فزعتكم ... همي صار همين ؟؟؟؟

[انهيار]

همي الاول : خسارتي في الاسهم الله لايعطي صناع السوق عافية ( والله ما ادري منهم صناع السوق )


همي الثاني : رمضان قرب والاسعار نار وانا مسوؤل عن 4 عوائل في بيت واحد

وش اشتري بدل الارز ... فيه احد يتسخر على شي غير الارز ... دلوني الله يجزاكم خير .... افكر باغراض رمضان من الان والله يعين ...

احد همه الاكل وشلون يوفرة واحد همه السفر وين يقضية ؟؟؟؟؟؟؟

[معشوقتي سدير]

زبن العوايل عند خالك أو خالتك اذا كنت متزوج
أما اذا كانوا عوايل يقربون لك فعليك وأنا أخول بالفول والفلافل ومطبق
الله يدومها من نعمه والله يعوض علينا وعليك

[abu_rayan]

الله يعوض علينا وعليك

ماهى على راسك ,,,,,,,,,,,,,,

[المحامى]

والله حيره

بس الرز مارتفع كثير يعنى 10 ريال بالقطمه ام 10 كيلو تفرق معاك 10*4=40ريال
اذاكل عايله يكفيها قطمتين رز ابو 10كيلو يعنى 80ريال

بلاك من سعر( الغنم )اللى دبل ويمكن يزيد فى رمضان .
اسال الله ان يعوض علينا وعليك بالعفو والعافيه فى الدنيا والاخره ...

[الدرعيه]

ياحبيبي أترك عنك راعي سدير لا يوهقك
ترى الفلافل والفول تضمي
صدقني لو يتسحرون عليها يحلفون ان مايجي الظهر الا براطمهم
بيض من الضمأ
يارجال ما لك الا الكبسه الله لا يخلينا والله لو يصير الكيس ب1000
ريال
وبعدين وش زاد 33% مهيب شيء
مثل ما قلت لك كبسه ولحفها بلبينه
وارقد وما عليكم الا العافيه
انت والعوائل كلها
ولا تحاول تغير شيء

[د. حمد النافع]

حول الفرق من بند إلى بند، خفض الحد الائتماني للجوال، أو غير نوع الصابون إلى نوع أرخص وخذه بالكيس (25 كيلو)، امسك بزمام الأمور وخل الصرف فقط عن طريقك وقلص شراء المواد الاستهلاكية، بإذن الله راح تطلع الفرق. الحاجة أحيانا تفجر الطاقات، وهذا ما حصل تماما في ألمانيا واليابان بعد الحروب اللي تعرضوا لها، وأصبحوا رواد الصناعة، حاول إنك تبحث عن الشيء المميز فيك وتستغله في رفع مستوى دخلك الشخصي. ولا تستحقر أمرا أبدا فالراتب عمره ما كان مصدر للثراء.

[حرقوص]

الله يرزقك ولا يحيجك الا لرب العالمين

المهم عليك با الشوربة مع الكروش والكوارع
مغذية جدا ولذيذة
واهم شيء رخيصة
بس نم بلحالك في النهار خابر انت شغل الكوارع وحدة بوحدة

[فيصل الحربي]

من جد مت ضحك... لاني فتحت الموضوع ناوي أفزع... ومت ضحك من
أسلوبك الرائع..المهم عليك برز تلدا ! والعوائل حط لهم رصيص.......!!

[وسم]

يا دلعكم يالسعوديين :mad:

مهوب لازم رز

لاااااازم رز يعني ;)

ليش ما تاكلون اسباجيتي



على وزن الملكه الفرنسيه اللي قالت خل ياكلون كيك والناس تون تبي خبز :D

[سهمكو]

والله مالقها الا الهنود والبنقالية وباقي العمالة افطار صائم في رمضان والزايد ياخذونه للسحور ( حتى العمال المسيحيين يقولون ليه ما تكون السنه كلها رمضان )

[alrajel]

بسيطه ان شاءالله , اشتر رز مصرى وسحرهم سليق..
واقترح عليك مادام عندك 4عوائل فى بيت واحد , أجرو البيت واحتلو مدرسه
تسكنون فيها , واذا طلبت الحكومه منكم اخلاء المدرسه قالو حنا نفذ كلام الوزير
الى يقول استبدلو انواع الرز على حسب الميزانيه واستبدلنا السكن مع الرز على حسب الميزانيه

[saber]

يا أخوان أنا استغرب ليش الناس مخليه رمضان شهر لكل ما لذ وماطاب لازم يكون فيه تقشف شوي

رمضان صار مائدة + طاش ما طاش

أعرف ناس في رمضان يحرصون على صلاة التراويح وينامون عن صلاة الفجر

يعني رمضان صار شهر التناقضات

الله المستعان

[انهيار]

يا أخوان أنا استغرب ليش الناس مخليه رمضان شهر لكل ما لذ وماطاب لازم يكون فيه تقشف شوي

رمضان صار مائدة + طاش ما طاش

أعرف ناس في رمضان يحرصون على صلاة التراويح وينامون عن صلاة الفجر

يعني رمضان صار شهر التناقضات

الله المستعان

الله يحزاك خير اقولك نبي نتسحر شي يشبع الاطفال والشياب ... وانت تقول ملذ وطاب....