سؤال لابو ناصر والاخوان

[ابو الوليد]

امس قريت عن سهم راح يعلنون النتائج المالية بعد نهاية السوق (الساعة 5)

وبعدين شفت السهم بدا يطلع .. ارتفع من اقل من 80 ووصل الى 95 سنت .. المهم شريت ب 83 ولني جديد في الاسهم الامريكية ... واقرا لبعض الاخوان هنا وهناك قلت هذا زي ما يقولون ترند اب ... وخلك مع اتجاه السوق ...
المهم من 83 وصل الى فوق التسعين .. وقلت يعني معقولة هالناس كلها مهبل يشترون سهم وبعد ساعات تعلن الميزانية وما هم خايفين ... اكيد عندهم علم .... اصبر نشوف نهايتها ... وجت الساعة خمس ورحنا للموقع ... وطلعت موسيقى موزارت ... طولت شوي قلت ايش الحكاية ... المهم طلع واحد او وحدة .. مدري كنت ابغى اركز ابغى اعرف ايش يقولون .. الزبدة قالوا فيه تاجيل ساعة .. اعتقد ... ودحدر السهم الى يمكن 77 في اقل من ثانية ورجع ل 88 في اقل من ثانية ... قلنا نصبر نشوف تاليتها ... ورحت لياهو بورد .. اشوف الماسيج .. ناس فاضية واحد يمدح وواحد يذم ... وسب ولعان ... والله ربعنا غي منتدى الاسهم السعودية بكل مشاكلهم افضل بالف مرة ....

المهم .. قلت وين انتظر بعد ساعة ... ورحت انام ... وقمت الصبح اشوف الستريمر .. اللا والسهم سعر 65 سنت .... يعني خسارة 25% (تقربا) .. ولا فيه ناس تقول انه بيدحدر الى 0.15

المهم شكلي طولت السالفة وهي ما تستاهل .. بس طلعت بحاجتين ثنتين :

1- اني نسيت نصيحة ابو ناصر ... ما عملت ستوب لوز ... الحقيقة ما تعودت عليها حتى الان ... ما عندنا هالشغلة في الاسهم السعودية ... (اخاف فيه وانا مادري طول هالفترة)

2- الشي الثاني والمهم بالنسبة لي .. وهو سؤال للاخوة ... هو الارتفاع الغريب في السهم قبل اعلان النتائج المالية ... وان معظم الناس ما كانت تدري عن النتيجة ... يعني هم يمارسون عملية قمار - تقريبا - يا تصيب يا تخيب ... الزبدة هل ظاهرة الارتفاع هذي تحدث لاسهم اخرى قبل اعلان النتائج ...

وتحياتي للجميع

[abonaser]

ههههههههههههههه


النقطة الثانية
ياما تصير

وبالذات مع اسهم اقل من دولار لانها غير معقولة نوعا ما تذبذبها اليومي مرات بدون اخبار فوق 20% فرق بين الهاي واللوا يوميا فكيف اذا كانت وقت الارباح واعلان النتائج

المهم ما هو السهم

وما ذا قالوا بالضبط في مؤتمر الارباح ولا تهتم بسعر الافتر اورز كثير لانة دائما فية تلاعب المهم كمية التدوال في الافتر اورز كم كانت وكمية التداول في اول البري ماركت كم حتصير والافتتاح سعر الافتتاح ركز علي هذولي

وانت اصلا اخطئت خطئين جسيمين وخطأ صغير ثالث

اولا اشتريت سهم كمضاربة ليلة الارباح هذي ما يسويها الا المقامرين ....
وا الانسايدر في الشركة وعائلاتهم بالذات ...اي موظف الشركة عندة علم بخبر الارباح اذا كانت جيدة اشتري اسهم باسم ابنتة وان كانت سيئة باعها شورت باسم زوجتة وهكذا

والخطأ الثاني

الستوب لوز لازم تلتزم فية

وفية خطأ صغير

سهم اعطاك 5% ربح في يوم واحد خذ الربح وابحث عن غيرة الا اذا كنت متاكد جدا مما تفعل

وهذة النقطة الاخيرة سبب خسارة معظم المضاربين

السوق الامريكي فية 8500 شركة عامة تتدوال في الثلاث بورصات يعني سهم اعطاك 5% في يوم واحد ابحث عن غيرة الا اذا كنت متاكد بنسبة توفق 90% انة سوف يرتفع

بالتوفيق مستقبلا وانشاللة انك ماكثرت الكمية

ويا ابا الوليد


هذولا ناس مايمزحون مو مثل ربعنا , وكل صناع السوق عندنا خسروا بما فية الكفاية في امريكا وتعلموا من النزادك والنايس ورجعوا عندنا يطبقون لوا المواشي او السيارات في امريكا كان سعر السهم بسنتات ,
انسي كل ماتعرفة عن السوق السعودي وانت في السوق الامريكي


اللهم باستثناء شخص واحد من الصناع يقال انة ربحان هنا وهناك واللة يرزق من يشاء

[EagleTrader]

Correct me if am wrong. At my Broker ( Ameritrade) the Stop-Lose Doesn't work after hours. That means, even if you had a stop lose in place, it will not have saved ya

[سيف الخيال]

اخي ابو ناصر

ممكن يكون سهم بني ستوك افضل من اكبر او اتخن شركة في السوق ولكن بشرط ان يكون سهم البني ستوك عندما يعلن عن نتائج المركز المالي في نهاية كل ربع او في نهاية كل سنة عن نتائج او اداء مالي جيد .

المشكلة هنا ان هناك اخطاء يقع فيها الكثير من المضاربين وانا واحد منهم في بعض الاحيان يتم المضاربة في السهم بشكل سريع وبدون ان يتاكد من موعد اعلان الارباح ومن ثم تاتي نتائج سيئة وغير متوقعة ومن ثم يتاثر السهم بهذه النتائج وينخفض سعر السهم في السوق او ينهار في بعض الاحيان ، وفي الحقيقة عدة مرات انبه على هذا الموضوع الذي يعتبر خطير للمضارب وللمستثمر كذلك .

واما اذا حدث ان كانت النتائج افضل من المتوقع وتقرير جيد يوضح ايضا الوضع المستقبلي للشركة وهذا الذي يحدث عند اعلان نتائج المركز المالي في نهاية كل ربع او نهاية كل سنة فان الامر يكون عكس حيث 100% سوف يتاثر السهم بوضع ايجابي في السوقي ومن ثم يكون الاتجاه تصاعدي .

وكل هذا يحدث في بعض الاحيان والشخص لا يعلم بذلك .

واعيد وانصح الاخوان ان لا يضاربون في اي سهم الا بعد التاكد من اعلان ارباح الشركة ومعرفة نتائج المركز المالي جيدا حتى لا يقع في مشاكل لم يحسب لها حساب .

وكثير من المضاربين من يعمل على اعلان نتائج ارباح الشركات ويستقل نتائج الشركات عند اعلان ارباح الشركات واعتقد ان هذا الموضوع من المواضيع التي تم مناقشتها كثير في المنتدى منذ سنتين تقريبا .

ولكن نقع في هذه الاخطاء دايما بدون اي استفادة من المواضيع السابقة او قد نكون نسيناها .

والله الموفق ..........

[ابو رواف]

والله يا ابو وليد ما ادري وشلون اصبرك ,,,,,,, لكن مانقول الا كل خير ان شاء الله , وعساها خيرة ان شاء الله , وعسى ان تكرة شيء وهو خير لك , والسهم هذا خبل بدون اخبار يرتفع وينزل وحاول انك تتصيدة في توقيت مناسب , مع ان الاخ بريد الكتروني قال عنة كلام مهوب طيب .


على العموم ,,,,,,,

بخصوص الستوب لوز , فأعتقد ان الي عندة جرئة وثقة با الدخول في هذا السهم وبهذا التوقيت , يشيل الستوب لوز من بالة , لأنة مثل ماتفضلت يا اخوي ان السهم يطامر ومهوب ثابت , ومتذبذب جدا , فكيف احط ستوب لوز , وعلى نسبة كم ؟!!ان كانها اقل من 25% فا السهم ينزل الى اكثر من 25% ويرتفع ثانية خلال ثواني , فممكن انة يبيعلك , ثم يرتفع , اما اذا حطيتة على 50% اصلا خلاص ماعاد ابي ابيع اذا نزل الى هذي الدرجة , خلني اصور جنبة كل يوم في محفظتي ازين لي .

مرة ثانية , الله يعوضك بخير منة يا ابو الوليد ان شاء الله .:)

[ابو الوليد]

اولا : شكرا علىالرد

اسم الشركة : aklm

بالنسبة الافترز اور كان باعتقادي حركة ب 2 مليون سهم (اجمالي اليوم 11 مليون وشوي)

.. وودي يا بو ناصر .. اذا كان بالامكان .. التفصيل بموضوع البري ماركت والافترز اور وليه هي موضوعة وكيف يحدث تلاعب .. وانا حابحث عنها في المنتدى .. بس اذا كان هناك رابط لنقاش سابق فهو سيسهل العملية ...

-- الحقيقة ان طلع عندي مكسب بحدود 14% وما بعت .. هو الخسارة ما هي كبيرة .. يعني المبلغ لواحد تحت التدريب ... الغرض هنا الاستفادة والتعلم ..

اللييى شدني هو الارتفاع الغير طبيعي .. والناس كانت تدري ان فيه اعلان للنتائج .. حسب ما قريت في منتدى ياهو عن الشركة ... قلت لازم الواحد يعمل دراسة ويشوف العلاقة بين حركة الاسهم وتواريخ الاعلان عن النتائج ... اكيد المواضيع هذي مدروسة قبل ... بس يبغا للواحد البحث هنا وهناك .

- اللي فهمته من نتائج الشركة انهم طلعوا خسرانين
" Acclaim reported a net loss for its fiscal first quarter, ended Dec. 1, of $13.9 million, or 15 cents per share, compared with a year-earlier net profit of $17.4 million, or 21 cents per share.
"

وبالنسبة اذا كاتن عند امي تريد ستوب لوز خلال الافتراورز .. ما دري وحشيك ...

تحياتي لجميع الاخوة

[abonaser]

حظك سيئ جدا

ما طحت الا بالشركة هذي اللة يعينك

هذي شركة تصنع الالعاب فيديوا يعني العاب سوني بلاي ستايشون و اكس بوكس الخاص بميكرسوفت ونتيندوا
يعني من قطاع البرامج

القطاع انضرب ضربة جامدة خلال موسم الاعياد وارقام مبيعات العاب الكمبيوتر انخفضت مما أثر علي اكبر الشركات مثل erts فما بالك بصاحبتك هذي .

الشركة نتائجها سيئة جدا كان المتوقع لها من قبل اكثر المحليلين تشاؤما هو خسارة 9 سنت لكل سهم والذي حصل خسارة 15 سنت

وايضا ما عندها كاش الا 51 مليون دولار يعني يادوب يمشيها مابين 6-9 اشهر مع معدل الصرف الموجود في البلاينس شيت الخاصة بها , وديونها القصيرة وطويلة الاجل مجموعها حاليا 7.590 مليون دولار , اذا لم تعمل حاجة يعني احد العابها تضرب في السماء وترفع مبيعات الشركة بقوة فهي امامها وقت صعب جدا

اكيد انك لست مهتم بكل هذة المعلومات , لكن لكي تتعود علي تعرف الشركة التي تنوي ان تضارب فيها يعني للمستقبل

المهم

هذة اسئلة اجب عليها بينك وبين نفسك

كم سهم عندك ؟ وكم نسبتة من راس مالك المخصص لبلاد الخنزير سام

وهل الملبغ للتعليم حقا اي لاتهتم لو خسرتة ؟؟؟

هل انت مستعد للبيع بخسارة اليوم ؟؟

السهم سوف يبدأ في مرحلة شد وجذب
انا اتوقع انة سوف يفتح تحت اللوا ليوم امس اي تحت 70 سنت



وبالنسبة لموضوع الستوب لوز

اناعلي ما اذكر ان داتك لم تكن تفعل الاوامر في الافتر اورز انا لم اجرب امير ترايد لاني طلقتهم قبل الاندماج


وبالنسبة ل الافتر اورز والبري ماركت عادة هناك تلاعب فيها وبالذات من قبل الهيدج فند والماركت ميكر في النازداك بالذات , وهذولا مو مثل ربعنا الي كبير عندة 500 مليون ريال ذولا 450 ماركت ميكر في النازداك وفوق 1500 هيدج فند ..... كلاب تاكل ببعض والصغير فيهم عندة 150 مليون دولار او اكثر

لكن سهمك علي وصفك ما حدث فية تلاعب هذا بيع وهروب واللة العالم لان النتائج كانت سيئة واكمية التدوال كبيرة جدا علي افتر اورز فوق مليونين سهم ومتوسط تدوال 20 يوم اذا استثنينا يوم امس اقل من 1.5 مليون سهم
اقل سعر للسهم هو 60 سنت تاريخيا منذ عام 90 ميلادي وحدث في اكتوبر

اذا كسر 60 سنت تخلص منة

وتوقع حركة ارتدادية ....لكن لا انصحك ان تضارب فية لانة سوف يتعبك جدا لكن اتوقع انة سوف يسجل 40 سنت او اقل في ظرف اسبوعين بالكثير ومنها قد يرتد


بالنسبة للستوب لوز

داتك بالسابق اذكر انها لايوجد فيها امر محدد في الافتر اورز الشراء ماركت يكون ولا ادري عن امير ترايد لاني تركت البروكر قبل الاندماج


علي فكرة تابع البري ماركت ولاحظ ما هو اقل سعر يسجلة السهم واعلي سعر يسجلة السهم والكميات المنفذة

وهل هناك بلوكات فوق 40 الف سهم كثيرة

واللة يعينك اول ما دخلت السوق طحت بغراب وبوم

[هامور]

ابو الوليد هلا بك
انت في منتدى الاسهم السعوديه تبدوا وكانك منطقي كثير في موازنة امورك وكثير محترم حتى في ارائك .
احس انك طبيت طبه مو سنعه في الاسهم الامريكية واولها لازم تكون درس لك من الممكن انه يكون لقاح لك في كيفية التعامل مع الاسهم الامريكية بالذات لان فيها عفاريت من المضاربين ممكن يجيب السهم لفوق قبل اعلان الارباح وياخذ نصيبة ويبيع علىاللي ماله اطلاع و(ينخم) من الدببه والثيران .
فحنا ياخوي في سوقنا هوامير لكن في سوقهم دببة وثيران وحرب وصراع وتحدي من الامور اللي مافيه داعي اقولها لك.
حبيبنا انصحك تبتعد عن شيئين وخل عنك اللي يقولك الستوب لوز اوغيره من الكلام الفاضي(لان الستوب لوز في رايي وسيلة الفاشل والخسران في السوق وهي تميمة يعلقها دايما في رقبته)
والشيئن هي
1- ابتعد عن البيني ستوك لانه الشركات هذي مالها اساس يمكن تعتمد علية في تحليلك للسهم سواء فنيا او ماليا او( شارتيا). وكثير من الاخوان راح فيها وبلع من الخساير لين قال بس.
2- الشيء الثاني هو انك ممكن تروح للشركات اللي فيها النمو لان فيها خير واعتقد انك اذا درستها تمام وركزت في اختيارك لها وعرفت متى تشتري وتبيع راح تلقى خير .
وانتبه تتعلم من بعض الاخوان اللي هنا او تروح وتشتري على توصياتهم لانهم حقيقة يمكن التركيز عند بعضهم ضعيف والاختيار سيء في نفس الوقت مع احترامي الكبير لاجتهاداتهم ونصائحهم الطيبه لكنهم ( يخورون في بعض الاحيان) واستثني عدد منهم يمكن اربعه او اقل لهم الخبره في السوق واعتقد ان ( وجه السعد )واحد منهم .
ابو الوليد اذا بغيت تشتري في الاسهم الامريكية ممكن تنجح بصوره افضل من الاسهم السعودية اذا عرفت الطرق الصحيحه اما تبدا وتعلق الستوب لوز فهم راح يعلقونك لانهم على فكره شرسين جدا ماهم هواميرنا.
اما تدخل صح ولا ابتعد ونصيحة اخ لك خلك في السوق السعودية وراقب الامريكية وتعلم اساسياتها ونفسيات مضاربيها ومزاجها والاسس الفنية لاختيار الاسهم اللي فيها نمو والاسواق اللي تشتغل فيها وشهرين او اقل وادخل وانشاء الله بتنجح اكثر مما تتصور.
وسلامي للاخوان هنا كلهم واقدر مجهودهم وعلى راسهم حبينا alharbi وابوناصر هذا الانسان الطيب.

[ابو الوليد]

شكرا يا بو ناصر على الرد ... وانا على فكرة .. اكره ما اكره البلي ستيشن ... ازعجوني البزران بصوتها .. طق وطقيق . وكل شوي اخترب الشريط نبغا واحد ثاني ...

المبلغ بسيط جدا 00 وما يبسوى .. انا بس اسخن شوي ... واستكشف هالسوق .. ومنكم ومن الاخوان نتعلم وانشالله نستفيد .
وما تجي الساعة 8 اللا وانا طالع .. وراي عشا وماني قاعد هوجس بالسهم عند الناس ..

الاخ هامور حياك يا اخي "لا يكون انت الهامور اللي كان يقول ان فيه منحة في التعمير ) ... المهم

تقول:
"انت في منتدى الاسهم السعوديه تبدوا وكانك منطقي كثير في موازنة امورك وكثير محترم حتى في ارائك " .... يعني الله يهديني وياك .. ابدوا الحين عكس ذلك ...
الموضوع ان سوقنا حليو وصغير وتعرف كيف يتحلرك السهم .. وان توهقت كلها 10% ...
بس حنا هنا في بداية التعامل مع الاسهم الامريكية ... وكلها 2000 دولار بنتعلم فيها لين نشوف الاتجاه الافضل .....

[ابو الوليد]

صرفنا السهم ب 70 سنت ...

وتحياتي للجميع

[EagleTrader]

علشان كذا بدى يطلع 0.73 :D

[سيف الخيال]

aklm

http://thegulfbiz.com/vb/showthread.php?threadid=16234&highlight=AKLM

[ابو الوليد]

حلوة يا ايقل