جب لنا زبون ولك عشرة مليون

[Ksahelp]

بسم الله الرحمن الرحيم


دق التلفون الساعة وحدة بالليل

رفعت الجوال وانا لسا نص نايم

شف الرقم لقيته ابو خالد

رديت هلا ابو خالد عسى ماشر

ابو خالد: كل خير ان شاء الله

انا: وش فيه

ابو خالد:مافيه شيء فيه بيعة وفيها عمولة حلوة

انا: الصباح رباح

ابو خالد: خلاص اكلمك في الدوام


الساعة ثمان الصبح

دخل ابو خالد المكتب معه المعاملات والبريد يوزعه على الموظفين.

ابو خالد: صباح الخير هاه فاضي الحين

انا: تفضّل عطنا السالفة

ابو خالد: طال عمرك هذا فيه امر بيع من مصنع أسمنت اليمامة لكمية خمسين مليون كيس بسعر ب14 ريال والوسيط له نص ريال عمولة;)

انا: يعني 25 مليون ريال عمولة:eek:

ابو خالد: الله الله جب لنا زبون ولك عشرة مليون:)

انا: طيب منين لك هالأمر :confused:

ابو خالد: هذا واحد ذكرلي اياه وقالي اذا لقيت زبون لك نص ريال بالكيس:D

انا: طيب اسمنت اليمامة كل انتاجه حول اربعة مليون طن اسمنت انت بتبيع منهن مليونين ونص!!! :rolleyes:

طارت عيون ابو خالد وقال: ممممم يمكن مالقو زباين؟؟؟

انا: يعني سلطان بن محمد مايدري وش يسوي بهالاكياس؟ اخبر الناس صافين طوابير يبون اسمنت.

ابو خالد: والله مدري هذا اللي جان!

انا: يعني قيمة الصفقة 700 مليون ريال ينطح ريال

ابو خالد: اي نعم

انا: وانت تعرف كم واحد عنده 700 مليون؟:p

ابو خالد: ولا واحد.

انا: اجل وش يبون بك وسيط؟؟؟؟ الهوامير يعرفون بعض.

ابو خالد: ياخي ماتعرفلنا زبون لا تزعجنا:mad:

انا: الحين جيتن قبل 4 سنين تقولي مليون بطاقة سوا وقبل 3 سنين تقول مليونين سهم اتحاد اتصالات وقبل سنتين تقولي مليونين سهم بنك البلاد. يعني تتوقع اهل هالملايين مايعرفون احد يشري منهم وبدو يوصون الناس دورولنا شرّاية؟ :)

ابو خالد: مممممممممممممممم

انا: كم مرة اخذت عمولة؟ والا احد تعرفه اخذ عمولة؟؟؟؟

ابو خالد: وراي معاملات واجدة ابوزعها عن اذنك:mad:
============================================
============================================

كم مرة سمعنا مثل القصّة الخيالية اعلاه

اخرها امس قاري باحد المنتديات 50 مليون كيس اسمنت من اسمنت اليمامة ب 15 ريال لا وكاتب ارجو مراسلتي على الخاص للجادين فقط


اللي كتب الموضوع مايدري ان انتاج اسمنت اليمامة في السنة يعادل 75 مليون كيس او 3.75 مليون طن اسمنت

لا ادري من اين تبدأ هذه الاشاعات

ولكنها تتداول بشكل كبير وكأن الاثرياء لا يعرفون بعضهم


تحياتي

[هامان]

سراب في سراب

[day_trader]

اخي العزيز الأمير سلطان بن محمد بنفسه قالها...أن مستقبل قطاع الإسمنت القريب والبعيد لا يُبشر بالخير...نتيجة كثرة المصانع الحاليه تحت التشييد والتوسعات الكبيره للمصانع الحاليه...وذكر حينها بيت الشعر:


امرتهم امري بمنعرج اللوى فلم يستبينو الرشد إلا ضحى الغدِ


تحياتي

[اللافي]

ماراح ينجحون النصابين
لان هبرتهم كبيرة وضحيتهم المفترضة تقريبا واحد او مجموعة صغيرة
واذكر من 3 سنين او 4
سمعنا بمؤسسة اسمها هبة الجزيرة
وهذه المؤسسة تبيع CD وبقيمة 500 ريال وتضمن للمشتري انها ستعيد له راس ماله بعد فترة وجيزة خلال ال 6 شهور الاولى تقريبا وبعد ال 6 الثانية ستمنحه 2500 ريال
وبامكانه ان يشتري ماشئاء من السيديات
والمشكلة انها لاقت نجاحا كبيرا ومن ضمنهم واحد كان يشاورني فيهم وطبعا حذرته منهم لكنه قال
انا عارف انهم نصابين بس انا اطمع وانصب منهم واللي بيدخلون في البداية بيربحون وانا منهم
استمرت فترة طويلة واعتقد انها مازالت

[أبوحسين]

اخي العزيز الأمير سلطان بن محمد بنفسه قالها...أن مستقبل قطاع الإسمنت القريب والبعيد لا يُبشر بالخير...نتيجة كثرة المصانع الحاليه تحت التشييد والتوسعات الكبيره للمصانع الحاليه...وذكر حينها بيت الشعر:


امرتهم امري بمنعرج اللوى فلم يستبينو الرشد إلا ضحى الغدِ


تحياتي


بذلت لهم نصحي بمنعرج اللوى 00000 فلم يستبينُ النصح الا ضحى الغد

[alamoudi-m]

توسع عمران--------- مدن صناعيه ---------- مدينة الملك عبدالله(رابغ) كل هذا يطلب اسمنت ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

[سليمان الطلق]

لكن السؤال ..
لماذا يعملون مثل هذه المواضيع ..؟؟

[برقان]

سواليف وخذاريف وحلم ليل

[طلالي]

لا يهمونكم

كل هذا صدمات كهربائية لمحاولة انعاش وتحريك العمران

لان الواحد ((خاصة من يستطيع أن يشتري زي كذا))

اذا شرى انتقل الى المرحلة الثانية وش يسوي به:)

وبذلك ينتقل الى أن يشيد ارضة وبذلك يتحرك العمران (((لانة متوقف أو شبه متوقف !! )))

اعرف شخص صاحب مواد صحية وهو قديم جدا وفي شارع التخصصي ((يعني من محلات العوائد في هذا المجال !!))

يقول مبيعاتنا "اليومية" قبل 10 الى 5 سنوات تتراوح بين 50000 - 70000 الف ريال

اما الان فالرقم للمبيعات "اليومية" 5000 - 7000 يعني طار صفر من الاصفار:)

فالكذب الاعلامي وفي الصحف هو فقط مضاربات على الاراضي يحركها تجار الجشع

وبما أن هذه حركة المواد الصحية ((التي هي مؤشر على العمران!!))

فحركة البناء والعقار هي متوقفة أو شبه متوقفة
والحركات التي تتم هي مضاربية من بن سعيدان و صالح كامل ...الخ من ملاك المخططات والاراضي:)
كل الشغلة بع هالارض على هالسجل التجاري "صوريا" لانه يملك هذا السجل التجاري بطريقة أو بإخرى!!!!

وما ادل على ذلك
من هالمعارض العقارية ومعارض البناء والعمران (((التي ما ان يمضي فترة وينسى المواطنون إلا وصاقعينهم بإعلانات على جسور الطرق عن معرض جديد!!)))


المواطن لم يعد يستطيع شراء شيء!!
فسيولتة قد حرقت ومعها قوتة الشرائية!!

[نجيب]

لا تنسى مساهمات البيض و العوائد الألفية
تصدقون طلع مساهمات صفقات بعارين خاصة ؟
أجل سالفة السعات وال10% من مليار ؟
فيه فصول قادمة على مسارح الجهل ؟

[العنبر]

والله هالشى حقيقى لكن كيف وبرخص
والله هالاسمنت مغشوش ومزورة العلامة هادا اسمنت الى يجى محمل على شكل سائب او قولب كبيرة للعمائر الكبيرة ياخدونه العمال البكستانين او سواق التريله يفرغ جزء منه لااحد اصحابه فى الطريق ويقمون بعد كدا بتعبيته باكياس فارغة يشترونها من اسمنت ينبع او اليمامة مثلا الشركة تبيع الاكياس فاضيه وهم يعبونه
يعنى مسروق

والله صدي لى يبنى عمارة فى جدة يوم جاء ولاهم يعبون من هالاسمنت ويحطون فى اكياس مكتوب عليها اسمنت ينبع

[النوخذة]

السؤال .. هل مازال صاحبك يوزع معاملات ؟؟

[Ksahelp]

الاخ هامان

شكرا على المرور

=============
الاخ day_trader

كأنك تقول ان الموضوع صحيح

==================
الاخ اللافي

شكرا على المرور والمشاركة

=====================
الاخ أبوحسين

شكرا على المرور والمشاركة
=====================
الاخ alamoudi-m

شكرا على المرور والمشاركة
=====================
الاخ سليمان الطلق

لا اعلم ولكنها منتشرة بشكل غريب
=====================
الاخ برقان

شكرا على المرور والمشاركة
=====================
الاخ طلالي

الموضوع كله سواليف في الهوا ولا اظنه ينشّط ولا محمد الشلهوب

=====================
الاخ نجيب

لا بعد عندي لك مساهمات البيض اقصها لكم بعد شوي
=====================
الاخ العنبر

اخوي العنبر ماظنيت انه حقيقي لا اسمنت مغشوش ولا صدقي

=====================
الاخ النوخذة

لا ابشرك صار مسؤول الصادر والوارد يسلّم ويستلم
واخر اخباره المادية شرا كورلا تقسيط يقول عنده صفقة استيراد بشوت من سوريا :o

[العنبر]

[quote=Ksahelp]
الاخ العنبر


اخوي العنبر ماظنيت انه حقيقي لا اسمنت مغشوش ولا صدقي

لا اخو فعلاهدى الحقيقة هولاء سواقين الشاحنات يفرغون كل رد كمية بسيطة
ويعطونها جمعتهم يغلفونها ويبعونها والاكياس اصلية من الشركة نفسها مشترينها فاضية والاسمنت مسروق يعنى ماهو مغشوش وترى فى شمال جدة فيه استراحة شغالين مشا ءالله
الطاسة ضائعة

[أبو يحيى]

اخي العزيز الأمير سلطان بن محمد بنفسه قالها...أن مستقبل قطاع الإسمنت القريب والبعيد لا يُبشر بالخير...نتيجة كثرة المصانع الحاليه تحت التشييد والتوسعات الكبيره للمصانع الحاليه...وذكر حينها بيت الشعر:


امرتهم امري بمنعرج اللوى فلم يستبينو الرشد إلا ضحى الغدِ


تحياتي


سبقته بتوقع مستقبل شركات الأسمنت ولله الفضل !

http://www.thegulfbiz.com/showpost.php?p=1772907&postcount=11

http://www.thegulfbiz.com/showpost.php?p=1817876&postcount=5

[اللافي]

السؤال .. هل مازال صاحبك يوزع معاملات ؟؟





هههههههههه
تراه صار هامور
بس خوينا ksahelp
ماهوب معلمنا لانه فرط في الفرصة و الصفقة راحت عليه :D