت يا سعد أن ربك كبير وما يضيع حق وأخوك رجال محسن ظنه بالله ،، ويا سبحان الله بنفس السهم اللي ضربنا فيه صادوه فيه !
وأقوم وأذكره وأقول له تتذكر يا سعد يوم ندخل أختبارات الدور الثاني بثالث متوسط بمادة العلوم ويوم طلعنا من الاختبار قلت لك يا سعد أنا ما حليت زين وشكلي راح أعيد السنة وأنا ماني زعلان عشان راح أعيد السنة وإللي مزعلني أني أنا وياك من رابع أبتدائي مع بعض وراح نفترق وأنت راح تنجح وتروح وتتركني ،، وقمت تهديني وتقول يا أبن الحلال كلنا بمدرسة وحدة وراح نتقابل كل يوم بالفسحة ومسوي فيها حكيم وتقول سنة من عمر الشعوب لا شي ،، ويوم طلعت النتايج وتسقط أنت وتعيد السنة وأطلع أنا ناجح !!! تتذكر ،، تتذكر وقتها وش قلت لك ،، قلت لك سبحان الله يا سعد أنا حاس أن فيني شي لله ودعوة لي مستجابة .
المهم قال خلنا من ذكرياتك البايخة والسخيفة وقول لي وش مسوي بالسوق ؟ قلت أبد تفتح المنتديات تلاقي كلها تخرع في تخرع وكل واحد فاتح موضوع خلك حذر لا يقفل السوق وعندك سهم ! أنتبه تروح تتغدا وبالمحفظة سهم ! بيع وبعد الغدا ارجع اشتري سهمك عشان ما يغافلونك وانت تتغدا !! يعني كن صانع السوق يحتريني أروح أتغدا عشان يضرب السوق ويصيدني !!! وسدوا نفسنا عن السوق وما عرفنا نشتغل ،، وما أدراك فيه واحد بعد ما باع الدرع وطقطق بالهندية مع فتى الجنوب وراعي الهيلا يقول أننا بعد أسبوعين بنموت كلنا ووفروا كاش :) يعني ما أدري وش راح تفرق إذا كنا كاش أو متعلقين بأسهم دامنا راح نموت حنا وورثتنا !!! ويبي يموت العالم قبل ياجوج وماجوج ما يطلعون إلا إذا كان يبي يوفر على ياجوج وماجوج مشاوير محاكم ووكالات وشهود عشان تقسيم ورث البشر !!
وعلى طاري راع الهيلا قبل كم يوم اختلفت مع أم نجد حول موضوع يخص حياة الفهد :) المهم وأدخل النت عشان اتأكد من الموضوع المهم وأكتب بقوقل أول حرفين من اسم حياة ويطلع منتدى أسهم وافتحه أقسم بالله تفاجئة فيه وما دريت عنه إلا قبل كم يوم ،، منتدى غريب تلاقي الموضوع تحته 8000 رد والله العظيم مثل ما أقولكم عدد الردود بالمئات والألوف ،، والموضوع الغير مشاهد تحته 420 رد هذا مسكين راعي الموضوع ما أحد يحبه ! وبعض المواضيع تلاقي عدد الردود أكثر من عدد المشاهدة :) ما علينا من هذا كله المهم أغلب الأعضاء قاعدين يطبلون لأسهم راعي الهيلا ومعلقين الناس بسهم ايس فوق 190 ويقولون للمتعلقين أمسكوا أسهمكم ؟؟؟ أقسم بالله أنقهرت وقلت طيب يالخال أنا دواك دام هذي علومك ان ما صفيتك مع الشبيحة وحطيت أسهمك قبل أسهمهم يصير خير ،، المشكلة قبل يمكن أسبوع قاعد أقول له الله يقويك يا راعي الهيلا واحسبه يشتغل مثل ما قال لي لكن الرجال طلع شبيح على أصوله ومنتدى كامل يطبل له ويمكن هو راعي المنتدى ! الشبيحة مالهم امان .
وينك يالمطيري على 20 رد رديتهم قلت شربكه ياخذ قضوم للنت أجل الجماعة هناك شغل بازوكا :)
نرجع لموضوعنا :) قال سعد ما عليك منهم وهذا الزين كل يوم يلحقون أسهمهم مرتفعة أكثر من اليوم اللي قبله وخلي الجماعة يرفعون أسهمهم 30 أو 40٪ ثم يرفعون لهم كم سهم ثقيل 5٪ ثم يرفعون سابك فوق التسعين ثم يبدأ التطبيل بالايجابية ثم يدخلون الصغار اللي يصدقونهم ثم يصرفون عليهم ثم ينزل السوق ثم يرجعون يشيلون أسهمهم اللي باعوها وهكذا دواليك ! قلت له يا سعد والله أني ناصحهم من فترة أنكم لا تلتفتون للي ينكتب وراقبوا شركاتكم لكن ما أحد طاعني ومازالوا خايفين لكن الحمد لله بعض اللي يراسلوني على الخاص طاعو شوري ! قال المهم فيه سهم نسبة يوم السبت ان شاء الله ،، قلت ألحقني فيه وأهم شي ما يطلع توهيقة ،، قال ماعليك إللي بالسهم ذيابة ،، قلت إذا هم ذيابة ونسبوا بالسهم بكرة ان شاء الله بصير أكبر مطبلاتي لأسهمهم قال لا تخاف أشتري وأنت مغمض لكن بشرط إذا شفت السهم فاتح قاب أكثر من ثلاثة بالمية لاتقرب وخلي طلباتك تحت ولا تلحق السهم وتسوي مثل سالفة فيبكو ،،، سامعين يا شباب وسامعين يا مشرفين وسامع يا حج إسماعيل وش يقول الرجال ،، طيب وش السهم قال أنابيب العربية ومثل ما قلت لا تدخل على قاب أكثر من ثلاثة بالمية وان شاء الله يعطيك تحت ،، قلت تكفى قول لربعك يبيضونها لأني راح أدخل معي ناس بالسهم قال لا تشيل هم لكن مرة ثانية فكنا من ذكرياتك البايخة قلت سم طال عمرك دام وراك سهم نسبة لو تبي أفقد الذاكرة فقدتها .
وتقولون وش نسوي السبت ان شاء الله أقولكم خارجوا أنفسكم لين نشوف الأمور وش تصير عليه
الأخوة اللي راسلوني على الخاص المعذرة على التأخير بالرد وأحاول أرد عليكم في أقرب فرصة إن شاء الله
في الختام ادعو الجميع لقرائة كتاب ( إتحاف الجماعة بما جاء في الفتن والملاحم وأشراط الساعة ) وهو للشيخ حمود العبدالله التويجري ، وهو عبارة عن ثلاث مجلدات من الحجم الوسط ، وأكيد أنه موجود على النت ،، وفيه تفسير لكثير مما يحدث وسيحدث على الأرض من فتن وأحداث
وفقكم الله