من يشرح لي عن المدارس الاهليه من عقد الايجار الى تسليم الشهادات ؟

[ستلايت]

دام المشرف فهد يقول فلوها كل خميس وجمعه
فسوف استغل المتبقى من الفله إلى الساعه 11 بكره واطلب مساعدتكم

حيثو انني
انعزمتو قبل فترة عند احد الزملاء
اللي ساكنين في حي من احياء الرياض الراقيه ( طبعاً تراه من المستأجرين )
ويوم راحو المعازيم
جلست انا وياه نمشي على هاك الشارع الفاضي
ومع الكلام والسوالف وتفتيح المشاريع واحلام اليقظه
والانتقال من عالم المديونين الى عالم الاثرياء
طمرت في نفوخي فكرة انشاء مدرسه اهليه ( ماقبل الابتدائي )

قلت له : عندكم مدرسة اهليه ؟
قال : تصدق ماعندنا ولا عند الحي المجاور
وكلنا حاطين اطفالنا في حضانه وتمهيدي في قلعة وادرين.
قلت : طيب لو فتحت عندكم مدرسه
وعينت فيها كم قمر من المؤهلين لرعاية فلذات اكبادكم بتحطون عيالكم فيها ؟
قال: تكفى اخلص علينا وانا اول واحد ومعي الجيران
اللي متبهذلين من الباص اللي يتأخر كل يوم .
قلت : طيب انت تدخل النت ؟
قال : ايه
قلت : تدخل اعمال الخليج ؟
قال : لا
قلت : طيب لاتدخله الاسبوع هذا
لأني ابسأل الاعضاء وما ابغاك تعرف الطريقه ثم تفتح المدرسه وتخليني .


:

لذا يا خواني
هل فيه احد عنده خبره ودرايه بخطوات البدء في هالمشروع
ويعطينا من وقته وعلمه شوي
ويمشي معي خطوه خطوه ومن طقطق إلى السلام عليكم
يعني من الترخيص وعقد الايجار والتجهيزات وتعيين الكوادر والباصات .... الخ .

والمكأفأة أو الهديه للي راح يفزع لي
بتكون وحده من ثنتين
ياندّرس عياله مجاناً ترم واحد بدون توصيل
يانتوسط له ونزوجه وحده من الأقمار اللي بنعينهم في المدرسه :cool:

وعاد هو يختار اللي يناسبه من الهديتين .

[Waleed9]

طيب ممكن لو مافيه كلافه ترسلي موقع بيتكم :)
بالنسبه للتصريح أن يكون صاحب الترخيص مؤهل تربوي والتراخيص بالاصل تباع نظرا لبعض المطبات الصناعيه :)

[أبو عبود]

نظرتك الحسابيه صحيحه
هنا:D
http://www.thegulfbiz.com/vb/showthread.php?t=292357

[عوض الكريم]

اقول لك واسطه بالتعليم والا اقضب ارضك
والا الفكره مسكته وتنم عن ذكاء وفطنه
والفضل يعود الى صناع السوق اللي علقوك
وخلوك تسحب رجليك وتفكر

[KingOFchart]

وللمعلوميه بنك التسليف يمول المدارس (حضانه-روضة) بدون فوائد لكن لمرأة فقط
قيمة التمويل تصل لـ 2 مليون

[قبرص]

الخطوات :

1- تسوي دراسة جدوى عند أحد مكاتب الاستشارات الاقتصادية .
2- تطلع سجل تجاري بالأسم التجاري الي تبيه .
3- تتوجه إلى إدارة التعليم بطلب الترخيص .
4- تبدأ اجراءات طلب الترخيص من إدارة التعليم وتنتهي من الوزارة .

هذي كخطوات أولية ومنها الانطلاقة .

وبهذه المعلومات بشرط عليك نسبة مقدارها 5% لمدة 15 سنة .. قل تم :rolleyes:

[(ابو وسن)]

افتح حضانة بدون ترخيص وعلق اللوحة وشف السوق شلون طبعا لازم تكون ريحة الروضة ديتول وكلوركس ... اذا الامور زينه...شف لك معقب شقردي- من اللي عيونهم حمر- يدابك لك بالترخيص...وطبعا اذا احد بيفتش على الموقع فك اللوحة وارسل العيال والاقمار لاقرب حديقة.
اشتغل ترا ما حولك احد

[moody]

انا بقول لك الطريقة بس عاد ها ابغى الهدية الثانية الي بالي بالك ;);)
والطريقة هي شغل سلف وروح للتعليم الاهلي بادارة التعليم وهم يقولون لك الطريقة :cool:
:D وش رايك :D

[NOMERCY]

السلام عليكم
اولا الطريقة جدا سهلة لكن المشكلة وقت فتح باب قبول الطلبات انتهى الان. على حسب علمي... عن نفسي تقدمت بتصريح مدرسة عالمية وكان عدد الاشخاص المتقدمين قليل جدا والموضوع لايحتاج واسطة ولا غيرة لكن عليهم طلبات متعبة
منها
1- دراسة جدوى( من اي شخص او ابحث عنها في النت ) لية مكتب وياخذعليك فلوس
2-تعريف من عمدة الحي
3-برنت من الاحوال المدنية
4- ان تكون حاصل على شهادة جامعية ولايشترط ان تكون تربوي
5-تعبئة الاستمارات الخاصة بطلب
7- كشف البصمات ..
8- خطابات تعهد ( حسن سيرة وسلوك - تعهد بانك غير موظف - ثالثة والله نسيتها ) .
9-ضمان بنكي بقيمة 100 الف
10- كشف حساب للرصيد الجاري
وفي كم طلب والله اعلم بس السوق يخلي احد يتذكر شي
عموما هذي اهم الطلبات
ثم تنتظر قرابة 4 اشهر حتى يصلك الرد بالموافقة او الرفض مع العلم العام الماضي تم قبول كل الطلبات وحصولهم على تصاريح
ترى انا قدمت على التصريح عشان اجرة مافين لدوخة راس المدارس انا من سكان جدة
هذا الي حصل معي هنا مدري عن منطقة لرياض
اتمنى من الله اني ساعدتك ولو بشي بسيط

[ستلايت]

الأخ : وليد 99
موقع بيتنا او بيت صاحبي
لأن الزبدة هناك وهي الارض الخصبه للمشروع
وألا حارتي مليانه وتكح من المدارس
ومعاد فيها مطمع لأي نشاط

وبالنسبة لصاحب الترخيص
فالتخصصات كثيره ومتوفره في العائلة
وطب وتخير من ذكوراً واناثا
وكلهم موافقين يعطوني الشهادة ومعها تنازل وتوكيل .

\
/

الاخ : ابو عبود
انا من الاول كنت حاس ان الـ 90 هذي ماجات عبث
وإن وراها هدف وتحقق .

الله يذكر المصافي
وذيك الطياره F15 اللي جنب الشارت بالخير
وعسى ايامها تعود .

ومشكور على الهدية :D

\
/

الاخ : عوض الكريم
اذا الدعوه على الواسطه
فأبشرك بنلقى من الطيبين من بيخدمنا
بس انت متأكد ان الموضوع متوقف عند الواسطه بس

واما السوق فالحاجة يقولون هي ام الاختراع
واحنا تعبنا وسهرنا وجمعنا واقترضنا ودبلنا
وفجأة راحت فص ملح وذاب
والحين احتجنا
وقررنا نغير سوق الفلس :cool:

\
/

الاخ : ملك الشارت
اجل نعزم بكره وحده من الخوات بدون حضور زوجها
ونحط لها بوفيه مفتوح
ثم نطلب الشهادة والوكاله ;)

[ستلايت]

الاخ : قبرص
مشكور وماقصرت على المعلومات الجميله
لكن ترى النسبه اللي انت طالبها
ماوردت في الهدايا المتفق عليها
والمشكله الثانيه ان ال 5% ورانا ورانا :mad:
كانت خليتها على الاقل 4% او 6 %

\
/

الاخ : ابو وسن
على كذا من بكره بلوحتي هناك
بس ياخوفي ننحاش من التفتيش ونتورط بالهيئة

\
/

الاخ : moody
الهديه الثانيه ماتجي بالسهوله اللي انت تتوقعها :rolleyes:

وبعدين حنا نبغى معلومات ماقبل تشغيل السلف
لأن هذا قرار لابد منه في حال عشنا التجربه
واخذنا المعلومات من شخص لديه مثل المشروع
واعطانا الايجابيات والسلبيات .

\
/

الاخ : NOMERCY
وعليكم السلام ورحمة الله
ومشكور وماقصرت
وبصراحه ساعدتنا بالشي الكثير
وليس بالقليل كما تظن .

[استفهام]

إن كان عندك رأس مال.
فكّر ياستلايت باالتريلات والنقل وإن شاء الله التوفيق حليفك.

[ستلايت]

إن كان عندك رأس مال.
فكّر ياستلايت باالتريلات والنقل وإن شاء الله التوفيق حليفك.

والله يمدحون شغل المعدات الثقيله
لكن ماعندي حيل لمطارد العماله
وتسجيل بلاغات سرقه المعدات الثقيله من المشاريع

لكن عطني عقد تأجير مع ارامكو
واجيب لك عشرين شاحنه

غير كذا اخاف اسلم حلالي لمقاول حرامي وسواق داج
ثم يعدمها علي ويحطها في حلقي سكراب

[امبراطورالبورصه]

والله يمدحون شغل المعدات الثقيله
لكن ماعندي حيل لمطارد العماله
وتسجيل بلاغات سرقه المعدات الثقيله من المشاريع

لكن عطني عقد تأجير مع ارامكو
واجيب لك عشرين شاحنه

غير كذا اخاف اسلم حلالي لمقاول حرامي وسواق داج
ثم يعدمها علي ويحطها في حلقي سكراب
التامين يعوضك


اعد النظر
فى اقتراح الاخ
النقل
ذهب وخلي عنك المشاريع الصغيره
شوف عندك شركة الخزف تقدر تتعاقد معهم على نقل منتجاتهم
وكذالك حديد الراجحي
الدفع عندهم فوري
وفروعهم كثير وموزعينهم اكثر يعني منت ملحق شغل
وسبق لي التعامل معهم
لكن الطمع خلاني ابيع سياراتي واطب فى سوق التويجري

[ستلايت]

التامين يعوضك


اعد النظر
فى اقتراح الاخ
النقل
ذهب وخلي عنك المشاريع الصغيره
شوف عندك شركة الخزف تقدر تتعاقد معهم على نقل منتجاتهم
وكذالك حديد الراجحي
الدفع عندهم فوري
وفروعهم كثير وموزعينهم اكثر يعني منت ملحق شغل
وسبق لي التعامل معهم
لكن الطمع خلاني ابيع سياراتي واطب فى سوق التويجري

والله ماحنا بكارهين الخير ودروبه وزيادة الخير خير
لكن البلد مليان من اشكال صدام واعوانه
ولا فيه من يردعهم ويفكنا من شرهم

عشان كذا اشوف ان المدارس اهون واريح
وفيها خير ان الله بارك ووفق

لكن مايمنع نتطقس ونسأل
ولاتروح عنا بعيد
ترى في اي لحظه توقع اننا نطلب رقم جوالك
ومواعيد فراغك :)

والله يعوض عليك مافات ويفتح لك ابواب رزق ماتتقفل


سقوط عصابة صدام "السوري" بعد أن كبدت شركات ومؤسسات كبرى في المملكة خسائر فادحة

http://www.alriyadh.com/2008/01/18/article310137.html

[الهادي]

لذا يا خواني
هل فيه احد عنده خبره ودرايه بخطوات البدء في هالمشروع
ويعطينا من وقته وعلمه شوي
ويمشي معي خطوه خطوه ومن طقطق إلى السلام عليكم
يعني من الترخيص وعقد الايجار والتجهيزات وتعيين الكوادر والباصات .... الخ .

والمكأفأة أو الهديه للي راح يفزع لي
بتكون وحده من ثنتين
ياندّرس عياله مجاناً ترم واحد بدون توصيل
يانتوسط له ونزوجه وحده من الأقمار اللي بنعينهم في المدرسه :cool:

وعاد هو يختار اللي يناسبه من الهديتين .
اكثر من كذا اغراء ما فيه ...
فابشر اخوي ستلايت باللي نقدر عليه ...
المشروع مجدي جداً .. ونظيف جداً .. ويخدم المجتمع سواء من حيث التوظيف او من حيث التعليم والتوعية .. وراسماله صغير نسبيا ...
الخطوات كالتالي :
عندك اكثر من خيار لتحديد صيغة المدرسة ... مثلا مدرسة اهلية لا تخضع للرئاسة وهذي تعتمد بحسب طبيعة العملاء .. لأن بعض العملاء يبحث عن مدرسة تحت اشراف الرئاسة ... لكن هناك مدارس كثيرة من هذا النوع وعملائها يعتمدون على السمعة والمعرفة والعلاقات ...
تصريح مدرسة عالمية .. وهذي لها شروط مختلفة من حيث المواد والكوادر .. وتركز على المناهج العالمية ...
تصريح مدرسة اهليه وهذا الاكثر شيوعا وخطواته كالتالي :
- تقدم على التعليم الأهلي بوزارة التربية والتعليم / تعليم البنات .. وتحدد المرحلة المطلوبة روضة أو روضة مع ابتدائي ... وقد يطلبون منك سجل تجاري .. واستخراجه سهل جداً ...
- تستاجر مقر وتوفر فيه شروط السلامة المطلوبة من الدفاع المدني ... وعقد الايجار عادي زي اي عقد ...
- خلاص الباقي انت وشطارتك لأن عدد الفصول والموظفات والباصات والأثاث يعتمد على عدد الطلاب المتوقع ...
التعيين : فيه عند الرئاسة قائمة مرشحات لكل وظيفه وتخصص تقدر تختار منها ...
وكثير من المدرسات يقدمن مباشرة لدى المدرسه وتقدر تختار منهن .. طبعا بعض الانتهازيين يشغلونهن مقابل شهادة الخبرة .. يعني مجاني لكن هذا يضر بمستوى المدرسة ...
تحتاج الى خادمات حسب عدد الفصول والطلاب ...
تحتاج الى حارس وسواق ويمكن في البدايه يكون هو نفسه ...
تحتاج باص واحد على الأقل وتقدر تاخذه بالتأجير ...

المهم انه مشروع مجدي ومفيد .. ومرن يعني تقدر بعد ما ينتهي التسجيل ويتضح لك عدد الطلاب توظف وتجهز حسب عدد الطلاب .. سنة بسنة ...
ويمكنك فتح نادي يوم الخميس لتعليم اللغات او السباحة او الفنون الخ ...
كذلك يمكنك فتح نادي صيفي شهري لنفس الغرض .. والناديين بامكانك تاجيرها اذا كنت لا ترغب او لا تستطيع تشغيلها ...
كذلك تحصل المدرسة على اعانة سنوية حكومية وهذي تعتمد على تقرير الرئاسة عن المدرسة ... (هذي اسمع فيها بس مدري كم ولا شلون تجي) ...

الاهم اخوي ستلايت ان الحي اللي انت ناويه يكون مأهول جيدا .. وعوائل كبيرة .. لاني من تجربه اقدر اقولك 90% من طلابك ومدرساتك راح يكونون من الحي نفسه ... من النادر ان احد يرسل طفل 10 كيلو عشان الروضه ...
والمهم ان يدار المشروع بطريقه اقتصاديه لان الحريم يكفيهن الوناسه كل يوم فيعتبرن المشروع ناجح حتى وهو خسران ...


هذا مالدي اخوي ستلايت ومستعد لخدمتك متى وكيف شئت ...
وبريدي cemoi121@yahoo.com

كما ارجو زيادة الرابط التالي :
http://www.scb.gov.sa/getdoc/ff1974b5-d5c1-4a2f-89b6-b2a505e455bd/SchoolProj.aspx

[ستلايت]

والله ماقصرت ياخوي الهادي
لعيون القمر عطيتنا كل المعلومات هذي

اجل لو انا حاط الهديه قمرين وش بتعلمنا به :)

وان شاء الله يكون فيه تواصل اكثر في الايام الجايه

[NOMERCY]

الحمدلله طلع لي تصريح فتح مدرسة عالمية
اتمنى ان الاخ ستالايت ايضا طلع تصريح
عموما تصريح المدرسة للأيجار لمن اراد لسكان جدة
والله يوفق الجميع

[شوبـاش]

وش صار على مشروعك ؟