تسلية مع هامور !

[المترقب]

يسعدنا في هذا اللقاء الجميل أن نستضيف معنا في هذه الليلة الأخ ابو فهد احد هوامير سوق الأسهم السعودية

* مساء الخير أخوي أبو فهد
-- هلا..

* يا خي بسألك سؤال في البداية
-- أسرع ... بسوي مكالمة مهمة..

س/ بخصوص الأسهم؟
ج / وش دخلك!

س/ آسف ..لكن بغيت ..إذا ممكن..أعرف هل تخص سهماً عندي؟
ج / وش عندك؟

س/ عندي سهم ينتظر رفع رأس المال
ج / ها ها ها ها ...... تصدق بهذه الخزعبلات!

س/ كيف؟
ج / هذه من ألاعيبنا عليكم....أبسألك سؤال....إذا كان رفع رأس المال يرفع قيمة السهم إذن تخفيض رأس المال المفروض ينزل السهم.....توقع منطقي....صح ولا لا؟؟


س/ صح
ج / شفت حنا لعبنا عليكم رفعنا اللجين علشان رفع رأس المال ورفعنا المواشي والقصيم علشان إنتظار تخفيض رأس المال..أمران متضادان......ها ها ها ...... يا حليلكم يا صغار المساهمين.


* الله يستر منكم يا الهوامير!!
- وش عندك بعد؟؟


س/ طيب أسهم التعمير والجماعي والبحري والكهرباء وغيرها كانت متوهجة والمضاربات عليها حامية لكنها خمدت الآن ونشطت أسهم كانت مهملة؟
ج / شف يا حبيبي هذه بعناها عليكم وعلى غيركم تبي نطلعها تبيعونها علينا من فوق!


س/ طيب يعني ماراح ترفعونها؟
ج / ما قلت كذا لكن إذا أخذناها منكم بالسعر اللي نبي والسوق ما جاه نزول يكون لكل حادث حديث.


س/ طيب وأسهم مثل الأحساء والكابلات شلون طلعت مع أن قيمتها كانت نصف قيمة التعمير الجماعي ...كذلك الفنادق وطيبة تعدتها بكثير مع أنها كانت تحت المائة وتتعب راعيها!!
ج / هذه كنا نجمع فيها ولا معنا أحد يذكر وجاء هالحين وقتها!!

س/ بس يقولون فيها أخبار حلوة مثلاً الكابلات فيها عقود الخ.....
ج / يا حليلك الكابلات العام الماضي أعلنت عن عشرات العقود وما خلينها تتعدى السبعينات..... وكنتم بمنتدياتكم تستغربون وشلون ما طلعت مع هالعقود....لكن ما كنا فاضين لها يا حبيبي....كنا بأ سهم مثل التعمير اللي تطبلون له بالشيك والتعمير اللي تطبلون له بالأرض....ويسد.....وش عندك بعد؟


س/ وش تتوقع يطلع هاليومين؟
ج / أكون غبي لو قلت لك...نزول... تبيني أكذب عليك؟

س/ طيب وش أتجاهات السوق في الأسابيع القادمة؟
ج / راجع منتدياتك وتعرف..... ها ها ها

س/ أبي رايك أنت؟
ج / حلو..... حلو..... لا ورى ما تقول علموني وش تبون تطلعون بكرا؟؟


س/ وش فيها.... الدين النصيحة!
ج / إلا بالقروش
* تقصد بالكروش لووووووووووووول
-- أها لا تغلط ..... ولا ترى بكرا أرش الأسهم اللي معك تراي عرفتها!!


* الله يستر منك
-- ممكن نكمل لقاءك هذا بكرا بعد الظهر أنا هالحين مشغول مع الربع


س/ أقدر أساعدكم؟
ج / لا قل أقدر أتفق معكم.

س/ وش عليه؟
ج / نبي نصيد لنا مجموعة غزلان اسمها"صغار المساهمين" بكرا ها ها ها

* الله يستر منكم ... نكمل بكرا
-- نشوف!!

س/ هاه جاء الظهر عساك فاضي؟
ج / لسؤالين لا أكثر


س/ طيب يقولون لكم أبواق تكتب بأسمائكم في المنتديات صحيح؟
ج / وشوله؟ كلكم قايمين بالواجب.

س/ كيف؟
ج / نقرأ المنتديات ونتصرف؟


س/ تستفيدون منها؟
ج / من أخبارها نعم.... لكن من توقعاتها يا زين معاكسها


س/ لكن....
-- لا تكمل خل الباقي لبكرا .... اليوم الضحى تعبت مع الربع وأبغى أنام


س/ عسى ما شر؟
ج / قلت لهم خلونا نطلع سهم معين......هو..... لكن قالوا مهوب وقته..... فيه خبر يعني مهيب حلوة على السهم إذا طلع ضغطنا عليه وطفشنا ربعه منه.... ونشوف بعدها وش نسوي

س/ يعني تتحكمون بالسوق على كيفكم؟
ج / أجل .... خيوط اللعبة كلها بيدينا


س/ ومؤسسة النقد؟
ج / وشو هذي بيتزا؟؟؟؟


س/ لكن.....
ج / يكفي تراي دايخ خل الباقي بكرا


س/ سؤال أخير والباقي لبكرا؟
ج / بسرعة

س/ إذا بغيتوا تطلعون سهم لكن فجأة السوق نزل.... وش تسوون؟
ج / أولاً فجأة هذي با لنسبة لكم.... لكن لو.... أقول (( لو)) كانت فجأة لنا ما نسبح ضد التيار... ننتظرالزوبعة تروح ونتصرف.

س/ يعني تتركون السوق؟
ج / لا يا أخي نقعد نطافش مع هالصغيرين .... على ما نشوف بوعنا من كوعنا.

س/ على فكرة هل معك شهادة ؟
ج / نعم مدرسة الحياة.... والإ بتدائية لا تنساها.... لكن ابتدائية ما هي مثل ابتدائياتكم!! يكفي... خل الباقي لبكرا.... تأخرت على نومتي الظهر مع هيام.

س/ ما شاء الله من هي هيام؟
ج / زوجتي الشامية الجديدة.... وأنت كل شيء تسأل عنه.... هيام هي اللي تقرأ لي منتدياتكم!! اليوم كلمته علشان باقي المقابلة ردت علي هيام قالت لي .... يقول مرنا بكرا.. فإلى الغد .... لكن قالت لي يقول عليك بالسهم الأصفر.... حاولت أعرف وشو هذا السهم..... قالت ما قال لي.... هو هسا بيلقح النخل مع الشوفير .... قلت لها شكراً.


* جزاه الله خير كلمني بالتلفون يعتذر ..وقال ما أقدر على المقابلة اليوم ... قلت خير .... بس سؤال الغذائية هي التي طلعت اليوم بوضوح هل بترفعونها العصر؟؟

-- اسمع اليوم الصبح دخلوا معنا بعض ربعكم .. إن دخلتوا معنا العصر بقوة رميناها بحلوقكم وانتظرناها تحت ... وإن كان ما دخل معنا أحد يسوى طلعناها زيادة.... صدقني ما أقدر أأكد لك إلا العصر!!

-- اليوم أشوف كتاب المنتديات هذه الأيام مثل الورقة بأول الصفري... قلت له كيف؟ قال مرة تهب عليهم جنوب ومرة شمال ومرة غرب... يوم يقولون السوق انهيار الخروج الخروج.... ويوم يقولون ادخلوا وبقوة.... ويوم ضيعناهم وضربنا راداراتهم لأن كلها تقليد.


* قلت كيف؟؟؟
-- ما معهم فلوس مثلنا يخلون الرادار يمشي على كيفهم!! نرش شوية أسهم يتراجفون من الخوف!! ونشتري اللي يقسم الله منهم.... ثم نرفعه وندور أسهم بالملايين تخلي بلاعيمهم تذوب ويلحقوننا !!!.. تصدق عندي السهم (؟) الآن فوق 100 ريال ومعدله علي 17 ريال فقط من كثر ما جرجرنا ربعكم فوق تحت!!


* على فكرة لما شفته قال لي عرفت وشو الأصفر اللي قلت لك أمس !! قلت لا؟؟
-- قال لي الذهب وشلونه؟؟

** قلت أصفر.
-- قال واللجين وش معناه بالعربي؟؟

** قلت الذهب.
-- قال هذاك عرفتها.


* قلت والله انك ذيب يا هامور... طيب بكرا وش تبي تسوون بالأصفر؟؟
-- وش تتوقع ؟؟


* حاولت أجامله قلت أنت أبخص...لكن كان حذر قال أجل اصبر لبكرا وتشوف..........

* قلت نزول ولا طلوع؟؟

-- قال نزوع (( بالعين : يعني ضيعني لا طلوع ولا نزول))؟ ؟!!! إهب يا الذيب!!

-- لكن قال أبقول لك على سهم بيطلع هاليومين لكن احلف لي ما تقول لأحد!!

وسكت شهريار عن الكلام المباح


* اليوم الظهر رحت للمسجد اللي يصلي فيه وخليتها كأنها صدفة .... شفته ودردشت معه وكان مستانس وطول معي ....

-- يقول هاليومين حشينا منكم يا هالصغار لا عدمناكم .... قلت تستاهلون وحنا كسبنا .... قال حنا ودنا نكسب وأنتم تكسبون.... لكن إح إح

** قلت كمل؟؟


-- قال ولا بلاش!!


* قلت له السوق هذي الأيام يطلع مئات النقط والمضاربون اليوميون الصغار ما يستفيدون كثير (( فهم كالأطرش بالزفة ))
-- قال صحيح وأنا أخوك تغيرت تكتيكاتنا عن اول.....الطريقة اللي كنتم تحسونها تصريف في الماضي نستخدمها اليوم للتجميع...وإذا بغينا نصرف نعمل بالطلبات أو العروض عملا نخليكم تحسونها تجميع...


*قلت له كيف!!
-- قال أنا منيب قايل لك لكن راقب وتعرف..... شف أحيانا نخليكم ضايعين تماما ما تدرون السهم طلوع ولا نزول أمس أخذنا بالمواشي كل المعروض حتى إننا أخذنا مليون سهم ب 51 اللي يشوفنا يقول رايحة ل 55 بعدها رشينا إلى الخمسين!! هاه وش تقول طلوع هاليومين ولا نزول ؟؟


* قلت والله انكم ذيابه ضيعتونا؟؟؟
-- قال الآن أسهم ببالي سوف تعضون الندم وراكم فوتوها ؟؟وبعض أسهم نبي نموتها على سعرها إلى ما يأمر الله !!



* قلت تكفى قل لي واحد ؟
-- قال خلك من هذا واسأل غيره .


* قلت يقولون إنكم تبون تخلون الكهرباء آخر شيء ترفعونها ويجي التصحيح؟؟
-- قال تصدق ان بعض الربع قال لنا كذا...لكن ما دام انتشرت يمكن نغير استراتيجيتنا!!


* قلت له وش رأيك بالتعمير؟؟
فجأة جاء سواقه وركب معه قال نكمل بعدين!!

-- أفضل ما قال لي: شف إذا كثر كلامكم بالمنتديات عن سهم وصاروا كل يوم يطبلون له..ابعد عنه..لأن كل يشتري فيه ..وشلون نطلعه ..تبون ترشون علينا يالصغار من فوق؟؟


* قلت له هذا دائما؟؟
-- قال لا لكن غالباً ,,,حتى يملون القراء من توصيات المنتديات للسهم هذا وبعدين نشوف!! شفت أحرقتم على أنفسكم سهم ما أقوله لك لكن سعره بين 160 /180 من كثرة التطبيل!!

العجيب وهو ماشي ..قال عليك بسهم محسرن بكم؟؟؟ وما أمداه مع الأسف يقول لي وشو!!

وفي ختام لقائنا هذا نشكر الأخ أبو فهد على رحابة صدره وقبوله دعوتنا ولكم مني مشاهدي الكرام أطيب التحايا وأعذب المنى


( منقول )